കരുതലാണ്‌ സഹകരണ മേഖല
കണ്ണൂരിലെ ദിനേശ് അപ്പാരൽസ്
തലശേരി
വിനോദ സഞ്ചാരം മുതൽ കൃഷിവരെ സാമൂഹ്യജീവിതത്തിന്റെ സമസ്‌ത രംഗങ്ങളിലും വ്യാപിച്ചുകിടക്കുന്നതാണ്‌ സഹകരണ മേഖല. സാധാരണക്കാരെ എന്നും ചേർത്തുപിടിച്ച സഹകരണ പ്രസ്ഥാനവുമായി നേരിട്ടും അല്ലാതെയും ബന്ധപ്പെടാത്ത കുടുംബങ്ങൾ കുറയും. വിപണിയിൽ വിലകയറുന്പോൾ ഇടപെടാനും ബ്ലേഡ്‌ പലിശക്കാരിൽനിന്ന്‌ രക്ഷപ്പെടാനും മികച്ച ചികിത്സയ്‌ക്കും നാം ആശ്രയിക്കുന്നത്‌ സഹകരണ സ്ഥാപനങ്ങളെയാണ്‌. ഓണം, വിഷു, ക്രിസ്‌മസ്‌ അവസരങ്ങളിൽ വിലക്കയറ്റം പിടിച്ചുനിർത്താൻ സഹകരണ ചന്തകളിലൂടെ നടത്തുന്ന ഇടപെടൽ അനുഭവിച്ചവരാണ്‌ നമ്മൾ. റബ്‌കോ, റെയ്‌ഡ്‌കോ പോലുള്ള വ്യവസായശാലകൾ മുതൽ ബാങ്കുകളും കൺസ്യൂമർ സ്‌റ്റോറും ദിനേശ് ഫുഡ്‌സും വരെ പടർന്നുപന്തലിച്ച്‌ നിൽക്കുന്നതാണ്‌ കണ്ണൂരിലെ സഹകരണ രംഗം. കൈത്തറി, മത്സ്യം തുടങ്ങി എല്ലാമേഖലയിലും സഹകരണത്തിന്റെ കൈയൊപ്പ്‌ പതിഞ്ഞിട്ടുണ്ട്‌. വിത്തും വളവും വിതരണം ചെയ്യുക മാത്രമല്ല മൂല്യവർധിത ഉൽപ്പന്നങ്ങൾ വിദേശരാജ്യങ്ങളിലേക്ക്‌ കയറ്റി അയക്കുന്ന നിലയിലേക്ക്‌ പല സംഘങ്ങളും വളർന്നു. കതിരൂർ ബാങ്കിന്റെ ‘കതിർ അരി’ പോലെ ഉൽപന്നങ്ങൾ ബ്രാൻഡ്‌ ചെയ്‌ത്‌ വിപണിയിലെത്തിക്കുന്ന നിരവധി സംഘങ്ങളുണ്ട്‌. വിവാഹത്തിനുള്ള ഹാൾ ആയാലും താമസത്തിന്‌ ഹോസ്‌റ്റലായാലും ഭവന വായ്‌പയായാലും ആദ്യം അന്വേഷിക്കുന്നത്‌ സഹകരണ സ്ഥാപനങ്ങളെയാണ്‌. സർക്കാറിന്റെ സാമൂഹ്യ സുരക്ഷാ പെൻഷൻ അർഹരുടെ കൈയിലെത്തിക്കുന്നതും സഹകരണ ബാങ്കുകൾ വഴി തന്നെ. ജനജീവിതത്തിൽ കരുതലായ സഹകരണ സംഘങ്ങൾ നാടിന്റെ വികസനത്തിലും മഹത്തായ സംഭാവനയാണ്‌ നൽകുന്നത്‌. സഹകരണ രംഗത്തും കുതിപ്പിന്റെ വർഷമാണ്‌ കണ്ണൂർ പിന്നിടുന്നത്‌. അഞ്ച്‌ വർഷത്തിനിടെ രണ്ട്‌ ഡസനിലേറെ പുതിയ സഹകരണ സംഘങ്ങൾ ആരംഭിച്ചു. പുതിയ പല മേഖലകളിലേക്കും സഹകരണ സംഘങ്ങൾ കടന്നുവരുന്നു. യുവതലമുറയുടെ മുൻകൈയും പ്രതീക്ഷയേകുന്നതാണ്‌. യുവജന ശാക്തീകരണം ലക്ഷ്യമാക്കി കണ്ണൂർ ഡിസ്‌ട്രിക്ട്‌ യങ് വിമൺ മൾട്ടിപർപ്പസ്‌ കോ–ഓപ്പറേറ്റീവ്‌ സൊസൈറ്റി ഉൾപ്പെടെ നാല്‌ സംഘങ്ങൾ അടുത്തിടെ തുടങ്ങി. മലബാറിക്കസ്‌ ടൂറിസം കോ–ഓപ്പറേറ്റീവ്‌ സൊസൈറ്റി സമീപകാലത്ത്‌ രൂപംകൊണ്ട സംഘങ്ങളിലൊന്നാണ്‌. കാർഷിക മേഖലയിലും വനിതാ രംഗത്തും പുതിയ സംഘങ്ങൾ ആരംഭിച്ചു.
Tags
0 comments