സ്ഥലമെടുപ്പിന്‌ 73.9 കോടി

തളിപ്പറമ്പ്

ജില്ലയിലെ ഏറ്റവും പ്രധാന റോഡായ ചൊറുക്കള -–ബാവുപ്പറമ്പ്– -മയ്യിൽ-–കൊളോളം –മട്ടന്നൂർ വിമാനത്താവള ലിങ്ക് റോഡിന്‌ ഭൂമി ഏറ്റെടുക്കാൻ കിഫ്‌ബി 73.9 കോടി രൂപ അനുവദിച്ചു. കിഫ്‌ബി ഉന്നത ഉദ്യോഗസ്ഥരുമായി എം വി ഗോവിന്ദൻ എംഎൽഎ നടത്തിയ ചർച്ചയിലാണ് തുക അനുവദിച്ച്‌ ഉത്തരവായത്‌. 1600 ഭൂവുടമകളുടെ ഏഴ്‌ ഹെക്ടർ ഭൂമിയാണ്‌ റോഡ്‌ വികസനത്തിന്‌ ഏറ്റെടുക്കേണ്ടിവരിക. ഇതിന്റെ ഭാഗമായ 19(1) വിജ്ഞാപനം അടുത്ത ദിവസം പുറത്തിറങ്ങും. കലക്ടറുടെ വിജ്ഞാപനമിറങ്ങുന്നതോടെ സ്ഥലത്തിന്റെ രേഖകൾ പരിശോധിച്ച് പണം ഭൂവുടമകളുടെ ബാങ്ക്‌ അക്കൗണ്ടുകളിലേക്ക്‌ നൽകും. ഇതോടൊപ്പം റോഡ്‌ നിർമാണത്തിനാവശ്യമായ 231 കോടി രൂപ അനുവദിക്കാനുള്ള നടപടിയും അന്തിമഘട്ടത്തിലാണ്. തളിപ്പറമ്പ് – ഇരിട്ടി സംസ്ഥാന പാതയിലെ ചൊറുക്കളയിൽനിന്ന് ആരംഭിക്കുന്ന റോഡ്‌ 22.5 കിലോമീറ്ററിലാണ്‌ നവീകരിക്കുക. വൈദ്യുതിത്തൂണുകളും കുടിവെള്ള കണക്‌ഷനുകളുടെ പൈപ്പുൾപ്പെടെയുള്ള വൈദ്യുതി ബോർഡിന്റെയും ജലഅതോറിറ്റിയുടെയും യൂട്ടിലിറ്റി ഷിഫ്റ്റിങ്ങടക്കമാണ്‌ നവീകരണത്തിനുള്ള 231 കോടിരൂപ. കാസർകോട്‌ ജില്ലയുടെ വിവിധ ഭാഗങ്ങളിൽനിന്നുള്ളവർക്കും കണ്ണൂരിലെ മലയോരമേഖലകളായ ആലക്കോട്‌, കുടിയാന്മല, ചപ്പാരപ്പടവ്‌, ചെറുപുഴ പുളിങ്ങോം ഭാഗത്തുള്ളവർക്കും മലയോര ഹൈവേവഴി എളുപ്പത്തിൽ വിമാനത്താവളത്തിലെത്തിച്ചേരാവുന്ന വഴിയാണിത്‌. തളിപ്പറന്പ്‌ –മണക്കടവ്‌– കൂർഗ്‌ റോഡിന്റെ ഭാഗമായ കാഞ്ഞിരങ്ങാടുനിന്ന്‌ ഇ‍ൗ റോഡിലേക്ക്‌ പ്രവേശിക്കാമെന്നതും യാത്രക്കാർക്ക്‌ ഏറെ ഉപകാരപ്രദമാകും. 69 കോടി രൂപ ചെലവിൽ നവീകരണ പ്രവൃത്തി നടക്കുന്ന ഇടിസി– മഴൂർ– പന്നിയൂർ റോഡുവഴി നടുവിൽ ആലക്കോട്‌ ഭാഗത്തുള്ളവർക്കും ഇ‍ൗ റോഡിലേക്ക്‌ എളുപ്പത്തിലെത്താം. വിമാനത്താവള ലിങ്ക്‌ റോഡുമായി ബന്ധിപ്പിക്കുന്ന പൂമംഗലം കൊടിലേരി പാലത്തിന്റെ അപ്രോച്ച്‌ റോഡ്‌ പണിയും അവസാനഘട്ടത്തിലാണ്‌ . ഇതോടെ മലയോരത്തുള്ളവർക്ക് വിമാനത്താവള ലിങ്ക്‌റോഡിലേക്ക്‌ കൂടുതൽ എളുപ്പത്തിലെത്താം. വിമാനത്താവളയാത്രക്കാർക്കുപുറമെ പ്രധാന തീർഘാടന വിനോദസഞ്ചാരകേന്ദ്രമായ പറശ്ശിനിക്കടവിലേക്കും ഇതുവഴി എളുപ്പത്തിലെത്തിച്ചേരാമെന്നതും ഇ‍ൗ റോഡിന്റെ പ്രാധാന്യം വർധിപ്പിക്കുന്നു.

​ടെൻഡർ നടപടി പൂർത്തിയാക്കി റോഡ്‌ ഉടൻ നവീകരിക്കും ​

വിനോദ സഞ്ചാരമേഖലയിലും അടിസ്ഥാനമേഖലയിലും സമാനതകളില്ലാത്ത വികസന മുന്നേറ്റം നടത്തുന്ന ജില്ലയ്‌ക്ക്‌ ഏറെ ആവേശം പകരുന്നതാണ്‌ ചൊറുക്കള -–ബാവുപ്പറമ്പ്– -മയ്യിൽ-–കൊളോളം –മട്ടന്നൂർ വിമാനത്താവള ലിങ്ക് റോഡിന്‌ ഭൂമി ഏറ്റെടുക്കാൻ തുക അനുവദിച്ച നടപടി. ഇതോടെ ഈ പ്രവൃത്തിയുടെ സുപ്രധാന കടമ്പ പൂർത്തിയായിരിക്കുന്നു. ടെൻഡർ നടപടി പൂർത്തിയാക്കി എത്രയും വേഗം റോഡ്‌ നവീകരിക്കും. സൂ–സഫാരി പാർക്കും തെയ്യം മ്യൂസിയവും കരിന്പം ഫാം ടൂറിസമുൾപ്പെടെയുള്ള നാടിന്റെ മുഖചായതന്നെ മാറുന്ന വികസനത്തിനൊപ്പം ചേർത്തുവയ്‌ക്കാവുന്ന പ്രവൃത്തിക്കാണ് വിമാനത്താവള ലിങ്ക്‌ റോഡിലൂടെ തുടക്കമാകുന്നത്‌. ​എം വി ഗോവിന്ദൻ എംഎൽഎ