വഴിനിറയെ സ്‌നേഹപ്പൂക്കൾ

മട്ടന്നൂർ മട്ടന്നൂർ മണ്ഡലം എൽഡിഎഫ് സ്ഥാനാർഥി വി കെ സനോജിന് മട്ടന്നൂരിൽ​ മുഖവുരയുടെ ആവശ്യമില്ല. ഏറ്റവും അടുത്ത കുടുംബാംഗത്തെപ്പോലെയാണ്​ ജനങ്ങൾ യുവത്വത്തിന്റെയും ചുറുചുറുക്കിന്റെയും പ്രതീകമായ സ്ഥാനാർഥിയെ വരവേൽക്കുന്നത്​. നാടിന്റെ സ്​നേഹവായ്പ്​ ഏറ്റുവാങ്ങി വോട്ടഭ്യർഥിച്ച്‌ ​ അദ്ദേഹം യാത്രതുടരുന്നത്​ ജനഹൃദയങ്ങളിലൂടെയാണ്​​. അതിരാവിലെ തന്നെ അദ്ദേഹം ജനങ്ങളിലേക്ക്​ ഇറങ്ങുകയാണ്​. മാലൂർ സ്വദേശിയായത്‌ മാത്രമല്ല അദ്ദേഹത്തെ മണ്ഡലത്തെ സുപരിചിതമാകുന്നത്​. മട്ടന്നൂർ പഴശ്ശിരാജ കോളേജിലെ പൂർവ വിദ്യാർഥി എന്ന നിലയിൽ മട്ടന്നൂരിന്റെയും പരിസരങ്ങളിലെയും മുക്കും മൂലയും അറിയാം. എത്തിപ്പെടുന്നയിടങ്ങളിലെല്ലാം ജനങ്ങളിൽ ഒരാളായി മാറുകയാണ് സനോജ്​ . ചൊവ്വാഴ്ച രാവിലെ കാരയിൽനിന്നാണ്​ വി കെ സനോജ്​ തെരഞ്ഞെടുപ്പ്​ പര്യടനം തുടങ്ങിയത്​. കടകളിലും ഓഫീസുകളിലും കയറി വോട്ടഭ്യർഥിച്ചു. പേരാവൂർ, കുറ്റിക്കര, പാല​യോട്​, കീഴല്ലൂർ എന്നിവിടങ്ങളിൽ ടൗണുകളിലെ കടകളിലും സ്റ്റാൻഡുകളിലുമുള്ളവരെ കണ്ട്​ വോട്ട്​ തേടി. ശേഷം മട്ടന്നൂരിൽ നടന്ന മണ്ഡലം വികസന സെമിനാറിൽ പ​ങ്കെടുത്തു. അവിടെനിന്ന്​ നേരെ പോയത്​ കീഴല്ലൂർ വില്ലേജ്​ ഓഫീസ്​, കീഴല്ലൂർ പഞ്ചായത്ത്​ ഓഫീസ്​ എന്നിവിടങ്ങളിലായിരുന്നു. ജീവനക്കാരെയും വിവിധ ആവശ്യങ്ങൾക്ക്​ ഇവിടങ്ങളിലെത്തിയവരോടും വോട്ട്​ അഭ്യർഥിച്ചാണ്​ മടങ്ങിയത്​. ഉച്ചയ്‌ക്കു​ശേഷം തെരൂർ പാലയോട്​ ജങ്​ഷൻ, നാഗവളവ്​ ടിടിഐ, ചാലോട്​ ടൗൺ എന്നിവിടങ്ങളിൽ പര്യടനം നടത്തി. വൈകിട്ട്​ കൂടാളിയിലും പരിസര പ്രദേശങ്ങളിലുമെത്തി വോട്ടഭ്യർഥിച്ചു. രാത്രി വൈകിയാണ്​ പര്യടനം അവസാനിച്ചത്‌. അതിനിടയിൽ മരണ വീടുകൾ സന്ദർശിക്കാനും സമയം കണ്ടെത്തി. വാഹനാപകടത്തിൽ മരിച്ച അധ്യാപികയുടെ മുണ്ടോറപ്പൊയിലിലെ വീട്​, മട്ടന്നൂരിനടുത്ത ഗാന്ധി റോഡിലെ മരണ വീട്​, പനയത്താംപറമ്പ്​ ചെറുകുഞ്ഞിക്കരിയിലെ വീട്, എളമ്പാറയിലെ വീട്​ ​ എന്നിവിടങ്ങളിലെത്തി കുടുംബാംഗങ്ങളുടെ ദുഃഖത്തിൽ പങ്കുചേർന്നു.