വാഴാനിയിൽ മേരി തോമസ്, അഭിമാനപൂർവം രണ്ടാം വരവ്

മാടക്കത്തറ

ജില്ലാ പഞ്ചായത്ത് വാഴാനി ഡിവിഷൻ എൽഡിഎഫ് സ്ഥാനാർഥി മേരി തോമസ് തെക്കുംകര, മാടക്കത്തറ പഞ്ചായത്തുകളിൽ പര്യടനം പൂർത്തിയാക്കി. മുന്പ്‌ തദ്ദേശ തെരഞ്ഞെടുപ്പിൽ മേരി തോമസ് എൽഡിഎഫ് സ്ഥാനാർഥിയായി മത്സരിച്ച് വിജയിക്കുകയും ജില്ലാ പഞ്ചായത്ത് പ്രസിഡന്റാവുകയും ചെയ്തിരുന്നു. ഏറ്റവും മികച്ച ജില്ലാ പഞ്ചായത്തായി കേന്ദ്ര സർക്കാർ അന്ന് തൃശൂരിനെയാണ് തെരഞ്ഞെടുത്തത്. മാടക്കത്തറ പഞ്ചായത്തിൽ സമാനതകളില്ലാത്ത വികസനമാണ് എൽഡിഎഫ് ഭരണകാലത്ത് നടന്നത്. ആ വികസന തുടർച്ചക്കാണ് വോട്ടുചോദിക്കുന്നത്. തെക്കുംകര പഞ്ചായത്തിലെ മങ്കരയിൽ നിന്ന് രാവിലെ എട്ടിന് ആരംഭിച്ച പര്യടനം 10ന് വീരോലിപ്പാടത്തെ സ്വീകരണം എറ്റുവാങ്ങി മാടക്കത്തറ പഞ്ചായത്തിലേക്ക് പ്രവേശിച്ചു. കട്ടിലപൂവമായിരുന്നു മാടക്കത്തറയിലെ ആദ്യ കേന്ദ്രം. ചിറക്കാക്കോട്, മുടിക്കോട്, കോട്ടേപ്പാടം, പടിഞ്ഞാറെ വെള്ളാനിക്കര, മാടക്കത്തറ, പുല്ലാനിക്കാട്, മാറ്റാംപുറം, താണിക്കുടം കേന്ദ്രങ്ങളിലെ സ്വീകരണങ്ങൾക്ക്‌ ശേഷം പോപ്പ് നഗറിൽ സമാപിച്ചു. എൽഡിഎഫിന് ഭരണത്തുടർച്ച ഉറപ്പിച്ച്‌ നിരവധിപേർ സ്വീകരണ കേന്ദ്രങ്ങളിലെത്തി. ബ്ലോക്ക് പഞ്ചായത്ത്, പഞ്ചായത്ത് വാർഡ് സ്ഥാനാർഥികളും കേന്ദ്രങ്ങളിലെത്തി സ്വീകരണങ്ങൾ ഏറ്റുവാങ്ങി.