ജൈത്രയാത്ര തുടരും

ചേലക്കര

ജില്ലാ പഞ്ചായത്ത് ചേലക്കര ഡിവിഷന്‍ സ്ഥാനാര്‍ഥി കെ ആര്‍ മായയുടെ പര്യടനം ആദ്യഘട്ടം പൂര്‍ത്തിയായി. അധ്യാപികയായിരുന്ന കെ ആര്‍ മായക്ക് ചെല്ലുന്നിടത്തെല്ലാം ഊഷ്മള സ്വീകരണമാണ് ലഭിക്കുന്നത്. അവധി ദിനമായതിനാല്‍ മിക്കവിടങ്ങളിലും തിരക്കുണ്ട്. ഏറ്റവും അടുത്ത പരിചയക്കാരിയെന്നപോലെയാണ് പെരുമാറ്റവും വാക്കുകളും. ഞായര്‍ രാവിലെ ഒന്പതിന് ചുവപ്പിന്റെ കോട്ടയായ വെങ്ങാനെല്ലൂരില്‍നിന്നാണ് തുടങ്ങിയത്. സ്ഥാനാർഥിയെ കാണാനും വിജയാശംസകള്‍ നേരാനും വന്‍ ജനാവലിയാണ്‌ എത്തിയത്‌. ചേലക്കരയിലെ ഏതാനും കേന്ദ്രങ്ങളിൽ വോട്ടഭ്യർഥിച്ചശേഷം കൊണ്ടാഴി പഞ്ചായത്തിലേക്ക് പ്രവേശിച്ചു. കേരകക്കുന്നിൽ പള്ളിയിൽനിന്ന്‌ പ്രാര്‍ഥനക്കുശേഷം മടങ്ങാനൊരുങ്ങുന്ന കുടുംബാംഗങ്ങളെ കണ്ട് നേരിട്ട് വോട്ട് ചോദിച്ചു. മായ ടീച്ചര്‍ക്കുവേണ്ടി പള്ളിയിലെ പാസ്റ്റര്‍ സ്നേഹപൂര്‍വം പ്രാര്‍ഥനയ്ക്കായി ഒരു നിമിഷം മാറ്റിവച്ചു. കൊണ്ടാഴിയില്‍നിന്ന് നേരെ പഴയന്നൂര്‍ പഞ്ചായത്തിലെ വിവിധ കേന്ദ്രങ്ങളിലാണെത്തിയത്. കഴിഞ്ഞതവണ തിരുവില്വാമല ഡിവിഷനില്‍ ഉള്‍പ്പെട്ട വാര്‍ഡുകള്‍ ഇത്തവണ ചേലക്കര ഡിവിഷനിലേക്ക് മാറിയിട്ടുണ്ട്. അക്കാര്യം വ്യക്തമായിത്തന്നെ പറഞ്ഞാണ് മായ ടീച്ചറുടെ വോട്ടുപിടിത്തം. വൈകിട്ട് 6.30യോടെ കുമ്പളക്കോട് പര്യടനം സമാപിച്ചു.