അഞ്ചുതെങ്ങിൽ ഏറെയുണ്ട് വികസനവും ക്ഷേമവും

ചിറയിൻകീഴ്

വൈദേശികാധിപത്യത്തിനെതിരെ നിരായുധരായ ജനത സായുധധാരികളായ ബ്രിട്ടീഷ് പട്ടാളക്കാർക്കെതിരെ 180 ദിവസം അഞ്ചുതെങ്ങ് കോട്ട ഉപരോധിച്ചുനടത്തിയ ധീര സമരചരിത്രം ഉറങ്ങുന്ന നാട്. കുമാരനാശാന്റെ ജന്മദേശം. ഒരു കാലത്ത് കയറും കയർ ഉൽപ്പന്നങ്ങൾക്കും പേരുകേട്ടതും കമ്യൂണിസ്റ്റ് പ്രസ്ഥാനങ്ങൾക്ക് ശക്തമായ അടിത്തറയുള്ള പ്രദേശം. 1952ൽ രൂപീകൃതമായ പഞ്ചായത്തിൽ 1979 മുതൽ ഭരണം തുടരുന്ന എൽഡിഎഫ് കഴിഞ്ഞ അഞ്ചുവർഷക്കാലം നടപ്പിലാക്കിയത് സമാനതകളില്ലാത്ത വികസന ക്ഷേമപ്രവർത്തനങ്ങൾ. കുടിവെള്ളക്ഷാമത്തിന് പരിഹാരം കാണാൻ ത്രിതല പഞ്ചായത്തുകളുടെ സഹകരണത്തോടെ നിർമിച്ച ജലസംഭരണി എൽഡിഎഫ് ഭരണസമിതി യാഥാർഥ്യമാക്കി. മത്സ്യ മേഖല ഉപജീവനമാർഗമായി സ്വീകരിക്കുന്ന ഭൂരിഭാഗം ജനസംഖ്യയുള്ള ഇവിടെ മത്സ്യ തൊഴിലാളികൾക്ക് വല, ഫൈ ബർ കട്ടമരം, ഇവരുടെ മക്കൾക്ക് പഠനത്തിനായി ഫർണിച്ചർ, ഉപരിപഠനത്തിന് ലാപ്ടോപ്, വനിതകൾക്ക് ഇരുചക്രവാഹനവും ഐസ് ബോക്സും, സ്വയംതൊഴിലിനായി മുറ്റത്ത് ഒരു മീൻതോട്ടം തുടങ്ങിയ പദ്ധതികൾ നടപ്പിലാക്കി. കടൽതീരത്തോടുചേർന്ന് 50 മീറ്റർചുറ്റളവിൽ താമസിക്കുന്ന ആളുകളെ സുരക്ഷിത കേന്ദ്രങ്ങളിലേക്ക്‌ മാറ്റി താമസിപ്പിക്കുന്നതിനായി നടപ്പിലാക്കിയ പുനർഗേഹം പദ്ധതി വഴി ഏറ്റവും കൂടുതൽ ഗുണഭോക്താക്കൾക്ക് ആനുകൂല്യം കിട്ടിയ പഞ്ചായത്താണ് അഞ്ചുതെങ്ങ്. മുഖ്യമന്ത്രിയുടെ ദുരിതാശ്വാസനിധിയിൽനിന്നും ഫിഷറീസ് വകുപ്പിൽനിന്നുമായി 10 ലക്ഷം രൂപയാണ് ഇതുവഴി ലഭിക്കുന്നത്. ആകെയുള്ള 1500 കുടുംബങ്ങളിൽ 660 കുടുംബങ്ങൾക്ക് വീട് പൂർത്തിയാക്കി. 863 പേർക്ക് ഭൂമി വാങ്ങി വീട് നിർമാണവും ആരംഭിച്ചു. ബാക്കിയുള്ളവ നിർമാണഘട്ടത്തിലാണ്. ഇതോടെപ്പം മുഴുവൻ വാർഡുകളിലും തെരുവ് വിളക്കുകളും സ്ഥാപിച്ചു. 60 വയസ്സിന് മുകളിൽ പ്രായമുള്ള മുതിർന്ന പൗരൻമാർക്ക് മാനസിക ഉല്ലാസത്തിനായി സ്നേഹതീരം പകൽവീട് സ്ഥാപിച്ചുകൊണ്ട് അന്തേവാസികൾക്ക് ഉച്ചഭക്ഷണവും രാവിലെയും വൈകിട്ടും ചായയും പോഷക ആഹാരം ഉറപ്പുവരുത്തുന്നതിനായി ധാന്യങ്ങളടങ്ങിയ കുറുക്കും നൽകി വരുന്നു. പച്ചക്കറി കൃഷി പ്രോത്സാഹനത്തിന്റെ ഭാഗമായി ചെടിച്ചട്ടിയിൽ പച്ചക്കറികൃഷി, പൂവനി പദ്ധതി വഴി നെൽവയൽ ക്യത്രിമമായി സൃഷ്‌ടിച്ച് കരകൃഷി എന്നിവ നടപ്പിലാക്കി. 1200 കിലോ പ്ലാസ്റ്റിക്‌ ശേഖരിച്ച് ക്ലീൻ കേരള കമ്പനിക്ക് കൈമാറി.