കരുതലും
വികസനവും

തിരുവനന്തപുരം

തദ്ദേശ തെരഞ്ഞെടുപ്പ്‌ പ്രചാരണം അവസാനഘട്ടത്തിലേക്ക്‌ കടക്കുന്പോൾ ഏറെ മുന്നേറി എൽഡിഎഫ്‌. നഗരങ്ങളിലും ഗ്രാമങ്ങളിലുമെല്ലാം ചർച്ച എൽഡിഎഫ്‌ സർക്കാരിന്റെ വികസന ക്ഷേമ പ്രവർത്തനങ്ങൾതന്നെ. എൽഡിഎഫ്‌ സ്ഥാനാർഥികൾ നിരവധി തവണ നേരിട്ട്‌ വീടുകളിലെത്തി വോട്ടർമാരെ കണ്ടുകഴിഞ്ഞു. കഴിഞ്ഞ 10 വർഷമായി സംസ്ഥാന സർക്കാരും എൽഡിഎഫ്‌ ഭരിക്കുന്ന തദ്ദേശ സ്ഥാപനങ്ങളും നാട്ടിൽ നടപ്പാക്കുന്ന നിരവധി വികസനങ്ങളും ക്ഷേമ പ്രവർത്തനങ്ങളും ചൂണ്ടിക്കാട്ടിയാണ്‌ വോട്ടർമാർ സ്ഥാനാർഥികളെ സ്വീകരിക്കുന്നത്‌. എൽഡിഎഫ്‌ തുടരണമെന്നും നാട്‌ വികസിക്കണമെന്നും എല്ലാവരും ആഗ്രഹിക്കുന്നു. സിറ്റിങ്‌ സീറ്റുകൾ നിലനിർത്തുന്നതിനും കൂടുതൽ പിടിച്ചെടുക്കുന്നതിനുമാണ്‌ എൽഡിഎഫ്‌ ലക്ഷ്യമിടുന്നത്‌. എല്ലാ വീടുകളിലും സർക്കാരിന്റെ ക്ഷേമമെത്തിയ അനുഭവമുള്ളതിനാൽ മറ്റുമുന്നണികളുടെ നുണബോംബുകളൊന്നും ജനത്തിനുമുന്നിൽ ഏശുന്നില്ല. ജില്ലാ പഞ്ചായത്തിൽ ആകെയുള്ള 26 ഡിവിഷനിൽ 21 ലും എൽഡിഎഫാണ്‌. 100 കോർപറേഷൻ വാർഡുകളിൽ 53 ഉം നേടി ഭരണത്തിൽ തുടരുന്നു. നാല്‌ നഗരസഭയും 11 ബ്ലോക്ക്‌ പഞ്ചായത്തിൽ 10 ഉം 73 പഞ്ചായത്തിൽ 52 ഉം എൽഡിഎഫിനൊപ്പമാണ്‌. ലോകത്തിലെ ഏറ്റവും വലിയ തുറമുഖങ്ങളിലൊന്നായ വിഴിഞ്ഞം, രാജ്യത്തെ ആദ്യ ഡിജിറ്റൽ സർവകലാശാല, സയൻസ്‌ പാർക്ക്‌, സ്‌പെയ്‌സ്‌ പാർക്ക്‌, ലൈഫ്‌ സയൻസ്‌ പാർക്ക്‌, ദേശീയ ജലപാത, മലയോര– തീരദേശ ഹൈവേകൾ എന്നിങ്ങനെ കഴിഞ്ഞ 10 വർഷത്തിനിടെ തിരുവനന്തപുരത്തുണ്ടായ വികസനങ്ങൾ പലതാണ്‌. ഗ്രാമപ്രദേശങ്ങളിലും സ്‌കൂളുകളും റോഡുകളുമെല്ലാം നവീകരിച്ചു. ഒരു പഞ്ചായത്തിൽ ഒരു കളിസ്ഥലം എന്ന ലക്ഷ്യത്തിലേക്കടുക്കുന്നു. ഇ‍ൗ തുടർച്ചയുടെ ആവേശമാണ്‌ തെരഞ്ഞെടുപ്പിൽ പ്രതിഫലിക്കുന്നത്‌. എന്നാൽ വോട്ട്‌ അഭ്യർഥിച്ച്‌ നാട്ടുകാർക്കിടയിലിറങ്ങാൻ പറ്റാത്ത അവസ്ഥയിലാണ്‌ യുഡിഎഫും ബിജെപിയും. ക്ഷേമ പെൻഷനടക്കം കുടിശ്ശികയാക്കിയ യുഡിഎഫ്‌ ആകട്ടെ, 2000 രൂപയാക്കി വർധിച്ചപ്പോൾ തടയാനാണ്‌ ശ്രമിക്കുന്നത്‌. രാഹുൽ മാങ്കൂട്ടത്തിൽ എംഎൽഎയുടെ സ്‌ത്രീപീഡന കഥകളും ചർച്ചയാണ്‌. ബിജെപിക്കുള്ളിലെ പ്രവർത്തകരുടെ ആത്മഹത്യയും അഴിമതിയും ജനം ചോദ്യം ചെയ്യുന്നുണ്ട്‌. വാഗ്‌ദാനങ്ങളൊന്നും പാലിക്കാത്ത മോദിസർക്കാരിനെതിരെയും ജനവികാരം ശക്തമാണ്‌.