ജനമനസ്സറിഞ്ഞ് 
ബെൻഡാർവിൻ

തിരുവനന്തപുരം

പാറശാലയുടെ മണ്ണിൽ അഡ്വ. എസ്‌ കെ ബെൻഡാർവിനെന്നത്‌ കരുതലിന്റെയും നടപ്പാക്കിയ വികസനത്തിന്റെയും പര്യായമാണ്‌. കഴിഞ്ഞ അഞ്ചുവർഷക്കാലം പാറശാല ബ്ലോക്കിനെ കൈപിടിച്ചുയർത്തി, വികസനത്തിന്റെ പുതിയ ആകാശങ്ങളിലേക്ക്‌ പറത്തിയ ആ യുവപോരാളിയെ നാട്‌ വീണ്ടും കാത്തിരിക്കുകയാണ്‌. ജില്ലാ പഞ്ചായത്തിലേക്കുള്ള രണ്ടാം അങ്കത്തിന്‌ ഇറങ്ങുമ്പോൾ, വോട്ടർമാർക്ക് മുന്നിൽ അദ്ദേഹത്തിന്റെ അനുഭവം കരുത്തായി നിൽക്കുന്നു. നിലവിൽ പാറശാല ബ്ലോക്ക് പഞ്ചായത്ത് പ്രസിഡന്റ്‌ എന്ന നിലയിൽ അദ്ദേഹം നടപ്പാക്കിയ വികസന അധ്യായങ്ങൾ ഇതര രാഷ്ട്രീയ പാർടി പ്രവർത്തകർപ്പോലും അംഗീകരിക്കുന്നുണ്ട്‌. ഓരോ സാധാരണക്കാരന്റെയും ദുരിതമറിഞ്ഞുള്ള പ്രവർത്തനങ്ങളാണ്‌ അദ്ദേഹത്തിന്റെ ഭരണസമിതി നടപ്പാക്കിയത്‌. പാറശാല ബ്ലോക്കിലെ ‘രോഗമില്ലാത്ത ഗ്രാമം’ പദ്ധതി സാധാരണ ജനങ്ങൾക്ക് വലിയ ആശ്വാസമായിരുന്നു. ആരോഗ്യരംഗത്ത് ഗ്രാമീണ ജനതയ്ക്കിടയിൽ ആരോഗ്യ സംരക്ഷണത്തിനെക്കുറിച്ചുള്ള അവബോധം സൃഷ്ടിക്കുകമാത്രമല്ല, രോഗം തടയാനുള്ള മുൻകരുതലുംകൂടിയായി. വിദ്യാഭ്യാസ കലാകായിക രംഗത്ത് മികവുപുലർത്തിയ ആയിരത്തോളം വിദ്യാർഥികളെ അക്ഷരസുകൃതം പരിപാടിയിലൂടെ വർഷംതോറും ആദരിച്ചു. സ്ത്രീശാക്തീകരണത്തിനായി വലിയ മുന്നേറ്റം നടത്തി. സൗജന്യ ജിംനേഷ്യം, റിലാക്സ് എന്ന പേരിൽ സൗജന്യ യോഗ പരിശീലനം, അക്ഷരദീപം എന്ന പേരിൽ വായനശാലകൾക്ക് സഹായം, മത്സ്യത്തൊഴിലാളികള്‍ക്ക് വല വാങ്ങാൻ കൈത്താങ്ങ് പദ്ധതി, ക്യാൻസർ രോഗികൾക്ക് തുണ എന്ന പേരിൽ മരുന്നുവിതരണം എന്നിവ മാതൃകാ പദ്ധതികളാക്കിവരികയാണ്‌. ശനിയാഴ്ച പ്ലാമൂട്ടുക്കട എറിച്ചല്ലൂർ ഭാഗത്തായിരുന്നു ബെൻഡാർവിന്റെ പ്രചാരണ യാത്ര. പണിത്തിരക്കുകൾ മാറ്റിവച്ച് ഹൃദയം നിറഞ്ഞ ചിരിയോടെ അഭിവാദ്യം ചെയ്ത കർഷകത്തൊഴിലാളിയായ തങ്കമണി നൽകുന്ന പിന്തുണ വോട്ടിൽമാത്രമൊതുങ്ങുന്നതല്ല, അത്‌ നാടിന്റെ പ്രതീക്ഷകൂടിയാണ്‌. ബെൻഡാർവിൻ എന്ന ഈ യുവനേതാവിൽ പാറശാല ഡിവിഷൻ അർപ്പിക്കുന്ന വിശ്വാസം, ഒരു നാടിന്റെ വികസനസ്വപ്നങ്ങളുടെ തുടർച്ചയ്ക്കായുള്ള കാത്തിരിപ്പാണ്