കൈനകരിയിൽ വീടുകളിൽ വെള്ളം കയറി

തകഴി

പാടശേഖരസമിതികളുടെ ഗുരുതരമായ അനാസ്ഥമൂലം കൈനകരി പഞ്ചായത്തിലെ ആറാം വാർഡിൽ വെള്ളപ്പൊക്കം. ചേന്നങ്കരി കിഴക്കുംപുറം, കൂലിപ്പുരയ്‌ക്കൽ പാടശേഖരങ്ങളുടെ പുറംബണ്ടിൽ താമസിക്കുന്നവരുടെ വീടുകളിലും പറമ്പിലും വെള്ളം കയറി. ​കൃഷി കഴിഞ്ഞ പാടങ്ങളിൽ പരിധിയിൽ കൂടുതൽ വെള്ളം കയറ്റിയതും, മഴ ശക്തമായിട്ടും മോട്ടർ അടിച്ച് വെള്ളം വറ്റിക്കാതിരുന്നതുമാണ് ദുരന്തത്തിന് കാരണമായത്. മഴക്കാലം മുന്നിൽക്കണ്ട് പാടത്തിനുള്ളിലെ വെള്ളം ക്രമീകരിച്ചുനിർത്താൻ സമിതികൾക്ക് കഴിയാതെ പോയത് വലിയ വീഴ്‌ചയായി. ​വെള്ളപ്പൊക്കത്തെത്തുടർന്ന് പ്രദേശവാസികളുടെ കരകൃഷികൾ പൂർണമായും നശിച്ചു. പറമ്പുകളിൽ കൃഷിചെയ്‌തിരുന്ന കപ്പ, വാഴ, പയർ, ചേമ്പ്, ചേന, കാച്ചിൽ എന്നിവയെല്ലാം വെള്ളത്തിലായി. വീടുകളിൽ വെള്ളം കയറിയതോടെ പ്രായമായവരാണ് കൂടുതൽ ദുരിതം അനുഭവിക്കുന്നത്. ​400 ഏക്കറോളം വരുന്ന കിഴക്കുംപുറം, കൂലിപ്പുരയ്‌ക്കൽ പാടശേഖരങ്ങളിലെ മോട്ടോറുകൾ അടിയന്തരമായി പ്രവർത്തിപ്പിച്ച് വെള്ളം വറ്റിക്കാൻ കലക്‌ടറും പഞ്ചായത്ത് ഭരണസമിതിയും ഇടപെടണമെന്ന് പ്രദേശവാസികൾ ആവശ്യപ്പെട്ടു. കലക്‌ടർക്ക് നിവേദനവും നൽകിയിട്ടുണ്ട്‌.