അലകടലായി അവകാശപത്രിക മാർച്ച്​

ആലപ്പുഴ

വിദ്യാർഥി പങ്കാളിത്തംകൊണ്ട്​ അലകടലായ്​ മാറി എസ്​എഫ്​ഐ അവകാശപത്രിക മാർച്ച്​. ഗവർണറെ ചാൻസലർ സ്ഥാനത്തുനിന്ന്​ മാറ്റുകയെന്നതടക്കമുള്ള വിവിധ ആവശ്യങ്ങൾ അംഗീകരിക്കണമെന്നാവശ്യപ്പെട്ട്​ നടത്തിയ മാർച്ചിൽ ജില്ലയിലെ നാലായിരത്തോളം വിദ്യാർഥികൾ പങ്കെടുത്തു. വൈഎംസിഎയിൽനിന്ന്​ ആരംഭിച്ച മാർച്ച്​ ട‍ൗൺഹാളിന്​ മുന്നിലൂടെ ജനറൽ ആശുപത്രി ജങ്​ഷനിൽനിന്ന്​ തിരിഞ്ഞ്​ കലക്​ടറേറ്റിൽ സമാപിച്ചു. തുടർന്ന്​ കേന്ദ്ര കമ്മിറ്റിയംഗം ആര്യ പ്രസാദ് ഉദ്ഘാടനംചെയ്​തു. ജില്ലാ പ്രസിഡന്റ്​ റോഷൻ എസ്​ രമണൻ അധ്യക്ഷനായി. സെക്രട്ടറി വൈഭവ്​ ചാക്കോ സ്വാഗതം പറഞ്ഞു. സംസ്ഥാന കമ്മിറ്റിയംഗം ആർ രഞ്​ജിത്ത്​, ജില്ലാ വൈസ്​പ്രസിഡന്റുമാരായ അജിത്​ രാജ്​, അനന്ദു അജി, എ അനന്ദു, ജോയിന്റ്​ സെക്രട്ടറി സ‍ൗരവ്​ സുരേഷ്​ തുടങ്ങിയവർ പങ്കെടുത്തു. മുഴുവന്‍ സര്‍വകലാശാലകളിലും സ്ഥിരം വൈസ്ചാന്‍സലര്‍മാരെ നിയമിക്കുക, വിദ്യാര്‍ഥിസംഘടനാ സ്വാതന്ത്ര്യം ഉറപ്പാക്കുക, കോളേജ് ഹോസ്​റ്റലുകളില്‍ വിദ്യാര്‍ഥികളുടെ ജനാധിപത്യ വേദികള്‍ ഉറപ്പാക്കുക, പൊതുവിദ്യാഭ്യാസ മേഖലയിലും ഉന്നതവിദ്യാഭ്യാസ മേഖലയിലും വിദ്യാര്‍ഥി അവകാശരേഖ പ്രഖ്യാപിക്കുക, മുടങ്ങിക്കിടക്കുന്ന ഫെല്ലോഷിപ്പുകളും സ്​കോളര്‍ഷിപ്പുകളും ഉടന്‍ വിതരണംചെയ്യുക, വിദ്യാഭ്യാസസ്ഥാപനങ്ങളിൽ വിദ്യാര്‍ഥികള്‍ക്ക്‌ ഇന്‍ഷുറന്‍സ്, വെല്‍ഫെയര്‍ ഫണ്ട് നടപ്പാക്കുക തുടങ്ങിയ 60 ആവശ്യങ്ങളാണ്‌ എസ്‌എഫ്‌ഐ ഉന്നയിച്ചത്​.