വിജയപാലമേറാൻ തൈക്കാട്ടുശേരി

ചേർത്തല

എൽഡിഎഫിന്‌ കരുത്തുറ്റ ജനകീയ അടിത്തറയുള്ള തൈക്കാട്ടുശേരി വർധിത സീറ്റുകളോടെ ഭരണത്തുടർച്ച ഉറപ്പാക്കിയാണ്‌ നേതാക്കളും പ്രവർത്തകരും പ്രചാരണം തുടരുന്നത്‌. പെരുന്പളം, അരൂക്കുറ്റി, പാണാവള്ളി, തൈക്കാട്ടുശേരി, ചേന്നംപള്ളിപ്പുറം പഞ്ചായത്തുകൾ ഉൾക്കൊള്ളുന്നതാണ്‌ ബ്ലോക്ക്‌ പഞ്ചായത്ത്‌. നിലവിലെ ഭരണസമിതിയിലെ 13ൽ എൽഡിഎഫ്‌ – 10, യുഡിഎഫ്‌ – മൂന്ന്‌ എന്നിങ്ങനെയാണ്‌ കക്ഷിനില. ഇത്തവണ ആകെ ഡിവഷൻ 14. ​സംസ്ഥാന സർക്കാരും ത്രിതല പഞ്ചായത്ത്‌ സ്ഥാപനങ്ങളും എത്തിച്ച സമാനതകളില്ലാത്ത വികസനവും ക്ഷേമവും വിഷയമാക്കിയാണ്‌ എൽഡിഎഫ്‌ വോട്ട്‌ അഭ്യർഥിക്കുന്നത്‌. നേരിട്ട്‌ ഇവിടെ നടപ്പാക്കിയ ശതകോടികളുടെ വികസനപദ്ധതികൾ സംസ്ഥാനശ്രദ്ധ ആകർഷിച്ചവയായി. ന‍ൂറുകോടി ചെലവിട്ട്‌ പൂർത്തിയാക്കിയ പെരുന്പളം പാലവും അതിനടുത്ത്‌ തുക ചെലവിൽ നിർമാണം അന്തിമഘട്ടത്തിൽ എത്തിയ മാക്കേക്കടവ്‌–നേരേകടവ്‌ പാലവും ബ്ലോക്കിൽ നടന്ന വികസനത്തിൽ ചരിത്രമുന്നേറ്റം സൃഷ്‌ടിക്കുന്നതാകും. ഇരു പാലങ്ങളുടെയും നിർമാണപ്രവർത്തനങ്ങൾക്ക്‌ വേഗം കൂട്ടാൻ തൈക്കാട്ടുശേരി ബ്ലോക്കിന്റെ കൃത്യമായ ഇടപെടലുകളുണ്ടായി. പെരുമ്പളം പാലം നിർമാണത്തിൽ, ടെൻഡർ നടപടികളുടെ ഭാഗമായി ചിലർ നിർമാണം മനപ്പൂർവം മുടക്കുന്ന സ്ഥിതിയുണ്ടായപ്പോൾ അതിനെതിരെ കേസിൽ എൽഡിഎഫിന്റെ ബ്ലോക്ക്‌ പഞ്ചായത്തംഗങ്ങളടക്കം കക്ഷിചേർന്നു. കഴിഞ്ഞ കാലങ്ങളിലെ വികസനപ്രവർത്തനങ്ങളുടെ ഭാഗമായും സാമൂഹ്യവിഷയങ്ങളിലെ ഇടപെടലും കാരണം വലിയ സ്വീകാര്യയാണ്‌ എൽഡിഎ-ഫിന്റെ ജനകീയ സ്ഥാനാർഥികൾക്ക്‌ ലഭിക്കുന്നത്‌. ​ അങ്കണവാടികളിൽ ശുദ്ധജലം ഉറപ്പാക്കാൻ ജലശുദ്ധീകരണി എത്തിച്ചതും ആരോഗ്യകേന്ദ്രങ്ങളിലും ബ്ലോക്ക്‌ ഓഫീസിന്‌ മുന്നിലും വാട്ടർ കിയോസ്‌ക്‌ സ്ഥാപിച്ചതും പള്ളിപ്പുറത്തെയും അരൂക്കുറ്റിയിലെയും മാട്ടേൽ തുരുത്തിൽ കായലിലൂടെ കുഴൽ സ്ഥാപിച്ച്‌ കുടിവെള്ളം എത്തിച്ചതും ശ്രദ്ധേയമായി. ആരോഗ്യകേന്ദ്രങ്ങളുടെ അടിസ്ഥാനസ‍ൗകര്യ വികസനത്തിനും ചികിത്സാസ‍ൗകര്യം മെച്ചമാക്കാനും ബ്ലോക്ക്‌ പഞ്ചായത്തിന്‌ സാധിച്ചു. ആപത്തിൽ സഹായഹസ്‌തം നീട്ടാനും രക്ഷാപ്രവർത്തനത്തിനും പരിശീലനം സിദ്ധിച്ച വളന്റിയർസേനയെ തയ്യാറാക്കിയതും ഭരണനേട്ടമായി.