മീന്‍പിടിത്ത ബോട്ടിൽ കപ്പൽ ഇടിച്ചു

കൊല്ലം ​

ശക്തികുളങ്ങരയിൽനിന്ന് ആറു തൊഴിലാളികളുമായി മീന്‍പിടിത്തത്തിനുപോയ ബോട്ടിൽ കപ്പൽ ഇടിച്ചു. അരുൾ അരുവി എന്ന ബോട്ടിൽ ശനിയാഴ്ച രാവിലെയാണ് കപ്പൽ ഇടിച്ചത്. ശക്തികുളങ്ങര സ്വദേശി ജോസ് മാർട്ടിന്റെ ഉടമസ്ഥതയിലുള്ള ബോട്ടാണിത്. ഇടിയുടെ ആഘാതത്തിൽ ഒരു മത്സ്യത്തൊഴിലാളി കടലിലേക്ക് തെറിച്ചുവീണു. മറ്റുള്ളവർ ചേർന്ന് കയര്‍ എറിഞ്ഞുകൊടുത്തു ഇയാളെ രക്ഷപ്പെടുത്തുകയായിരുന്നു. അറബിക്കടലിൽ ആലപ്പുഴ തോട്ടപ്പള്ളിക്ക് 55 നോട്ടിക്കൽ മൈൽ പടിഞ്ഞാറ് മാറിയാണ് അപകടമുണ്ടായത്. മേഖന എനർജി എന്ന് പേരുള്ള കപ്പലാണ് ബോട്ടിൽ ഇടിച്ചതെന്ന് മത്സ്യത്തൊഴിലാളികൾ പറഞ്ഞു. ബംഗ്ലാദേശ് കപ്പലാണ് ഇതെന്ന് സൂചനയുണ്ട്. വാട്ടർ പമ്പ് കേടായതിനെത്തുടർന്ന് ബോട്ട് ആങ്കർ ചെയ്തുകൊണ്ട് ജീവനക്കാർ അറ്റകുറ്റപ്പണികൾ ചെയ്തുവരവെയാണ് കപ്പൽ ഇടിച്ചത്. കപ്പൽ നിർത്താതെ തെക്ക് ദിശയിലേക്ക് പോയതായും മത്സ്യത്തൊഴിലാളികൾ പറഞ്ഞു. അപകടത്തെ തുടർന്ന് മീന്‍പിടിത്ത പ്രവർത്തനങ്ങൾ നിർത്തി ഞായറാഴ്ച പുലർച്ചയോടെ ബോട്ട് നീണ്ടകര ഹാർബറിൽ മടങ്ങിയെത്തി. നീണ്ടകര കോസ്റ്റൽ പൊലീസ് സ്റ്റേഷനിൽ സംഭവം റിപ്പോർട്ട് ചെയ്തു. ഏകദേശം 10 ലക്ഷം രൂപയുടെ നാശനഷ്ടം ഉണ്ടായതായി മത്സ്യത്തൊഴിലാളികൾ പരാതിയില്‍ പറയുന്നു. നീണ്ടകര കോസ്റ്റൽ പൊലീസ് കേസ് രജിസ്റ്റർചെയ്ത് തുടർനടപടികൾ സ്വീകരിച്ചിട്ടുണ്ട്.