സർക്കാർ ഒപ്പമുണ്ട്‌ ഞങ്ങൾ സന്തുഷ്ടരാണ്‌

കൊല്ലം

ഓയിൽപാമിലെ (ഏരൂർ ഓയിൽ ഇന്ത്യ ലിമിറ്റഡ്‌) തൊഴിലാളികളും ജീവനക്കാരും സന്തുഷ്ടരാണ്‌. കാരണം മറ്റൊന്നുമല്ല, സ്ഥാപനം മികച്ച നിലയിൽ പ്രവർത്തിക്കുന്നു, ശന്പളം കൃത്യമായി കിട്ടുന്നു. അങ്ങനെ മികവിന്റെ പാതയിലാണ്‌ ഇ‍ൗ പൊതുമേഖലാ സ്ഥാപനവും. അഞ്ചൽ ഏരൂരിലെ ഓയിൽപാമിന്റെയും എണ്ണപ്പനത്തോട്ടങ്ങളുടെയും ഇന്നത്തെ മെച്ചപ്പെട്ട അവസ്ഥ തൊഴിലാളികളുടെയും ജീവനക്കാരുടെയും വാക്കുകളിൽ വ്യക്തം. ‘ജീവനക്കാരുടെ പുതിയ ശന്പളപരിഷ്‌കരണം നിലവിൽവന്നു. തൊഴിലാളികളുടെ പുതിയ ശന്പള പരിഷ്‌കരണത്തിനുള്ള ചർച്ചകളും തുടങ്ങി. തെരഞ്ഞെടുപ്പ്‌ പെരുമാറ്റച്ചട്ടം കഴിഞ്ഞാൽ നടപടി പൂർണമാകും. അതുവരെ തൊഴിലാളികൾക്ക്‌ ഇടക്കാലാശ്വാസവും നൽകുന്നു. സർക്കാരിന്റെ സഹായങ്ങളും ഇടപെടലുകളും മികച്ച പ്രവർത്തനങ്ങൾക്ക്‌ ഒരു കാരണമാണ്‌’– ഓയിൽപാമിലെ ജീവനക്കാരായ ജി രാജീവും വിജു ബി ചന്ദ്രനും തൊഴിലാളികളായ ജിനു, സുനിൽ ബേബി, ചിത്രലേഖ എന്നിവരും ചൂണ്ടിക്കാട്ടുന്നു. ‘ തുടർച്ചയായി ലാഭത്തിലാണിപ്പോൾ. എണ്ണപ്പനയുടെ റീ പ്ലാന്റ്‌ നടക്കുന്നതിനാൽ പഴത്തിന്‌ കുറവുണ്ട്‌. എന്നാൽ, എണ്ണയ്‌ക്ക്‌ നല്ല വില ലഭിച്ചതിനാൽ ലാഭത്തിൽ കുറവുണ്ടായില്ല’– പ്രൊഡക്‌ഷൻ സൂപ്പർവൈസർ അജേഷ്‌ പറഞ്ഞു. ഏരൂർ, കുളത്തൂപ്പുഴ, ചിതറ എന്നിവിടങ്ങളിലെ തോട്ടങ്ങളിലായി 10000 ഏക്കറിലാണ്‌ എണ്ണപ്പനക്കൃഷി. 7000 ടൺ വരെയാണ്‌ ശരാശരി ഉൽപ്പാദനം. റീപ്ലാന്റ്‌ചെയ്‌ത എണ്ണപ്പന കായ്‌ഫലം തന്നുതുടങ്ങുന്പോൾ ഉൽപ്പാദനത്തിൽ കുതിച്ചുചാട്ടം ഉണ്ടാകും. കർഷകരും എണ്ണപ്പനക്കൃഷിയിൽ ഏർപ്പെട്ടിട്ടുണ്ട്‌. അവരിൽനിന്നു പഴം ഓയിൽപാം വാങ്ങുന്നുണ്ട്‌. ഫാക്ടറിയിൽ രണ്ടുതരം എണ്ണയാണ്‌ ഉൽപ്പാദിപ്പിക്കുന്നത്‌. ഒന്ന്‌ പഴത്തിന്റെ തൊണ്ടിൽനിന്ന്‌ പാമോയിലും മറ്റൊന്ന്‌ കുരുവിൽനിന്ന്‌ കർണൽ ഓയിലും. ഇവിടെ എണ്ണൂറോളം തൊഴിലാളികളും നൂറ്റന്പതോളം ഓഫീസേഴ്‌സും ജീവനക്കാരും ജോലിചെയ്യുന്നു.