കൊല്ലത്തിന്‌ നിവർന്നുനിൽക്കാം 
കശുവണ്ടിയിലൂടെ

കൊല്ലം

കശുവണ്ടിത്തൊഴിലാളികളുടെ ജീവിതം ഒരു ഓർമപ്പെടുത്തലാണ്. ശരിയായ രാഷ്ട്രീയ ഇച്ഛാശക്തിയും ജനപക്ഷത്ത് നിന്നുള്ള സർക്കാർ ഇടപെടലും സാധാരണക്കാരായ ജനവിഭാഗത്തിന്റെ അതിജീവനത്തെയും ഭാവിയെയും എത്രത്തോളം ക്രിയാത്മകമായി സ്വാധീനിക്കാം എന്നതിന്റെ വ്യക്തമായ ഉദാഹരണം. അടഞ്ഞ ഫാക്ടറികളുടെയും നിരാശാജനകമായ ഭാവിയുടെയും നാളുകളിൽ നിന്ന്, തങ്ങളുടെ മക്കൾ ഡോക്ടർമാരും എൻജിനിയർമാരും ആകുന്നതിനെക്കുറിച്ച് അഭിമാനത്തോടെ സംസാരിക്കുന്ന അമ്മമാരുടെ കാലത്തേക്ക് കൊല്ലത്തെ കശുവണ്ടി മേഖല മാറിയിരിക്കുന്നു. ഈ മാറ്റത്തിന് നേതൃത്വമേകിയ കശുവണ്ടി വികസന കോർപറേഷൻ ചെയർമാൻ എസ് ജയമോഹനുമായി ദേശാഭിമാനി കൊല്ലം ബ്യൂറോ ചീഫ്‌ ജയൻ ഇടയ്‌ക്കാട്‌ നടത്തിയ കൂടിക്കാഴ്ച...​പ്രതിസന്ധിയുടെ യഥാർഥ 
കാരണം ? ​കശുവണ്ടി വ്യവസായത്തെ തകർത്തത്‌ കേന്ദ്രത്തിന്റെ നയപരമായ പിഴവും സംസ്ഥാനം ഭരിച്ച യുഡിഎഫ് സർക്കാരിന്റെ അനാസ്ഥയുമാണ്. 2016 ൽ എൽഡിഎഫ്‌ സർക്കാർ അധികാരത്തിൽ വരുന്നതിനു തൊട്ടുമുമ്പുള്ള കാലഘട്ടം മേഖലയ്ക്ക് ഇരുണ്ട അധ്യായമായിരുന്നു. പൊതുമേഖലാ സ്ഥാപനങ്ങളായ കാഷ്യൂ കോർപറേഷൻ ഉൾപ്പെടെയുള്ള ഫാക്ടറികൾ 18 മാസം അടഞ്ഞുകിടന്നു. ​ പ്രതിസന്ധികൾ മറികടന്നത്‌ ? ​കേന്ദ്ര സർക്കാർ നടപ്പാക്കിയ പല നയങ്ങളും കേരളത്തിലെ കശുവണ്ടി വ്യവസായത്തിന് കനത്ത പ്രഹരമേൽപ്പിച്ചു. ഇറക്കുമതി തോട്ടണ്ടിക്ക് 9.33 ശതമാനം നികുതി ഏർപ്പെടുത്തിയത്‌ തോട്ടണ്ടിയുടെ വില വർധിച്ചു. ഇത് ഉൽപ്പാദനച്ചെലവ് ക്രമാതീതമായി കൂട്ടി. ഗുണനിലവാരം കുറഞ്ഞ പരിപ്പ് ഇറക്കുമതി ഉദാരമാക്കി. കോവിഡ് കാലത്ത് വായ്പകൾക്ക് മൊറട്ടോറിയം നൽകാതിരുന്നതിനാൽ വായ്പയെടുത്ത് വ്യവസായം നടത്തിയിരുന്നവർ തിരിച്ചടവ് മുടങ്ങി കടക്കെണിയിലായി. സർഫാസി നിയമപ്രകാരം ഫാക്ടറികൾ ജപ്തി ഭീഷണിയിലായി. തൊഴിലാളികളിൽ നിന്ന് പിരിച്ചെടുത്ത 80,000 ലക്ഷം കോടി മിച്ചമുണ്ടായിട്ടും കോവിഡ്‌ കാലത്ത്‌ ഇഎസ്ഐ ആനുകൂല്യങ്ങൾ നൽകിയില്ല. ഈ പ്രതിസന്ധി ഘട്ടത്തിലാണ് എൽഡിഎഫ് സർക്കാർ നിർണായക ഇടപെടലുകൾ നടത്തിയത്‌. അടഞ്ഞ ഫാക്ടറികൾ തുറക്കാനും തൊഴിലാളികളുടെ ജീവിതം തിരികെപ്പിടിക്കാനും ലക്ഷ്യമിട്ട് സർക്കാർ സമഗ്ര പദ്ധതികൾ ആവിഷ്കരിച്ചു. മുഖ്യമന്ത്രിയും വ്യവസായ മന്ത്രിയും ഉറച്ച പിന്തുണ നൽകി. കേന്ദ്രം സൃഷ്‌ടിക്കുന്ന സാന്പത്തിക ഞെരുക്കത്തിനിടയിലും വ്യവസായത്തിന്റെ സംരക്ഷണത്തിന്‌ ധനമന്ത്രി കെഎൻ ബാലഗോപാൽ മുൻകൈയെടുത്തു. ​​നിലവിലുള്ള ഭരണസമിതിയുടെ നേട്ടങ്ങൾ? ​തൊഴിലിന്റെ മഹത്വവും സാമൂഹിക അംഗീകാരവും തിരികെവന്നത് തൊഴിലാളികളുടെ മനോഭാവത്തിൽ വലിയ മാറ്റമുണ്ടാക്കി. തൊഴിലും ആനുകൂല്യങ്ങളും മുടങ്ങാതെ കിട്ടുമെന്ന വിശ്വാസം തൊഴിലാളികൾക്കിടയിൽ വളർത്താൻ കശുവണ്ടി വികസന കോർപറേഷനും കാപ്പക്സിനും കഴിഞ്ഞു. ​​ഇഎസ്ഐ മെഡിക്കൽ കോളേജുകളിൽ എത്ര തൊഴിലാളികളുടെ മക്കൾ എംബിബിഎസിന്‌ പ്രവേശിച്ചു ? ​ഇഎസ്ഐ മെഡിക്കൽ കോളേജുകളിൽ തൊഴിലാളികളുടെ മക്കൾക്ക് സംവരണം ചെയ്ത എംബിബിഎസ് സീറ്റുകളെക്കുറിച്ച് അവരെ ബോധവൽക്കരിച്ചു. മിടുക്കരായ വിദ്യാർഥികൾക്ക് സർക്കാർ സഹായത്തോടെ പരിശീലനം നൽകി. 26 കുട്ടികൾ എംബിബിഎസിന്‌ പ്രവേശനം നേടി. ​പൊതുമേഖലയിൽ എത്ര തൊഴിലാളികൾക്ക് അധികജോലി നൽകി ? ​പൊതുമേഖലയിലെ വിവിധ ഫാക്ടറികളിലായി 6412 പേർക്ക് പുതിയതായും മുമ്പ് ജോലി ഉപേക്ഷിച്ച 1600 പേരെ പുനർനിയമിച്ചു.  സ്വകാര്യ ഫാക്ടറികൾ 
തുറക്കാനെടുത്ത നടപടി ? സ്വകാര്യ ഫാക്ടറികളെ കൈപിടിച്ചുയർത്താൻ ചരിത്രത്തിലാദ്യമായി 30 കോടിയുടെ പദ്ധതി സർക്കാർ ആവിഷ്കരിച്ചു. ഒരു ഫാക്ടറി തുറന്നു പ്രവർത്തിപ്പിക്കുന്നതിന് 10ലക്ഷം വരെ നൽകുന്ന പദ്ധതിയിലൂടെ 96 സംരംഭകർ വീണ്ടും വ്യവസായം തുടങ്ങി. ​മൂല്യവർധിത വിഭാഗത്തിൽ എത്രതരം ഉൽപ്പന്നങ്ങൾ 
പുറത്തിറക്കി ? ​കശുമാങ്ങയിൽ നിന്നുള്ള സോഡ, കാഷ്യൂ സൂപ്പ്, ഐസ്ക്രീം പൗഡർ പോലുള്ള മൂല്യവർധിത ഉൽപ്പന്നങ്ങൾ അവതരിപ്പിച്ചു. ​​പുരസ്കാരങ്ങൾ ? ​ഗോവയിൽ നടന്ന അന്താരാഷ്ട്ര കാഷ്യൂ കോൺക്ലേവിൽ, വിയറ്റ്നാം പോലുള്ള വൻകിട മത്സരാർഥികളെ പിന്തള്ളി കാഷ്യൂ കോർപറേഷൻ പുരസ്കാരം നേടി. ​പൂർണ യന്ത്രവൽക്കരണം ? കേരള കശുവണ്ടിയുടെ തനത് രുചിക്ക് കാരണമായ ‘ചുട്ട് തല്ലി' എടുക്കുന്ന പരമ്പരാഗത രീതി നിലനിർത്തി ഷെല്ലിങ് പോലുള്ള ഘട്ടങ്ങളിൽ ഭാഗിക യന്ത്രവൽക്കരണം നടപ്പാക്കി. മുമ്പ് ഒരു തൊഴിലാളി പരമ്പരാഗത രീതിയിൽ ഒരു ദിവസം എട്ട് കിലോ സംസ്കരിക്കുമ്പോൾ ഏകദേശം 300 രൂപയാണ്‌ ലഭിച്ചിരുന്നു. കട്ടിങ് മെഷീൻ വന്നതോടെ ഉല്‍പ്പാദനക്ഷമത 15 കിലോ വരെയായി. കൂലിയും മറ്റ് ആനുകൂല്യങ്ങളും ചേർത്ത് ദിവസേന 1100 -നും 1600-നും ഇടയിൽ വരുമാനം ലഭിക്കാൻ തുടങ്ങി. ​ഗ്രാറ്റുവിറ്റി വിതരണത്തിൽ 
കുടിശ്ശിക ? ​നിലവിൽ കുടിശ്ശികയില്ല. ഒരു സർക്കാർ അഞ്ചു വർഷം ഭരിച്ച് 10 വർഷത്തെ ഗ്രാറ്റുവിറ്റി കുടിശ്ശിക കൊടുത്തു. യുഡിഎഫ് സർക്കാരിന്റെ അഞ്ചു വർഷത്തെ കുടിശ്ശികയും നൽകി. ​തൊഴിൽ ഇല്ലാത്ത ദിനങ്ങളിൽ തൊഴിലാളികളുടെ വരുമാനം? ​തൊഴിലില്ലാത്ത സമയങ്ങളിൽ തൊഴിലാളികൾക്ക് മറ്റ് വരുമാന മാർഗങ്ങൾ ഉറപ്പാക്കുന്ന ‘ലേബർ ബാങ്ക്' പോലുള്ള നൂതന ആശയങ്ങൾ പരിഗണനയിലാണ്. പാലിയേറ്റീവ് കെയർ, പാചകം, തയ്യൽ തുടങ്ങിയ മേഖലകളിൽ പരിശീലനം നൽകി തൊഴിലാളികളെ സജ്ജരാക്കുന്നു.