ചേർത്തുനിർത്തി ചെങ്ങന്നൂർ

കെ സുരേഷ്‌കുമാര്‍

മാന്നാര്‍

തിരുവന്‍വണ്ടൂര്‍, പാണ്ടനാട്, മുളക്കുഴ, വെണ്‍മണി, ചെറിയനാട്, ആല, പുലിയൂര്‍, ബുധനൂര്‍ പ‍ഞ്ചായത്തുകള്‍ ചേര്‍ന്നതാണ് ചെങ്ങന്നൂര്‍ ബ്ലോക്ക് പഞ്ചായത്ത്. കഴിഞ്ഞ കാലങ്ങളിൽ ഏറ്റെടുത്ത്‌ നടപ്പാക്കിയ വികസനങ്ങൾ തടസമില്ലാതെ തുടരണമെന്ന ഉറച്ച നിലപാടിലാണ് നാട്ടുകാര്‍. പ്രചാരണത്തില്‍ ഓരോ ഘട്ടത്തിലും കളംനിറ‍ഞ്ഞ എല്‍ഡിഎഫ് സ്ഥാനാര്‍ഥികളെ ആവേശപൂര്‍വം സ്വീകരിച്ചാണ്‌ നാട്‌ ചേർത്തുനിർത്തുന്നത്‌. ഹാരമണിയിച്ചും ഷാളണിയിച്ചുമാണ് പാതയോരങ്ങളില്‍ പ്രവര്‍ത്തകര്‍ 14 ഡിവിഷനിലെയും സ്ഥാനാര്‍ഥികളെ സ്വീകരിച്ചത്. വീടുകൾ കയറിയാണ് പ്രധാന പ്രചാരണം. സര്‍ക്കാരിന്റെയും ബ്ലോക്ക്‌ പഞ്ചായത്തിന്റെയും വികസനനേട്ടങ്ങൾ എണ്ണിപ്പറഞ്ഞാണ്‌ സ്ഥാനാര്‍ഥികളും പ്രവര്‍ത്തകരും വോട്ടുതേടുന്നത്. ആരോഗ്യം, കാർഷികം, വിദ്യാഭ്യാസം മേഖലകൾക്ക്‌ പ്രാധാന്യം നൽകിയ ജനകീയ പ്രവർത്തനങ്ങളിലൂടെയാണ്‌ ചെങ്ങന്നൂർ ബ്ലോക്ക്‌ പഞ്ചായത്ത്‌ ശ്രദ്ധേയമായത്‌. സാമൂഹികാരോഗ്യകേന്ദ്രം, സെക്കന്‍ഡറി പാലിയേറ്റീവ്, വയോജനകേന്ദ്രം എന്നിവയ്‌ക്ക്‌ മികച്ച സ‍ൗകര്യങ്ങൾ ഒരുക്കി. മരുന്നുകളും വാങ്ങി നൽകി. പാണ്ടനാട് സിഎച്ച്സിയിൽ വാട്ടര്‍ വെന്റിങ് യന്ത്രം സ്ഥാപിച്ചു. കൊല്ലകടവ്‌ മാര്‍ക്കറ്റിലെ മാലിന്യപ്രശ്നം പരിഹരിക്കാൻ എസ്ടിപി പ്ലാന്റ് നിര്‍മിച്ചു. ഒന്നരക്കോടി രൂപ ചെലവിൽ പട്ടികജാതി വിദ്യാര്‍ഥികള്‍ക്ക് പഠനമുറികള്‍ നിര്‍മിച്ചുനല്‍കി. ഹരിതകര്‍മസേനയ്‌ക്ക്‌ അധികവരുമാനം ലഭിക്കാൻ കാറ്ററിങ് യൂണിറ്റ് രൂപീകരിച്ചു. ചെറിയനാട് ചെറുവല്ലൂരും തിരുവന്‍വണ്ടൂര്‍ വനവാതുക്കലും കുടിവെള്ള പദ്ധതി നടപ്പാക്കി. 252 കുടുംബത്തിന്‌ വീട് നിര്‍മാണം പൂര്‍ത്തിയാക്കി. 160 വീടിന്റെ നിര്‍മാണം അവസാനഘട്ടത്തിലാണ്. 26 ഭിന്നശേഷിക്കാര്‍ക്ക് മുച്ചക്രവാഹനം നല്‍കി. സര്‍ക്കാര്‍–-എയ്ഡഡ് സ്‌കൂളുകളില്‍ ആർഒ പ്ലാന്റിന്റെ നിര്‍മാണവും പുരോഗമിക്കുന്നു. സ്‌കൂളുകളിലും അങ്കണവാടികളിലും പിഎച്ച്സികളിലും ശുചിമുറികള്‍ നിര്‍മിച്ചു. എസ്‌സി, ജനറല്‍, വനിത ഗ്രൂപ്പുകള്‍ക്ക് ഗ്രൂപ്പ് കൃഷിക്കും പച്ചക്കറിക്കൃഷിക്കും ധനസഹായം നല്‍കുന്നു. ‘രുചി കപ്പ’ പ്രോസസിങ് യൂണിറ്റ് രൂപീകരിച്ച് കപ്പയില്‍നിന്ന്‌ മൂല്യവര്‍ധിത ഉല്‍പ്പന്നങ്ങള്‍ നിര്‍മിക്കാൻ വനിതാ ഗ്രൂപ്പുകള്‍ക്ക് ധനസഹായം നല്‍കി. ബ്രെയിലി ലിപി സാക്ഷരത ജില്ലയില്‍ ആദ്യമായി നടപ്പാക്കിയത്‌ ചെങ്ങന്നൂര്‍ ബ്ലോക്കിലാണ്‌. എണ്ണിയാല്‍ തീരാത്ത വികസനനേട്ടങ്ങള്‍ ആത്മവിശ്വാസത്തോടെ മുന്നോട്ടുവച്ചാണ് എല്‍ഡിഎഫ് പ്രചാരണം. ​13 ഡിവിഷനുകളില്‍ എല്‍ഡിഎഫ് ഏഴ്‌, യുഡിഎഫ് മൂന്ന്‌, എൻഡിഎ മൂന്ന്‌ എന്നിങ്ങനെയാണ് നിലവിലെ കക്ഷിനില. ഇത്തവണ മുതൽ 14 ഡിവിഷനാണ്‌.