സംസ്ഥാനതല ഉദ്‌ഘാടനം കൊച്ചിയിൽ

കൊച്ചി

ലോക എയ്‌ഡ്‌സ്‌ ദിനാചരണത്തിന്റെ സംസ്ഥാനതല ഉദ്‌ഘാടനം ഡിസംബർ ഒന്നിന്‌ കൊച്ചിയിൽ നടക്കുമെന്ന് കേരള സ്‌റ്റേറ്റ്‌ എയ്‌ഡ്‌സ്‌ കൺട്രോൾ സൊസൈറ്റി ജോയിന്റ്‌ ഡയറക്ടർ രശ്‌മി മാധവൻ വാർത്താസമ്മേളനത്തിൽ പറഞ്ഞു. കഴിഞ്ഞ മൂന്നുവർഷത്തിനിടെ സംസ്ഥാനത്ത്‌ 4477 പേര്‍ക്ക് പുതിയതായി എച്ച്‌ഐവി ബാധ കണ്ടെത്തി. അതിൽ 3393 പുരുഷന്മാരും 1065 സ്‌ത്രീകളും 19 ട്രാന്‍സ്ജെന്‍ഡറുകളും ഉണ്ട്. സ്‌ത്രീകളിൽ 90 ഗർഭിണികളുണ്ടായിരുന്നു. എറണാകുളത്താണ്‌ കൂടുതൽ എച്ച്‌ഐവി ബാധിതര്‍. മൂന്നുവർഷത്തിനിടെ എറണാകുളത്ത്‌ എച്ച്‌ഐവി ബാധയുള്ള 850 പേരെ കണ്ടെത്തി.

അതിഥിത്തൊഴിലാളികൾ കൂടുതലായി എത്തുന്നതും മയക്കുമരുന്ന് ഉപയോഗം വർധിക്കുന്നതും ഇതിന്‌ കാരണമാകുന്നുണ്ട്‌.

ദിനാചരണം ഡിസംബർ ഒന്നിന്‌ രാവിലെ 10ന്‌ ചാവറ കൾച്ചറൽ സെന്ററിൽ ആരോഗ്യവകുപ്പ്‌ ഡയറക്ടർ ഡോ. കെ ജെ റീന ഉദ്‌ഘാടനം ചെയ്യും. കലക്ടർ ജി പ്രിയങ്ക അധ്യക്ഷയാകും.

ഡോ. കെ വി വിശ്വനാഥൻ വിശിഷ്ടാതിഥിയാകും. ഞായര്‍ വൈകിട്ട്‌ അഞ്ചിന്‌ ഫോർട്ട്‌കൊച്ചി വാസ്‌കോഡഗാമ സ്‌ക്വയറിൽ ഫ്ലാഷ്‌ മോബും 5.30ന്‌ ബോധവൽക്കരണ കലാപരിപാടികളും വൈകിട്ട്‌ ആറിന്‌ ദീപം തെളിക്കലും നടക്കും. തിങ്കള്‍ രാവിലെ എട്ടിന്‌ ദർബാർ ഹാൾ ഗ്ര‍ൗണ്ടിൽനിന്ന്‌ ആരംഭിക്കുന്ന ബോധവൽക്കരണ റാലി ജില്ലാ ജഡ്‌ജി അനിൽ കെ ഭാസ്‌കർ ഫ്ലാഗ്‌ ഓഫ്‌ ചെയ്യും.

അഡീ. ജില്ലാ മെഡിക്കൽ ഓഫീസർ കെ കെ ആശ, ജില്ലാ എയ്‌ഡ്‌സ്‌ നിയന്ത്രണ ഓഫീസർ ഡോ. ടിമ്മി റോഡ്രിഗസ്‌ ജോർജ്, ഡെപ്യൂട്ടി ഡിഎംഒ ആരതി കൃഷ്‌ണൻ, ജില്ലാ മാസ്‌ മീഡിയ ഓഫീസർ ജി രജനി എന്നിവരും വാർത്താസമ്മേളനത്തിൽ പങ്കെടുത്തു.

പോസ്റ്റര്‍ പ്രകാശിപ്പിച്ചു

ലോക എയ്ഡ്‌സ് ദിനാചരണത്തിന്റെ സംസ്ഥാനതല സമ്മേളനത്തോടനുബന്ധിച്ച് ആരോഗ്യവകുപ്പ് തയ്യാറാക്കിയ പോസ്റ്ററും വീഡിയോയും കൊച്ചി മെട്രോ റെയില്‍ ലിമിറ്റഡ് മാനേജിങ്‌ ഡയറക്ടര്‍ ലോക്‌നാഥ് ബെഹ്‌റ പ്രകാശിപ്പിച്ചു.

കൊച്ചി മെട്രോ ചീഫ് ജനറല്‍ മാനേജര്‍ ഓപ്പറേഷന്‍സ് ആന്‍ഡ് മെയിന്റനന്‍സ് എ മണികണ്ഠന്‍, സീനിയര്‍ ഡെപ്യൂട്ടി ജനറല്‍ മാനേജര്‍ ഓപ്പറേഷന്‍സ് സായ് കൃഷ്ണ, പബ്ലിക് റിലേഷന്‍സ് ആന്‍ഡ് സോഷ്യല്‍ മീഡിയ വിഭാഗം സീനിയര്‍ ഡെപ്യൂട്ടി ജനറല്‍ മാനേജര്‍ കെ കെ ജയകുമാര്‍, അഡീ. ജില്ലാ മെഡിക്കല്‍ ഓഫീസര്‍ (ആരോഗ്യം) ഡോ. കെ കെ ആശ, കെഎസ്എസിഎസ് ജോയിന്റ് ഡയറക്ടര്‍ രശ്മി മാധവന്‍ എന്നിവര്‍ സംസാരിച്ചു.

എച്ച്‌ഐവി ബാധിതരോട് ഐക്യദാര്‍ഢ്യം പ്രഖ്യാപിക്കുക, ബോധവൽക്കരണം ശക്തമാക്കുക തുടങ്ങിയവ ലക്ഷ്യമിട്ട് നടത്തുന്ന മീഡിയ ക്യാമ്പയിനും തുടക്കം കുറച്ചു.