യാത്രക്കാരിയുടെ
നഷ്‌ടപ്പെട്ട വജ്രവള തിരിച്ചുകിട്ടി

ആലുവ

കേരള ബാങ്ക് ജീവനക്കാരിക്ക് യാത്രയ്ക്കിടെ നഷ്ടപ്പെട്ട ലക്ഷങ്ങൾ വിലമതിക്കുന്ന വജ്രവള കണ്ടെത്തി തിരികെനൽകി ബസ് ജീവനക്കാർ. കേരള ബാങ്ക് പട്ടിമറ്റം ബ്രാഞ്ചിലെ അസിസ്റ്റന്റ് മാനേജർ റൂബിയുടെ വളയാണ് തിരികെ ലഭിച്ചത്.

ബുധൻ ​രാവിലെ അശോകപുരത്തുനിന്ന്‌ ബാങ്കിലേക്കുള്ള യാത്രയ്ക്കിടെ കിഴക്കമ്പലത്തുവച്ച് പട്ടിമറ്റത്തേക്കുള്ള ബസ് മാറിക്കയറിയപ്പോഴാണ് വള നഷ്ടപ്പെട്ട വിവരം റൂബി അറിയുന്നത്‌. കിഴക്കമ്പലത്തെത്തി പരിചയക്കാരായ വഫ ബസിലെ ജീവനക്കാരെ വിവരം അറിയിച്ചു. ​ഉടനെ ഇവർ റൂബി അശോകപുരത്തുനിന്ന്‌ ആദ്യം യാത്രചെയ്ത ‘ഡെന്നി' ബസിലെ ജീവനക്കാരുമായി ബന്ധപ്പെട്ടു. പരിശോധനയിൽ ബസിനുള്ളിൽനിന്ന്‌ വള കണ്ടത്തി. ​

തൃപ്പൂണിത്തുറയിൽനിന്നുള്ള മടക്കയാത്രയിൽ കൊച്ചിൻ ബാങ്ക് ജങ്‌ഷനിൽവച്ച് റൂബിയുടെ ഭർത്താവ് എസ് എ എം കമാലിന് ബസ് ജീവനക്കാർ വള കൈമാറി. ഡെന്നി ബസിലെ കണ്ടക്ടർ ബെന്നി, ചെക്കർ ജോയി ഡ്രൈവർ തമ്പി എന്നിവരെ പൗരാവലിയുടെ നേതൃത്വത്തിൽ അനുമോദിച്ചു.