എറണാകുളം നഗരത്തിന്‌ ഓണസമ്മാനം ; കെഎസ്‌ആർടിസി 
സ്റ്റാൻഡിന്‌ 12 കോടി

കൊച്ചി

കാരിക്കാമുറിയിൽ നിർമിക്കുന്ന പുതിയ കെഎസ്‌ആർടിസി ബസ്‌ സ്‌റ്റാൻഡിനായി സർക്കാർ 12 കോടി രൂപ അനുവദിക്കുമെന്ന്‌ ധനമന്ത്രി കെ എൻ ബാലഗോപാൽ. സ്റ്റാൻഡ് നിർമാണത്തിന്റെ പ്രാരംഭനടപടികള്‍ക്കായി നടത്തിയ സന്ദർശനത്തിലാണ് പ്രഖ്യാപനം. പ്രീഫാബ്‌ മാതൃകയിലുള്ള ബസ്‌ സ്‌റ്റാൻഡ്‌ നിർമാണം ഉടൻ ആരംഭിക്കും. ആദ്യഘട്ടമായാണ്‌ 12 കോടി അനുവദിക്കുക. മറ്റ് ചെലവുകൾകൂടി വരുമ്പോൾ തുക വർധിച്ചേക്കാം. ആവശ്യമായ നടപടികൾ പൂർത്തിയാക്കി പുതിയ ബസ് സ്റ്റാൻഡ് യാഥാർഥ്യമാക്കുമെന്നും അദ്ദേഹം പറഞ്ഞു.

ആകെയുള്ള എട്ട് ഏക്കറിലെ, സൗത്ത് റെയിൽവേ സ്റ്റേഷനോടുചേർന്നുള്ള ഭാഗമായ കാരിക്കാമുറിയിലാണ് സ്റ്റാൻഡ് യാഥാർഥ്യമാകുക. നിലവിലെ സ്റ്റാൻഡിനേക്കാൾ കുറച്ചുകൂടി ഉയരമുള്ള സ്ഥലമാണിത്. റെയിൽവേ സ്റ്റേഷനോട് അടുത്താണെന്ന സൗകര്യമുണ്ടെന്നും മന്ത്രി പറഞ്ഞു.

നിലവിലെ സ്റ്റാൻഡിൽ മഴക്കാലത്ത് വെള്ളം കയറുന്നതടക്കമുള്ള പ്രശ്‌നമുണ്ട്‌. ഇവിടം കാലോചിതമായി പരിഷ്കരിക്കണമെന്ന ആവശ്യം നേരത്തേമുതലുണ്ട്. പുതിയ ബസ്‌ സ്റ്റാൻഡ് നിർമാണത്തിന് സിഎസ്എംഎല്ലുമായി കരാർ ഉണ്ടായിരുന്നെങ്കിലും കാലാവധി കഴിഞ്ഞതിനെ തുടർന്ന് സർക്കാർ നേരിട്ട് പണം അനുവദിക്കാൻ തീരുമാനിക്കുകയായിരുന്നുവെന്നും മന്ത്രി പറഞ്ഞു.

മേയർ എം അനിൽകുമാർ, ടി ജെ വിനോദ്‌ എംഎൽഎ, കെഎസ്ആർടിസി എക്സിക്യൂട്ടീവ് എൻജിനീയർ ഷറഫ് മുഹമ്മദ്, പൊതുമരാമത്ത്‌ കെട്ടിടവിഭാഗം അസിസ്റ്റന്റ് എക്സിക്യൂട്ടീവ് എൻജിനീയർ കെ ആർ ബിനു, കെഎസ്ആർടിസി അസിസ്റ്റന്റ് എൻജിനീയർ ലേഖ, അസിസ്റ്റന്റ് ട്രാൻസ്‌പോർട്ട്‌ ഓഫീസർ എ അജിത്ത്, ജനറൽ കൺട്രോളിങ് ഇൻസ്‌പെക്ടർ ആന്റണി വർഗീസ് എന്നിവരും മന്ത്രിക്കൊപ്പമുണ്ടായിരുന്നു.

രൂപരേഖ ഉടൻ

​പുതിയ ബസ്‌ സ്‌റ്റാൻഡിന്റെ രൂപരേഖ കെഎസ്ആർടിസി ആർക്കിടെക്‌ചർ വിഭാഗവും എൻജിനീയർമാരും ഉൾപ്പെടെചേർന്ന് ഉടൻ പൂർത്തിയാക്കും. തുടർന്ന്‌, അനുമതി ലഭ്യമായാൽ, പൊതുമരാമത്ത്‌ വകുപ്പ്‌ ടെൻഡർ ഉൾപ്പെടെയുള്ള നടപടിക്രമങ്ങളിലേക്ക് കടക്കും. നിർമാണം ആരംഭിച്ചാൽ ആറുമാസത്തിനകം പൂർത്തിയാക്കാനാകുമെന്നും കെഎസ്‌ആർടിസി അധികൃതർ പറയുന്നു. സമീപത്തെ കനാലിൽനിന്ന്‌ വെള്ളം കയറാത്തനിലയിൽ തറനിരപ്പ് ഒരുമീറ്ററോളം ഉയർത്തിയായിരിക്കും നിർമാണം.