ലോകത്തിന് മുന്നില് കേരളം അവതരിപ്പിക്കുന്ന മാതൃകാപ്രസ്ഥാനമാണ് ഐഐപിഡി: അടൂര് ഗോപാലകൃഷ്ണന്
കാസര്കോട്: ലോകത്തിന് മുന്നില് നമ്മുടെ നാട് അവതരിപ്പിക്കുന്ന ഒരു മാതൃക പ്രസ്ഥാനമാണ് ഇന്റര്നാഷണല് ഇന്സ്റ്റിറ്റ്യൂട്ട് ഫോര് പീപ്പിള് വിത്ത് ഡിസബിലിറ്റീസെന്ന് (ഐഐപിഡി) സംവിധായകന് അടൂര് ഗോപാലകൃഷ്ണന്. ഭിന്നശേഷിക്കാരുടെ സമഗ്ര വികസനത്തിനായി തിരുവനന്തപുരം ഡിഫറന്റ് ആര്ട് സെന്ററിന്റെ (ഡിഎസി) നേതൃത്വത്തില് കാസര്കോട് നിർമിക്കുന്ന ഐഐപിഡിയുടെ നിര്മ്മാണോദ്ഘാടന ചടങ്ങില് സംസാരിക്കുകയായിരുന്നു അദ്ദേഹം.
എഴുത്തുകാരൻ ടി പത്മനാഭന്, ഡിഎസി എക്സിക്യൂട്ടീവ് ഡയറക്ടര് ഗോപിനാഥ് മുതുകാട് എന്നിവരും പങ്കെടുത്തു. ലാന്ഡ് വാങ്ങാന് സംഭാവന ചെയ്ത അന്തരിച്ച പ്രൊഫ. എം.കെ ലൂക്കയുടെ ചിത്രത്തിന് മുന്നില് പുഷ്പാര്ച്ചന നടത്തിയാണ് ചടങ്ങുകള് ആരംഭിച്ചത്. ഐഐപിഡിയുടെ നിര്മാണ പ്രവര്ത്തനങ്ങള് നടത്തുന്നത് ഊരാളുങ്കല് സൊസൈറ്റിയാണ്. എഗ്രിമെന്റും ആദ്യഗഡുവും മുതുകാട് ഊരാളുങ്കല് ലേബര് കോണ്ട്രാക്ട് കോ-ഓപ്പറേറ്റീവ് സൊസൈറ്റി ചെയര്മാന് രമേശന് പാലേരിക്ക് കൈമാറി. ഡിഎസി ചെയര്മാനും മുന് ചീഫ് സെക്രട്ടറിയുമായ ജിജി തോംസണ് അദ്ധ്യക്ഷത വഹിച്ചു. ഡബ്ല്യൂഎച്ച്ഒ ഇന്ത്യന് നാഷണല് പ്രൊഫഷണല് ഓഫീസര് ഡോ. മുഹമ്മദ് അഷീല് പദ്ധതി വിശദീകരണം നടത്തി. കാസര്കോട്ജില്ലാ പഞ്ചായത്ത് പ്രസിന്റ് ബേബി ബാലകൃഷ്ണന്, മടിക്കൈ ഗ്രാമപഞ്ചായത്ത് പ്രസിഡന്റ് എസ് പ്രീത, ദാമോദര് ആര്ക്കിടെക്ട് സിഇഒ കെ ദാമോദരന്, മനോജ് ഒറ്റപ്പാലം, തങ്കമ്മ, ശശീന്ദ്രന് മടിക്കൈ തുടങ്ങിയവര് പങ്കെടുത്തു.
തിരുവനന്തപുരം ഡിഎസിയുടെ മാതൃകയില് അന്തര്ദ്ദേശീയ നിലവാരത്തിലുള്ള കലാകായിക പരിശീലന സംവിധാനങ്ങള്, അത്യാധുനിക തെറാപ്പി സൗകര്യങ്ങള്, പേഴ്സണലൈസ്ഡ് അസിസ്റ്റീവ് ഡിവൈസ് യൂണിറ്റുകള്, തൊഴില് പരിശീലന കേന്ദ്രങ്ങള്, മെഡിക്കല് സൗകര്യങ്ങള്, ട്രയിനിംഗ് സെന്ററുകള് തുടങ്ങി വിപുലീകരിച്ച സംവിധാനങ്ങള് കാസര്ഗോഡ് ഐഐപിഡിയില് ഉണ്ടാകും.
100 കോടി രൂപയുടെ പദ്ധതിയാണ് ആസൂത്രണം ചെയ്യുന്നത്. ആദ്യഘട്ട നിര്മാണ പ്രവര്ത്തനങ്ങള് 2026ല് പൂര്ത്തീകരിക്കുവാനാണ് ഉദ്ദേശിക്കുന്നത്. 2029ഓടുകൂടി പദ്ധതി പൂര്ണമായും പ്രവര്ത്തന സജ്ജമാകും. പദ്ധതി പൂര്ത്തിയാകുന്നതോടെ ഇന്ത്യയിലെ ഏറ്റവും വലിയ ഭിന്നശേഷിക്കാര്ക്കുള്ള സ്ഥാപനമായി ഐഐപിഡി മാറും. പദ്ധതി പൂര്ത്തിയാകുന്നതോടെ പ്രതിവര്ഷം 1000 ഭിന്നശേഷിക്കാര്ക്ക് വിവിധ മേഖലകളില് പരിശീലനം നല്കുന്ന രീതിയിലാണ് ക്യാമ്പസ് ക്രമീകരിച്ചിരിക്കുന്നത്.
Tags
Related News
Dont Miss it
0 comments