നേടാത്തതു നേടാൻ

കാസർകോട്‌

പേരിനൊരു ഡിവിഷൻ, പേരിനൊരംഗം എന്നാണ്‌ ജില്ലാ പഞ്ചായത്ത്‌ സിവിൽ സ്‌റ്റേഷനെക്കുറിച്ച്‌ ചോദിച്ചാൽ ജനം പറയുക. ജില്ലാ പഞ്ചായത്ത്‌ രൂപീകരണം മുതൽ ഡിവിഷനിൽ യുഡിഎഫാണ്‌ വിജയിക്കുന്നതെങ്കിലും വിജയിച്ച പ്രതിനിധിയെപ്പോലെ തിരിഞ്ഞുനോക്കാത്ത ഒന്നുണ്ട്‌. വികസനം. മറ്റു ജില്ലാ പഞ്ചായത്ത്‌ ഡിവിഷനുകളെ അപേക്ഷിച്ച്‌ അർഹമായ പദ്ധതികൾപോലും ഡിവിഷനിലേക്കെത്തിക്കാൻ മിക്ക അംഗങ്ങളും താൽപര്യം കാട്ടാറില്ല. ജില്ലാ പഞ്ചായത്തംഗം എന്ന പദവിക്കായിമാത്രം മത്സരിക്കുന്നവരായിമാറി മുസ്ലിംലീഗ്‌ സ്ഥാനാർഥികൾ. ഇത്തവണ ഇ‍ൗ അവസ്ഥയ്‌ക്ക്‌ മാറ്റമുണ്ടാകണമെന്നാണ്‌ വോട്ടർമാർ ആഗ്രഹിക്കുന്നത്‌. നാടിന്റെ ആവശ്യങ്ങളും ജനങ്ങളുടെ പ്രശ്നങ്ങൾക്കും പരിഹാരം കാണാൻ തദ്ദേശ ഭരണത്തിന്റെ ഇടപെടലില്ലാത്ത നാടെന്നു വേണമെങ്കിൽ സിവിൽ സ്‌റ്റേഷൻ ഡിവിഷനെ പറയാം. രാഷ്ട്രീയവേർതിരിവില്ലാതെ വികസനം എത്തിക്കുന്നതിൽ സംസ്ഥാന സർക്കാർ കാട്ടുന്ന ജാഗ്രതയിലാണ്‌ ജനത്തിന്‌ ആശ്വാസം. കലക്ടറേറ്റ്, കോടതി തുടങ്ങി പ്രധാന സർക്കാർ സ്ഥാപനങ്ങളും ജില്ലാപഞ്ചായത്ത്‌ ആസ്ഥാനവും ഇ‍ൗ ഡിവിഷനിലാണ്‌. അത്രയും പ്രാധാന്യമുള്ള, വികസനമെത്തിക്കാൻ ഏറെ എളുപ്പമുള്ള ഡിവിഷനിൽ ജില്ലാപഞ്ചായത്ത് ഫണ്ടുപയോഗിച്ച് നടത്തിയ വികസന പ്രവർത്തനങ്ങൾ വിരളം. യുഡിഎഫ്‌ ഭരിക്കുന്ന മൊഗ്രാൽപുത്തൂർ പഞ്ചായത്തിലെ 1, 3 വാർഡുകൾ ഒഴികെ 15 വാർഡും ചെങ്കള പഞ്ചായത്തിലെ ആറു വാർഡും ബിജെപി ഭരിക്കുന്ന മധൂർ പഞ്ചായത്തിലെ 5, 9 ഒഴികെ 22 വാർഡും ഉൾപ്പെടുന്നതാണ്‌ സിവിൽ സ്‌റ്റേഷൻ ഡിവിഷൻ. കാസർകോട്‌ ബ്ലോക്ക്‌ പഞ്ചായത്തിലെ ഏരിയാൽ, ചൂരി, രാംദാസ്‌ നഗർ, ഉളിയത്തടുക്ക, സിവിൽ സ്‌റ്റേഷൻ ഡിവിഷനുകളാണ്‌ ഇതിലുള്ളത്‌. ഐഎൻഎൽ ജില്ലാ സെക്രട്ടറിയും സംസ്ഥാന ക‍ൗൺസിൽ അംഗവുമായ ഷാഫി സന്തോഷ്‌ നഗറാണ്‌ എൽഡിഎഫ്‌ സ്ഥാനാർഥി. യൂത്ത്‌ ലീഗ്‌ മണ്ഡലം ട്രഷറർ പി ബി ഷഫീഖാണ്‌ യുഡിഎഫ്‌ സ്ഥാനാർഥി. ബിജെപി ജില്ലാ ജനറൽ സെക്രട്ടറി പി ആർ സുനിലാണ്‌ എൻഡിഎ സ്ഥാനാർഥി.