ഇടതിനൊപ്പം

അംഗടിമൊഗർ

വർഗീയതയുടെ വിത്തുവിതറി ഉത്തരേന്ത്യൻ രീതിയിലേക്ക് നാടിനെ പറിച്ചുനടാനുള്ള നീക്കം ചെറുക്കാൻ ഇടതിനൊപ്പം ചേരാനുറച്ച മനസാണ്‌ പുത്തിഗെയിലെ ജനങ്ങൾക്കുള്ളത്. ജില്ലാപഞ്ചായത്ത്‌ നിരവധി നേട്ടങ്ങൾ കൈവരിച്ചപ്പോഴും ഇതിന്റെ ഭാഗമാകാൻ രണ്ട്‌ പതിറ്റാണ്ടായി ജയിച്ചുപോയവർക്കായില്ല. പകരം മതപരമായ ചേരിതിരിവുണ്ടാക്കി മുതലെടുപ്പ് രാഷ്ട്രീയമാണ് നടത്തിയത്. ഇതിനെതിരായ വിധിയെഴുത്തിന് തയ്യാറെടുത്തിരിക്കുകയാണ് നാട്‌. മഞ്ചേശ്വരം ബ്ലോക്ക്‌ പഞ്ചായത്തിലെ ചേവാർ, പെർമുദെ, എൺമകജെ, പെർള, പുത്തിഗെ ഡിവിഷനുകൾ ചേർന്നതാണ്‌ പുത്തിഗെ ജില്ലാപഞ്ചായത്ത്‌ ഡിവിഷൻ. നിലവിൽ ബിജെപി പ്രതിനിധാനം ചെയ്യുന്ന ഡിവിഷൻ തിരിച്ചുപിടിച്ച്‌ കരുത്തുവർധിപ്പിക്കുകയാണ്‌ എൽഡിഎഫ്‌ ലക്ഷ്യം. സിപിഐ എം ജില്ലാകമ്മിറ്റി അംഗം കെ എ മുഹമ്മദ് ഹനീഫയെ എൽഡിഎഫ്‌ സ്ഥാനാർഥിയായി പ്രഖ്യാപിച്ചതോടെ തെരഞ്ഞെടുപ്പ് രംഗത്തിന് ചൂടേറി. വർഗീയതയ്‌ക്ക്‌ ഇനിയും ഇടംനൽകാതെ സംഘപരിവാർ അക്കൗണ്ട് പൂട്ടിക്കാനുറച്ച്‌ ചിട്ടയായ പ്രവർത്തനമാണ്‌ എൽഡിഎഫ് നടത്തുന്നത്‌. സ്ഥാപനങ്ങളും വീടുകളും കയറിയിറങ്ങുന്പോൾ സ്ഥാനാർഥിക്ക്‌ ലഭിക്കുന്ന സ്വീകാര്യത ഇതേ മനസാണ് ജനങ്ങളുടേതെന്ന് ഉറപ്പിക്കുന്നു. കെ എ മുഹമ്മദ്‌ ഹനീഫയുടെ ഒന്നാംഘട്ട പൊതു പര്യടനം വെള്ളിയാഴ്‌ച സമാപിക്കും. എൽഡിഎഫ്‌ നേതൃത്വത്തിലുള്ള പുത്തിഗെ പഞ്ചായത്തിൽ ഇക്കാലയളവിൽ വലിയ മാറ്റങ്ങളാണുണ്ടായത്‌. സംസ്ഥാനത്തെ ആദ്യ സ്‌മാർട്ട്‌ കൃഷിഭവൻ എടുത്തുപറയേണ്ട നേട്ടമാണ്‌. ബാഡൂരിലെയും അംഗടിമൊഗറിലെയും കുടുംബാരോഗ്യ കേന്ദ്രങ്ങളുടെ മുഖഛായ മാറിയതും ജനങ്ങൾ നേരിട്ട്‌ അനുഭവിക്കുന്നതാണ്‌. ഇത്തരം വികസന കാര്യങ്ങൾ പുത്തിഗെ പറയുന്പോൾ യുഡിഎഫ്‌ ഭരിക്കുന്ന എൺമകജെയാകട്ടെ ഇന്നും വർഷങ്ങൾക്ക്‌ പിറകിൽതന്നെയാണ്‌. നിരവധിയായ കർഷക പോരാട്ടങ്ങളുടെ ചരിത്രമെഴുതിയ നാട്‌ ഇത്തവണ ബിജെപിയുടെ കൈകളിൽനിന്നും പുത്തിഗെ ഡിവിഷൻ പിടിച്ചെടുത്ത്‌ ജില്ലാപഞ്ചായത്ത്‌ ഭരണത്തിന്‌ കരുത്തേകുമെന്നുറപ്പാണ്‌. എൺമകജെ പഞ്ചായത്ത്‌ പ്രസിഡന്റായ കെ സോമശേഖര യുഡിഎഫിന്റെയും കെ മണികണ്‌ഠ റൈ ബിജെപിയുടെയും സ്ഥാനാർഥികളാണ്‌.