പാൽപ്പെരുമയിൽ ദേശീയ ക്ഷീര ദിനാചരണം

കാഞ്ഞങ്ങാട്

പാലുല്‍പാദനത്തില്‍ ഇന്ത്യയെ സ്വയംപര്യാപ്തതയിലേക്ക് കൈപിടിച്ചുയര്‍ത്തിയ കാർഷികമുന്നേറ്റമായ ധവള വിപ്ലവത്തിന്റെ നായകന്‍ ഡോ. വർഗീസ് കുര്യന്റെ ജന്മദിനമായ നവംബർ 26 ദേശീയ ക്ഷീരദിനമായി ആഘോഷിച്ചു. മാവുങ്കാലിലെ മിൽമ കാസര്‍കോട് ഡയറി നേതൃത്വത്തിൽ ജില്ലയിലെങ്ങും വിപുലമായ പരിപാടികൾ നടത്തി. ഡയറി മാനേജർ സ്വീറ്റി വർഗീസ് ഉദ്ഘാടനം ചെയ്തു. മംഗൽപാടി പഞ്ചായത്തിലെ സിഡിഎസ് അംഗങ്ങൾക്കും ചെങ്കള ഗ്രാമപഞ്ചായത്തിൽ കുടുംബശ്രീ അംഗങ്ങൾക്കും ചായ്യോത്ത്‌ ജിഎച്ച്എസ്എസ്സിലെ സ്കൗട്ട് ആൻഡ് ഗൈഡ്സുമാർക്കും ബോധവൽക്കരണ ക്ലാസുമുണ്ടായി. ഹയർസെക്കന്‍ഡറി വിദ്യാർഥികൾക്കായി ജില്ലാ ജലഛായ ചിത്ര രചനാ മത്സരത്തിൽ എം സ്വപ്ന സുരേഷ് (ബേത്തൂർപ്പാറ ജിഎച്ച്എസ്എസ് ), വരുണ മോഹൻ (ചട്ടഞ്ചാൽ ജിഎച്ച്എസ്എസ് ), കെ ദേവനന്ദ ( ഉദുമ ജിഎച്ച്എസ്എസ്) എന്നിവർ യഥാക്രമം ഒന്നും രണ്ടും മൂന്നുംസ്ഥാനം നേടി. ഹൈസ്കൂൾ വിദ്യാർഥികൾക്കുള്ള ക്വിസ് മത്സരത്തിൽ യഥാക്രമം ഇ തനവ്, ഇ തേജൽ( ജിഎച്ച്എസ്എസ് പാക്കം), ടി വി അഗ്രിമ, കെ അനന്യ (ഉദിനൂർ ജിഎച്ച്എസ്എസ്), ശ്രീലക്ഷ്മി,അശ്വിൻ രാജ് (രാജാസ് എച്ച്എസ്എസ് നീലേശ്വരം) ടീമുകൾ യഥാക്രമം ഒന്നുംരണ്ടുംമൂന്നുംസ്ഥാനം നേടി. പൊതുജനങ്ങൾക്ക് ഡയറി സന്ദർശിക്കാനുള്ള അവസരവുമുണ്ടായിരുന്നു. മൂന്നുദിവസങ്ങളിലായി ആയിരത്തോളം പേർ ഡെയറി സന്ദർശിച്ചു.