അഴിമതിയും തമ്മിലടിയും 
പടിയിറങ്ങും

​പന്തളം
സംസ്ഥാന സർക്കാരിന്റെ തദ്ദേശഫണ്ടുകളും പട്ടികജാതി വികസന ഫണ്ടുകളും പാഴാക്കി, തമ്മിലടിക്കു മാത്രം അഞ്ചാണ്ട് വിനിയോഗിച്ച ബിജെപി ഭരണസമിതിയെ നഗരസഭയുടെ പടികടത്താൻ കാത്തിരിക്കുകയാണ് പന്തളം നഗരസഭയിലെ വോട്ടർമാർ. അധികാരത്തിലെത്തിയ വർഷം മുതൽ ഭരണസമിതിയിൽ തുടങ്ങിയ തമ്മിലടി കാരണം സർക്കാർ ഫണ്ടുകൾ യഥാസമയം വേണ്ടവിധം വിനിയോഗിക്കുന്നതിൽ ഭരണസമിതി പരാജയപ്പെട്ടെന്ന് നഗരസഭാ പ്രദേശത്തെ ജനങ്ങൾക്ക് ബോധ്യപ്പെട്ടു. ഭരണസമിതിയിലെ അധികാര വടംവലിക്കിടെ പന്തളത്തിന്റെ വികസനകാര്യങ്ങൾ ഭരണസമിതി മറന്നു.
നഗരസഭാ കൗൺസിൽ പിരിച്ചുവിടണമെന്നാവശ്യപ്പെട്ട് നഗരസഭാ സെക്രട്ടറി തന്നെ സർക്കാരിനെ സമീപിക്കുന്ന അപൂർവ നടപടിക്ക് വിധേയമായ കൗൺസിലായിരുന്നു കഴിഞ്ഞ അഞ്ചുവർഷത്തേത്‌. 2021 – -2022ലെ ബജറ്റ് യഥാസമയം പാസാക്കിയില്ലെന്നും വ്യാജമായിരുന്നെന്നും ചൂണ്ടിക്കാട്ടിയായിരുന്നു സെക്രട്ടറി സർക്കാരിനെ സമീപിച്ചത്. ഭരണപക്ഷ കൗൺസിലർ കൂടി ഒപ്പിട്ട്‌ എൽഡിഎഫ് കൊണ്ടുവന്ന അവിശ്വാസപ്രമേയത്തെ തുടർന്ന് മുൻ അധ്യക്ഷയുടെ രാജി ബിജെപിയിൽ കോളിളക്കം സൃഷ്ടിച്ചു. അവിശ്വാസത്തെത്തുടർന്ന് ചെയർപേഴ്‌സണും വൈസ് ചെയർപേഴ്‌സണും രാജിവെയ്ക്കുകയും ചെയ്തു.പിന്നീട് നടന്ന തെരഞ്ഞെടുപ്പിൽ ബിജെപിയുടെ 18 അംഗങ്ങൾക്കൊപ്പം സ്വതന്ത്രന്റെ വോട്ടുകൂടി ചേർത്ത് 19 വോട്ട് നേടി ബിജെപി അധികാരത്തിൽ കടിച്ചുതൂങ്ങി.
മാലിന്യനിർമ്മാർജനം, കാർഷികമേഖലയ്ക്കുള്ള പദ്ധതികൾ, ഗ്രാമീണ റോഡുകളുടെ വികസനം തുടങ്ങിയവയൊന്നും നടന്നില്ല. സർക്കാർ ഫണ്ടുകൾ പാഴാക്കുക മാത്രമാണ് ചെയ്തത്. ശബരിമല തീർഥാടനവുമായി ബന്ധപ്പെട്ട് അടിസ്ഥാന സൗകര്യമൊരുക്കുന്നതിലും അനാസ്ഥ കാട്ടി.
മുട്ടാർ നീർച്ചാൽ നവീകരണത്തിന്റെ പേരിൽ ലക്ഷങ്ങളുടെ അഴിമതി നടത്തി. നഗരസഭ ബസ്‌സ്റ്റാൻഡ് നിർമ്മാണം പൂർത്തിയാവുംമുന്പ്‌ ഉദ്ഘാടനം നടത്തി.
നഗരസഭയിലെ കെട്ടിടങ്ങൾക്കും വീടുകൾക്കും കരമൊടുക്കാനാവാതെ വീട്ടുകാർ നട്ടം തിരിയുകയാണ്. തെരഞ്ഞെടുപ്പ് പ്രഖ്യാപിച്ച ശേഷം നഗരസഭാ പ്രദേശത്ത് ബിജെപി വിമതശല്യം നേരിടുകയാണ്. ബിജെപി ജില്ലാ കമ്മിറ്റിയംഗം രാജിവച്ച് സിപിഐ എമ്മിൽ ചേർന്നതും നാട്ടുകാർ കണ്ടു. തെരഞ്ഞെടുപ്പ് രംഗത്ത്‌ പല സ്ഥാനാർഥികളും അസംതൃപ്തരാണ്. നഗരസഭയിലെ മറ്റൊരു പ്രതിപക്ഷമായ യുഡിഎഫ് പന്തളത്ത് കാഴ്ചക്കാരായി നിൽക്കുന്ന നിലയായിരുന്നു പലപ്പോഴും. യുഡിഎഫിലെ തന്നെ ഒരു സിറ്റിങ്‌ അംഗം യുഡിഎഫിൽനിന്ന് രാജിവച്ച് ബിജെപിയിൽ ചേക്കേറുന്ന കാഴ്ചയും നഗരസഭയിലെ വോട്ടർമാർ കണ്ടു.