തലയുയർത്തി തദ്ദേശ വകുപ്പും ശുചിത്വ മിഷനും

പാലക്കാട്​

സംസ്ഥാനത്തെ മാലിന്യ നിർമാർജന പ്രവർത്തനത്തിൽ മികച്ച മുന്നേറ്റവുമായി ജില്ല കുതിക്കുമ്പോൾ അഭിമാനത്തോടെ തലയുയർത്തുകയാണ് തദ്ദേശ വകുപ്പും​ ജില്ലാ ശുചിത്വ മിഷനും. ശുചിത്വ - മാലിന്യ പദ്ധതികളിൽ വലിയപങ്കാണ്​ ഇവർ നിർവഹിക്കുന്നത്​​.

സ്വച്ഛതാ ഗ്രീന്‍ ലീഫ് 
റേറ്റിങ്

ഹോട്ടലുകള്‍, റിസോര്‍ട്ടുകള്‍, ഹോംസ്റ്റേകള്‍ എന്നിവയുടെ ശുചിത്വ മാലിന്യ സംസ്‌കരണവുമായി ബന്ധപ്പെട്ട ജില്ലാതലത്തിൽ നടത്തിയ വിലയിരുത്തലാണ് സ്വച്ഛത ഗ്രീന്‍ ലീഫ് റേറ്റിങ്. 14 ഹോട്ടലുകളും രണ്ട് ഹോംസ്റ്റേകള്‍ക്കുമായി 16 സ്ഥാപനങ്ങളാണ്​ മികച്ച റേറ്റിങ് നേടിയത്​. പ്രവര്‍ത്തനങ്ങള്‍ ഏകോപിപ്പിക്കുന്നത്​ ശുചിത്വ മിഷനാണ്. മാലിന്യ മുക്ത നവകേരളം ക്യാമ്പയിനിന്റെ ഭാഗമായി തദ്ദേശവകുപ്പിന്റെ നേതൃത്വത്തില്‍ നടന്ന പ്രവര്‍ത്തനങ്ങള്‍ സഹായമായി.

സ്വച്ഛ്​​ സർവേക്ഷൻ ദേശീയ റാങ്കിങ്

ദേശീയ സ്വച്ഛ്​​ ​സർവേക്ഷൻ റാങ്കിങ്ങിൽ മികച്ച നേട്ടമാണ്​ ജില്ല കൈവരിച്ചത്​. നഗരസഭകളുടെ റാങ്കിങ് മെച്ചപ്പെടുത്തുന്നതിന് നിരവധി പ്രവർത്തനങ്ങൾ നടപ്പാക്കി​. ഖരമാലിന്യ സംസ്കരണത്തിൽ അടിസ്ഥാന സൗകര്യങ്ങൾ വിപുലപ്പെടുത്തി. പൊതുയിടങ്ങളിലെയും ജലാശയങ്ങളിലെയും വൃത്തി ഉറപ്പാക്കി. മാലിന്യ നിക്ഷേപ കേന്ദ്രങ്ങൾ വൃത്തിയാക്കി പൂന്തോട്ടങ്ങളാക്കി പരിപാലിച്ചു. ശുചിത്വ -മാലിന്യ സംസ്കരണ സന്ദേശങ്ങളടങ്ങിയ ചുവർ ചിത്രങ്ങൾ, നഗരസൗന്ദര്യ വൽക്കരണം, പ്രത്യേക പ്ലാന്റുകൾ, കലക്ഷൻ പോയിന്റുകൾ, വേസ്റ്റ് ടു ആർട്ട്​ ഉദ്യമങ്ങൾ, സീറോ വേസ്റ്റ് - ഗ്രീൻ പ്രോട്ടോകോൾ, ആർആർആർ സെന്ററുകൾ തുടങ്ങിയവ നഗരസഭകളുടെ റാങ്കിങ്ങിലെ കുതിപ്പിന്​ സഹായകമായി. കഴിഞ്ഞ മാസമാണ്​ റാങ്കിങ്​ പ്രഖ്യാപിച്ചത്​. മാലിന്യമുക്തം നവകേരളം ക്യാമ്പയിനിന്റെ ഭാഗമായി വാതിൽപ്പടി മാലിന്യ ശേഖരണം നൂറുശതമാനത്തിലെത്തിക്കാനുമായി.

സ്റ്റാർ റേറ്റിങ്ങിലും തിളങ്ങി

കേന്ദ്ര പാർപ്പിട നഗരകാര്യ മന്ത്രാലയം പുറപ്പെടുവിച്ച സ്റ്റാർ റേറ്റിങ് പ്രോട്ടോകോളാണ് ഗാർബേജ് ഫ്രീ സിറ്റീസ് സർട്ടിഫിക്കേഷൻ. പട്ടാമ്പി, ഷൊർണൂർ നഗരസഭകളാണ് മൂന്ന്​ സ്റ്റാർ റേറ്റിങ് കരസ്ഥമാക്കിയത്. ചെർപ്പുളശേരി നഗരസഭ ഒരു സ്റ്റാർ നേടി.