രാജൻ കണ്ടെത്തി, 
ജലമെടുത്ത ജീവൻ

ചിറ്റൂർ

പുഴയിൽനിന്ന്‌ രണ്ടാമത്തെയാളുടെ മൃതദേഹം കണ്ടെത്തിയത് സമീപവാസിയായ രാജൻ. ശനിയാഴ്ച പകൽ രണ്ടിന്‌ അപകടത്തിൽപ്പെട്ട് ശ്രീഗൗതമിനെ പുഴയിൽനിന്ന്‌ നാട്ടുകാരുടെ സഹായത്തോടെ പെട്ടെന്ന് പുറത്തെടുത്തെങ്കിലും അരുൺ കുമാറിനായുള്ള തിരച്ചിൽ നാലര മണിക്കൂറിലധികം നീണ്ടു. പുഴയിൽ നീരൊഴുക്കുള്ളതിനാൽ ഇയാൾ വീണതിന് താഴെയായിരുന്നു അഗ്‌നിരക്ഷാസേനയും സ്കൂബ ടീമും തിരച്ചിൽ നടത്തിയത്. മൂന്നര മണിക്കൂറായിട്ടും കണ്ടെത്താൻ കഴിഞ്ഞില്ല. വീണ ഭാഗത്ത് ഒന്നുകൂടെ നോക്കാനായി ഷട്ടർ ഉയർത്തുന്നതിനിടെ പുഴയിലിറങ്ങിയ രാജനാണ് പുഴപ്പാലത്തിൽ സ്ഥാപിച്ച ഷട്ടറിനുള്ളിലെ കമ്പികൾക്കിടയിൽ കുടുങ്ങിയ നിലയിൽ മൃതദേഹം കണ്ടെത്തിയത്.

രണ്ടാമത്തെ യാത്ര 
മരണത്തിലേക്ക്‌

തമിഴ്നാട്ടിൽനിന്നുള്ള വിദ്യാർഥികൾ രണ്ടാംതവണയാണ്‌ ഇവിടെ എത്തുന്നത്‌. നവമാധ്യമങ്ങളിൽ കണ്ടറിഞ്ഞ് മുല്ലയ്ക്കൽ ഷാപ്പിലെ വിഭവങ്ങൾ രുചിക്കാൻ കഴിഞ്ഞയാഴ്ചയും ഇവർ വന്നിരുന്നു. വീണ്ടും ശനിയാഴ്ച പത്തുപേർ അഞ്ചുബൈക്കിലായി എത്തി. കള്ളുഷാപ്പിൽനിന്ന്‌ ഭക്ഷണം കഴിച്ചശേഷം തിരിച്ചുപോകുന്നതിനിടെയാണ് വിളയോടി പുഴയിൽ കുളിക്കാനിറങ്ങിയതും രണ്ടുപേരുടെ മരണത്തിന് ഇടയാക്കിയതും. സംഘത്തിൽ ഉൾപ്പെട്ട ആൺകുട്ടികൾ കോളേജിന് സമീപം വീടെടുത്ത് താമസിക്കുന്നവരാണ്.

​​തമിഴിലും ബോർഡ് വേണം

​ചിറ്റൂർ പുഴയുടെ ഇരുകരകളിലും മലയാളത്തിലും തമിഴിലും അപകടമുന്നറിയിപ്പ്‌ ബോർഡ്‌ സ്ഥാപിക്കണമെന്ന ആവശ്യം ശക്തമാണ്‌. ഇപ്പോൾ മലയാളത്തിൽ ഫ്ലക്സ് വച്ചിരിക്കുകയാണ്‌. തമിഴ്നാട്ടിൽനിന്ന്‌ എത്തുന്നവർക്ക് മലയാളം വശമില്ലാത്തതിനാൽ പലപ്പോഴും അപകടസാധ്യത അറിയാനാകില്ല. അതിനിടെ, കോയമ്പത്തൂരിലെ കോളേജുകൾക്ക് ചിറ്റൂർ പുഴയിലെ അപകടം ചൂണ്ടിക്കാട്ടി മുന്നറിയിപ്പ് നൽകാനെരുങ്ങുകയാണ് പൊലീസ്.