നല്ല പാൽ മാത്രം 
അതിർത്തി കടക്കും

ചിറ്റൂർ

അതിർത്തി കടന്നുവരുന്ന പാലിൽ മായമില്ലെന്ന്‌ ഉറപ്പാക്കുകയാണ്‌ മീനാക്ഷിപുരത്തെ പാൽ ഗുണനിലവാര പരിശോധനകേന്ദ്രം. ഒന്നും രണ്ട്‌ ലിറ്റർ അല്ല–- ദിവസവും മൂന്ന്‌ ലക്ഷം ലിറ്റർ പാലാണ്‌ മായം കലർത്തിയിട്ടില്ലെന്ന് ഉറപ്പുവരുത്തി അതിർത്തി കടന്നുവരുന്നത്‌. ഇതര സംസ്ഥാനങ്ങളിൽനിന്ന്‌ കേരളത്തിലേക്ക് വരുന്ന ഗുണനിലവാരമില്ലാത്ത പാലും തടയാനായി ക്ഷീര വികസനവകുപ്പിന്റെ കീഴിൽ 2017 ജൂണിലാണ്‌ മീനാക്ഷിപുരത്ത്‌ എൽഡിഎഫ്‌ സർക്കാർ പാൽ ഗുണനിലവാര പരിശോധന കേന്ദ്രം ആരംഭിച്ചത്. തമിഴ്നാട്ടിൽനിന്ന്‌ എത്തുന്ന പാലിന്റെ സാമ്പിൾ ശേഖരിച്ച് ചെക്പോസ്റ്റിൽ തന്നെ സജ്ജമാക്കിയിട്ടുള്ള ലാബിൽ പ്രാഥമിക പരിശോധനകൾ നടത്തി ഗുണനിലവാരം ഉറപ്പുവരുത്തിയശേഷമാണ് വാഹനങ്ങൾ കടത്തിവിടുന്നത്. സംശയം തോന്നിയ വാഹനങ്ങളെ തിരിച്ചയക്കുകയോ, അല്ലെങ്കിൽ ഭക്ഷ്യ സുരക്ഷാവകുപ്പിന് കൈമാറുകയോ ആണ് പതിവ്. ഗുണനിലവാര പരിശോധനയ്ക്കൊപ്പം കൊഴുപ്പ്, ഫോർമാലിൻ, നൈട്രിക് പെറേക്സൈസ് തുടങ്ങിയ 22 ലധികം പരിശോധനയും നടത്തും. 20 മിനിട്ടിനകം പരിശോധന പൂർത്തിയാകും. ശരാശരി ഒരു ദിവസം 40 വാഹനങ്ങളിലായി മൂന്ന്‌ ലക്ഷം ലിറ്റർ പാൽ ഗുണനിലവാരം ഉറപ്പുവരുത്തിയാണ് മീനാക്ഷിപുരം അതിർത്തി കടത്തിവിടുന്നത്. പദ്ധതി വിജയംകണ്ടതോടെ മറ്റ് ജില്ലാതിർത്തികളിലും പരിശോധന കേന്ദ്രം സ്ഥാപിക്കണമെന്ന് ആവശ്യവും ഉയർന്നിട്ടുണ്ട്. നിലവിൽ മീനാക്ഷിപുരം കൂടാതെ കൊല്ലം ആര്യങ്കാവ്, തിരുവനന്തപുരം പാറശാലയിലുമാണ് പാൽ പരിശോധനകേന്ദ്രമുള്ളത്. കൂടാതെ ഓരോ ജില്ലകളിലും പ്രവർത്തിക്കുന്ന ക്വാളിറ്റി കൺട്രോൾ ലാബുകൾ മാർക്കറ്റ് സാമ്പിൾ പരിശോധിക്കുന്നുണ്ട്‌.