നാദാപുരം പഞ്ചായത്ത് സെക്രട്ടറിക്ക് യുഡിഎഫ് ഭീഷണി

നാദാപുരം

​നാദാപുരം പഞ്ചായത്ത് സെക്രട്ടറിയെ ഭീഷണിപ്പെടുത്തി വോട്ടർ പട്ടിക അട്ടിമറിക്കാൻ യുഡിഎഫ് ശ്രമം. പൊലീസ് കാവലിൽ ഹിയറിങ് നടത്തി. പഞ്ചായത്ത്‌ സെക്രട്ടറി എം പി റജുലാലിനെയാണ് പ്രസിഡന്റ്‌ വി വി മുഹമ്മദലിയും യുഡിഎഫ് പ്രവർത്തകരും ചേർന്ന്‌ ഭീഷണിപ്പെടുത്തിയത്‌. വ്യാഴം രാവിലെ വോട്ടർ പട്ടികയിൽ പേര് ചേർക്കുന്നതിനും നീക്കംചെയ്യുന്നതിനുമുള്ള സിറ്റിങ് നടക്കുന്നതിനിടെയാണ് അപേക്ഷകരുടെയും ജീവനക്കാരുടെയും മുന്നിൽവച്ച്‌ ഭീഷണിയും അസഭ്യവർഷവും. പഞ്ചായത്ത് ജീവനക്കാരെ കൈയേറ്റം ചെയ്യാനുള്ള നീക്കത്തെ എൽഡിഎഫ് പ്രവർത്തകർ പ്രതിരോധിച്ചു. തുടർന്ന്‌ പഞ്ചായത്തിനുള്ളിൽ സംഘർഷാവസ്ഥയുണ്ടായി. ഏറെനേരം സംഘർഷം നീണ്ടു. നാദാപുരം എസ്ഐ കെ ശരത്തിന്റെ നേതൃത്വത്തിൽ വൻ പൊലീസ് സംഘം സ്ഥലത്തെത്തിയാണ് സംഘർഷം നിയന്ത്രിച്ചത്. പിന്നീട് പൊലീസ് രാഷ്ട്രീയപാർടി നേതാക്കളും പഞ്ചായത്ത് അധികൃതരും നടത്തിയ ചർച്ചയെ തുടർന്ന് മണിക്കൂറുകൾക്കുശേഷം ഹിയറിങ് പുനരാരംഭിച്ചു.

​കഴിഞ്ഞ ദിവസവും സമാനമായ രീതിയിൽ സെക്രട്ടറിക്കെതിരെ ഭീഷണിയുമായി യുഡിഎഫ് പ്രവർത്തകർ രംഗത്തെത്തിയിരുന്നു. തുടർന്ന് ഹിയറിങ് നിർത്തിവച്ചു. അനധികൃതമായി യുഡിഎഫിന്റെ വോട്ടുകൾ ചേർക്കുന്നതിന്‌ കൂട്ടുനിൽക്കാത്തതാണ് കാരണം. പെരുമാറ്റച്ചട്ടം നിലവിൽ വന്നിട്ടും ഔദ്യോഗികവാഹനം പ്രസിഡന്റ്‌ ആവശ്യപ്പെട്ടിരുന്നു. സെക്രട്ടറി നൽകിയിരുന്നില്ല. കൂടാതെ ക്രമവിരുദ്ധമായി പഞ്ചായത്ത് ഫണ്ടിൽനിന്ന്‌ പണം ചെലവഴിക്കാൻ പ്രസിഡന്റ്‌ ആവശ്യപ്പെട്ടത് സെക്രട്ടറി അംഗീകരിച്ചിരുന്നില്ല എന്നതും അനധികൃത കെട്ടിടങ്ങൾക്ക് അനുമതി നൽകാനും നമ്പർ നൽകാനും പ്രസിഡന്റ്‌ ജീവനക്കാരോടും സെക്രട്ടറിയോടും ആവശ്യപ്പെട്ടത്‌ നടക്കാത്തതും പ്രകോപനത്തിന് കാരണമായതായി ആരോപണമുണ്ട്‌. സിപിഐ എം ഏരിയ സെക്രട്ടറി എ മോഹൻദാസ് ഏരിയ കമ്മിറ്റി അംഗങ്ങളായ സി എച്ച് മോഹനൻ, എരോത്ത് ഫൈസൽ, എൻസിപി നേതാവ് കരിമ്പിൽ ദിവാകരൻ തുടങ്ങിയവർ സ്ഥലത്തെത്തി