ഒപി ചീട്ടിനുള്ള ഫീസ് കുത്തനെ വർധിപ്പിച്ചതിൽ പ്രതിഷേധം ശക്തം

പേരാമ്പ്ര

പേരാമ്പ്ര താലൂക്ക് ആശുപത്രിയിൽ ഒപി ചീട്ടിനുള്ള ഫീസ് അഞ്ചുരൂപയിൽനിന്ന് 10 രൂപയായി ഉയർത്തിയ പേരാമ്പ്ര ബ്ലോക്ക് പഞ്ചായത്ത്‌ നടപടിയിൽ വ്യാപക പ്രതിഷേധം. ബ്ലോക്ക് പഞ്ചായത്തിൽ യുഡിഎഫ് ഭരണമേറ്റതോടെ പേരാമ്പ്ര താലൂക്ക് ആശുപത്രിയുടെ പ്രവർത്തനം പ്രതിസന്ധിയിലാണ്. അവശ്യ മരുന്നുകൾ ലഭ്യമാക്കുന്നതിലും ആശുപത്രിയിൽ ശുദ്ധജലമെത്തിക്കുന്നതിലും ഗുരുതര അലംഭാവമാണ് ബ്ലോക്ക് പഞ്ചായത്ത് തുടരുന്നത്. ജലവിതരണം മുടങ്ങിയതോടെ ആശുപത്രിയിൽ കിടത്തിച്ചികിത്സക്ക് രോഗികളെ പ്രവേശിപ്പിക്കുന്നില്ല. കഴിഞ്ഞ ബ്ലോക്ക് പഞ്ചായത്ത് നടപ്പാക്കിയ വയോജനങ്ങൾക്കുള്ള മൊബൈൽ മെഡിക്കൽ യൂണിറ്റ് നിർത്തലാക്കി. ഡോക്ടർമാരുടെ തസ്തികകൾ ഒഴിഞ്ഞുകിടക്കുന്നു. മരുന്ന്, ശുദ്ധജലം പോലുള്ള അടിസ്ഥാന സൗകര്യങ്ങൾ പോലും ഒരുക്കാതെ ഒപി ചീട്ടിന്റെ ഫീസ് വർധിപ്പിച്ച നടപടിയിൽ കടുത്ത പ്രതിഷേധമാണ് ഉയരുന്നത്. ഫീസ് വർധനക്കെതിരെ ഡിവൈഎഫ്ഐ പ്രവർത്തകർ ആശുപത്രിയിലെത്തി പ്രതിഷേധിച്ചു. നടപടി പിൻവലിച്ചില്ലെങ്കിൽ പ്രതിഷേധം കടുപ്പിക്കുമെന്ന്‌ ഡിവൈഎഫ്ഐ ബ്ലോക്ക് കമ്മിറ്റി മുന്നറിയിപ്പ് നൽകി. പേരാമ്പ്രയിൽ നടത്തിയ പ്രകടനത്തിന് ഡിവൈഎഫ്ഐ സംസ്ഥാന കമ്മിറ്റി അംഗം എം എം ജിജേഷ്, സി കെ രൂപേഷ്, കെ വി അനുരാഗ്, എം എം അതുൽ ദാസ്, കെ പി അഖിലേഷ്, ബിനിൽ രാജ് എന്നിവർ നേതൃത്വം നൽകി.