കുണ്ടറയില്‍ 
 ‘ശോഭനം’

കുണ്ടറ

ജില്ലാ പഞ്ചായത്ത് കുണ്ടറ ഡിവിഷന് ഇടതുചായ് വാണ്... എല്‍ഡിഎഫ് കാലങ്ങളായി ഡിവിഷനില്‍ നടത്തിയ വികസന ക്ഷേമ പ്രവര്‍ത്തനങ്ങളുടെ ഫലമായിട്ടാണ് ആ ചായ്‍വുണ്ടായത്. കുണ്ടറ പഞ്ചായത്ത് മുൻ പ്രസിഡന്റുകൂടിയായ എല്‍ഡിഎഫ് സ്ഥാനാർഥി ശോഭന ശ്രീനിവാസന് മേഖല സുപരിചിതമാണ്. പര്യടനത്തിന്റെ ആദ്യ റൗണ്ട് പൂർത്തിയാക്കിയ സ്ഥാനാർഥി ഇപ്പോൾ വീടുകളിലെത്തി സമ്മതിദായകരെ നേരിട്ടുകണ്ട് വോട്ടഭ്യർഥിക്കുകയാണ്. ‘വികസനത്തുടർച്ച ആഗ്രഹിക്കുന്നതിനാല്‍ എല്‍ഡിഎഫ് അല്ലാതെ മറ്റൊരു ഓപ്ഷന്‍ ഇല്ലെന്ന്’ വോട്ടര്‍മാര്‍ സാക്ഷ്യപ്പെടുത്തുന്നു. ജില്ലാ പഞ്ചായത്ത് നടപ്പാക്കിയ എല്ലാ വികസനക്ഷേമ പദ്ധതികളുടെയും ഫലം കുണ്ടറയ്ക്കും ലഭ്യമായിട്ടുണ്ട്. കുണ്ടറ പഞ്ചായത്തിലെ വിവിധ വാർഡുകളിലാണ് ശനിയാഴ്ച സ്ഥാനാർഥി ഭവന സന്ദർശനം നടത്തിയത്. പഞ്ചായത്ത് പ്രസിഡന്റായിരിക്കെ നാട്ടിൽ നടപ്പാക്കിയ വികസന പ്രവർത്തനങ്ങൾ സ്ഥാനാർഥിക്ക് മുതൽക്കൂട്ടാകുന്നുണ്ട്. മിക്ക വീട്ടുകാർക്കും സുപരിചിതയായ സ്ഥാനാർഥിയെ സന്തോഷത്തോടെയാണ് കുടുംബാംഗങ്ങൾ സ്വീകരിക്കുന്നത്. മൺറോതുരുത്ത്, കിഴക്കേകല്ലട, പേരയം, കുണ്ടറ (രണ്ട് വാർഡ് ഒഴികെ) പഞ്ചായത്തുകൾ ഉൾപ്പെട്ടതാണ് ജില്ലാ പഞ്ചായത്ത് കുണ്ടറ ഡിവിഷൻ. കർഷകത്തൊഴിലാളി സംഘടന, മഹിളാ അസോസിയേഷൻ, പാർടി ഏരിയ കമ്മിറ്റി അംഗം, കുടുംബശ്രീ സിഡിഎസ് അംഗം എന്നീ നിലകളിൽ പ്രവർത്തിച്ചു കൊണ്ടിരിക്കുന്ന ശോഭന ശ്രീനിവാസന്റെ പ്രവർത്തനപരിചയം വിജയത്തിന് കൂടുതൽ കരുത്തേകും.