പരസ്യങ്ങളിൽ എഐ ചിത്രങ്ങൾ പ്രചരിക്കുന്നു: ആരാധകരോട് സഹായം അഭ്യർഥിച്ച് ശ്രേയ ഘോഷാൽ

മുംബൈ : സമൂഹമാധ്യമമായ എക്സിൽ എഐ വഴി നിർമിച്ച തന്റെ പരസ്യങ്ങൾ വ്യാപകമായി പ്രചരിക്കുന്നതായി ​ഗായിക ശ്രേയ ഘോഷാൽ. എഐ വഴി തന്റെ ചിത്രങ്ങൾ നിർമിച്ചാണ് പരസ്യങ്ങൾ പ്രചരിപ്പിക്കുന്നത്. ഇവയെല്ലാം റിപ്പോർട്ട് ചെയ്യണമെന്ന് ​ഗായിക ആരാധകരോട് അഭ്യർഥിച്ചു. എക്സ് അക്കൗണ്ടിൽ പോസ്റ്റ് ചെയ്ത വീഡിയോയിലൂടെയാണ് ശ്രേയ ഘോഷാൽ വ്യാജ പരസ്യങ്ങളെപ്പറ്റി ആരാധകർക്ക് മുന്നിൽ പരാതിയുമായി എത്തിയത്.

ഫെബ്രുവരിയിൽ ശ്രേയയുടെ എക്സ് അക്കൗണ്ട് ഹാക്ക് ചെയ്യപ്പെട്ടിരുന്നു. ഇത് തിരികെ ലഭിച്ചതായും ശ്രേയ വ്യക്തമാക്കി. വളരെ വികലമായ തലക്കെട്ടോടെയും എ ഐ വഴി നിർമിച്ച ചിത്രങ്ങളോടെയുമുള്ള എന്നെപ്പറ്റിയുള്ള ധാരാളം ലേഖനങ്ങൾ പ്രചരിക്കുന്നുണ്ട്. ഇവയിൽ പലതും വ്യാജമായ പല ലിങ്കുകളിലേക്കുമാണ് തുറക്കുന്നത്. ഇത്തരം പരസ്യങ്ങൾ റിപ്പോർട്ട് ചെയ്യുക. എക്സ് ടീമും ഈ പ്രശ്നം പരിഹരിക്കുമെന്ന് കരുതുന്നു- ശ്രേയ വീഡിയോയിൽ പറഞ്ഞു.

പല തവണ ഇത്തരം പരസ്യങ്ങൾ ബ്ലോക്ക് ചെയ്യാൻ ശ്രമിച്ച് പരാജയപ്പെട്ടു. ഇത്തരം പരസ്യങ്ങൾ വരുന്നത് തടയാൻ എക്സ് മുൻകൈയെടുക്കണം. ഞാൻ മാത്രമല്ല, നിരവധി പേർ ഇത്തരം പ്രശ്നങ്ങൾ നേരിടുന്നുണ്ടെന്നും ശ്രേയ പറഞ്ഞു.