നീറ്റ്-യുജി: പുനഃപരീക്ഷ ജൂൺ 21-ന്, വ്യാജ സന്ദേശങ്ങളിൽ വീഴരുത്, ഇക്കാര്യങ്ങൾ ശ്രദ്ധിക്കുക

ന്യൂഡൽഹി: ചോദ്യപേപ്പര്‍ അട്ടിമറിയെ തുടര്‍ന്ന് റദ്ദാക്കിയ നീറ്റ്-യുജി മെഡിക്കൽ പ്രവേശന പരീക്ഷയുടെ പുനഃപരീക്ഷ ജൂൺ 21 ഞായറാഴ്ച നടക്കും. പരീക്ഷയ്ക്കുള്ള പുതിയ അഡ്മിറ്റ് കാർഡുകൾ ഡൗൺലോഡ് ചെയ്യാത്ത ഉദ്യോഗാർത്ഥികൾക്കായി നാഷണൽ ടെസ്റ്റിംഗ് ഏജൻസി എസ്എംഎസ്, ഇമെയിൽ, വാട്സാപ്പ് സംവിധാനങ്ങൾ വഴി അടിയന്തര ഓർമ്മപ്പെടുത്തലുകൾ അയച്ചുതുടങ്ങി.

മേയ് 3-ന് നടന്ന പരീക്ഷയുടെ ചോദ്യപേപ്പർ ചോർന്നതായി കണ്ടെത്തി. തുടര്‍ന്ന് മേയ് 12-ന് പരീക്ഷ റദ്ദാക്കി. നിലവിൽ സിബിഐ കേസ് അന്വേഷണം തുടരുന്നു. ഈ സാഹചര്യത്തിൽ വിദ്യാർത്ഥികളെയും രക്ഷിതാക്കളെയും ലക്ഷ്യമിട്ട് വൻതോതിൽ വ്യാജ സന്ദേശങ്ങൾ പ്രചരിക്കാൻ സാധ്യതയുള്ളതിനാൽ അതീവ ജാഗ്രത പാലിക്കണമെന്ന് എൻടിഎ മുന്നറിയിപ്പ് നൽകി.

ഔദ്യോഗിക സന്ദേശങ്ങൾ

എങ്ങനെ തിരിച്ചറിയാം

• എൻ ടി എയിൽ നിന്നുള്ള ഔദ്യോഗിക എസ്എം എസുകൾ 'NICPEP' എന്ന സെൻഡർ ഐഡിയിൽ നിന്ന് മാത്രമായിരിക്കും വരിക.

• ഔദ്യോഗിക ഇമെയിലുകൾ [email protected] എന്ന വിലാസത്തിൽ നിന്ന് മാത്രമായിരിക്കും ലഭിക്കുക.

• ഇത്തവണ പരീക്ഷാ വിവരങ്ങൾ വാട്സാപ്പ് വഴിയും നൽകുന്നുണ്ട്. എന്നാൽ, 'National Testing Agency' എന്ന് പേരുള്ള, ബ്ലൂ വെരിഫൈഡ് ടിക്ക് ഉള്ള ഔദ്യോഗിക അക്കൗണ്ടിൽ നിന്ന് വരുന്ന സന്ദേശങ്ങൾ മാത്രം വിശ്വസിക്കുക.

• അഡ്മിറ്റ് കാർഡുകൾ ഡൗൺലോഡ് ചെയ്യാനായി http://neet.nta.nic.in എന്ന ഔദ്യോഗിക വെബ്സൈറ്റ് വിലാസം നേരിട്ട് ബ്രൗസറിൽ ടൈപ്പ് ചെയ്ത് മാത്രം ഉപയോഗിക്കുക. ലോഗിൻ പേജുകളിലെ സാങ്കേതിക തടസ്സങ്ങൾ ഒഴിവാക്കാൻ, റീഫണ്ട് ബാങ്ക് അക്കൗണ്ട് വെരിഫിക്കേഷൻ സ്റ്റെപ്പുകൾ തൽക്കാലം സ്കിപ്പ് ചെയ്യാനുള്ള സൗകര്യവും പോർട്ടലിൽ ഒരുക്കിയിട്ടുണ്ട്.
  
  

'റെഡ് ഫ്ലാഗുകൾ' ശ്രദ്ധിക്കുക

• എൻടിഎ ഒരിക്കലും നിങ്ങളോട് പണമിടപാടുകൾ നടത്താൻ ആവശ്യപ്പെടില്ല.

• വാട്സാപ്പ് വഴിയോ എസ്എംഎസ് വഴിയോ നേരിട്ട് അഡ്മിറ്റ് കാർഡുകൾ ലിങ്കുകളായി അയച്ചുതരില്ല.

• ചോദ്യപേപ്പറോ, ഉത്തരസൂചികയോ, 'ചോർന്ന മെറ്റീരിയലുകളോ' സന്ദേശങ്ങൾ വഴി എൻടിഎ നൽകില്ല.

• വാട്സാപ്പ് സന്ദേശങ്ങൾ 'ബ്രോഡ്കാസ്റ്റ്' മാത്രമായിരിക്കും. അതിലേക്ക് തിരിച്ച് മറുപടി അയക്കാനോ, ഒടിപി, മറ്റ് വ്യക്തിഗത വിവരങ്ങൾ എന്നിവ പങ്കുവെക്കാനോ ആവശ്യപ്പെടില്ല.

പഴയ അഡ്മിറ്റ് കാർഡുകൾ അസാധുവാണ്

മേയ് 3-ലെ പരീക്ഷയുടെ അഡ്മിറ്റ് കാർഡുകൾക്ക് ഇനി പ്രാബല്യമില്ല. സുതാര്യത ഉറപ്പാക്കാൻ പല വിദ്യാർത്ഥികൾക്കും പുതിയ പരീക്ഷാ കേന്ദ്രങ്ങളും പുതിയ റോൾ നമ്പറുകളുമാണ് അനുവദിച്ചിരിക്കുന്നത്. അതിനാൽ ജൂൺ 21-ലെ പുതിയ അഡ്മിറ്റ് കാർഡ് നിർബന്ധമായും കൈവശം കരുതണം. പുതിയ അഡ്മിറ്റ് കാർഡ് ഇതിനകം ഡൗൺലോഡ് ചെയ്ത് പ്രിന്റ് എടുത്തവർ വീണ്ടും ചെയ്യേണ്ടതില്ല. ഇതുവരെ ഡൗൺലോഡ് ചെയ്യാത്തവർക്ക് വേണ്ടി മാത്രമാണ് ഇപ്പോൾ ഓർമ്മപ്പെടുത്തൽ സന്ദേശങ്ങൾ അയക്കുന്നത്.