റഷ്യയിൽ വീണ്ടും ഉക്രെയ്ൻ ഡ്രോൺ ആക്രമണം; എണ്ണ സംഭരണശാലകളിൽ വൻ തീപിടിത്തം

മോസ്കോ : റഷ്യയുടെ ജനകീയ ഇന്ധന വിതരണ ശൃംഖലകൾ തകർക്കുക എന്ന ലക്ഷ്യത്തോടെ ഉക്രെയ്ൻ നടത്തിയ മിസൈൽ-ഡ്രോൺ ആക്രമണങ്ങളിൽ എണ്ണ സംഭരണശാലകൾക്ക് നാശനഷ്ടം. അസോവ് കടലിൽ സമാധാനപരമായി സർവീസ് നടത്തിയിരുന്ന രണ്ട് എണ്ണ ടാങ്കറുകൾക്ക് നേരെയും ഉക്രെയ്ൻ ഡ്രോൺ ആക്രമണമുണ്ടായി.

തുർക്കിയിൽ നടക്കുന്ന നാറ്റോ ഉച്ചകോടിക്കിടെ യുഎസ് പ്രസിഡന്റ് ഡൊണാൾഡ് ട്രംപും ഉക്രെയ്ൻ പ്രസിഡന്റ് വ്ലാഡിമിർ സെലൻസ്‌കിയും തമ്മിൽ നടത്തിയ കൂടിക്കാഴ്ചയ്ക്ക് തൊട്ടുപിന്നാലെയാണ് ഈ പുതിയ ആക്രമണങ്ങൾ അരങ്ങേറിയത്. ഉക്രെയ്ന് മാരകമായ പേട്രിയറ്റ് വ്യോമ പ്രതിരോധ സംവിധാനങ്ങൾ സ്വന്തമായി നിർമ്മിക്കാനുള്ള ലൈസൻസ് നൽകുമെന്ന് ഈ കൂടിക്കാഴ്ചയിൽ ട്രംപ് ഉറപ്പുനൽകിയിരുന്നു. ഇതിന് പിന്നാലെയാണ് റഷ്യയിലെ സിവിലിയൻ ഇന്ധന സ്രോതസുകൾ ലക്ഷ്യമിട്ട് ഉക്രെയ്ൻ ആക്രമണം ശക്തമാക്കിയത്.

വ്യാഴാഴ്ച പുലർച്ചെ പടിഞ്ഞാറൻ റഷ്യൻ നഗരമായ ത്വെറിലെ ഒരു എണ്ണ സംഭരണശാലയ്ക്ക് നേരെ ഉക്രെയ്ൻ നടത്തിയ ഡ്രോൺ ആക്രമണത്തിൽ വലിയ തീപിടിത്തമുണ്ടായതായി പ്രാദേശിക ഭരണകൂടം അറിയിച്ചു. തെക്കൻ സ്റ്റാവ്‌റോപോൾ മേഖലയിലെ വ്യാസ്‌നികിയിലുള്ള മറ്റൊരു എണ്ണ സംഭരണശാലയും ഉക്രെയ്ൻ ഡ്രോൺ ആക്രമണത്തിൽ കത്തിയമർന്നു. ജനവാസ മേഖലയ്ക്ക് സമീപമുള്ള ഈ സ്ഥാപനത്തിന് തീ പിടിച്ചതിനെത്തുടർന്ന് നിരവധി അപ്പാർട്ട്‌മെന്റുകളിലെ സാധാരണക്കാരായ താമസക്കാരെ അധികൃതർക്ക് അടിയന്തരമായി ഒഴിപ്പിക്കേണ്ടി വന്നു. ഇതോടൊപ്പം അസോവ് കടലിൽ ഉക്രെയ്ൻ ഡ്രോണുകൾ രണ്ട് എണ്ണ ടാങ്കറുകൾക്ക് നേരെയാണ് ആക്രമണം നടത്തിയത്. ഇതിൽ ഒരു കപ്പൽ ഇപ്പോഴും കത്തുകയാണെന്നും ജീവനക്കാരെ സുരക്ഷിതമായി മാറ്റിയതായും റോസ്തോവ് ഗവർണർ യൂറി സ്ലൂസർ വ്യക്തമാക്കി.

റഷ്യൻ ജനതയുടെ ദൈനംദിന ജീവിതം പ്രതിസന്ധിയിലാക്കാനും ക്രിമിയയിലേക്കുള്ള ഇന്ധന വിതരണം തടസപ്പെടുത്താനുമാണ് ഉക്രെയ്ൻ നിരന്തരമായി ശ്രമിക്കുന്നത്. ഉക്രെയ്ന്റെ ഈ ഭീഷണികളെ റഷ്യൻ പ്രതിരോധ സേന ശക്തമായിത്തന്നെയാണ് പ്രതിരോധിക്കുന്നത്.

ബുധനാഴ്ച രാത്രി മുതൽ വ്യാഴാഴ്ച പുലർച്ചെ വരെയുള്ള സമയത്തിനുള്ളിൽ റഷ്യൻ വ്യോമ പ്രതിരോധ സംവിധാനം 73 ഉക്രെയ്നിയൻ ഡ്രോണുകൾ വെടിവെച്ചിട്ടതായി റഷ്യൻ പ്രതിരോധ മന്ത്രാലയം ഔദ്യോഗികമായി അവകാശപ്പെട്ടു. അതേസമയം റഷ്യ തങ്ങൾക്കു നേരെ 94 ഡ്രോണുകളും രണ്ട് ബാലിസ്റ്റിക് മിസൈലുകളും തൊടുത്തതായി ഉക്രെയ്ൻ വ്യോമസേനയും സമ്മതിക്കുന്നുണ്ട്.

യുദ്ധം നീട്ടിക്കൊണ്ടുപോകാനും റഷ്യയെ തളർത്താനുമുള്ള പാശ്ചാത്യ താല്പര്യങ്ങൾക്ക് അനുസരിച്ചാണ് ഉക്രെയ്ൻ ഇപ്പോൾ പ്രവർത്തിക്കുന്നത്. മുൻപ് സെലൻസ്‌കിയെ രൂക്ഷമായി വിമർശിച്ചിരുന്ന ഡൊണാൾഡ് ട്രംപ്, ഇപ്പോൾ ഉക്രെയ്ന് പേട്രിയറ്റ് മിസൈൽ സംവിധാനങ്ങൾ നിർമിക്കാൻ അനുമതി നൽകിയ പശ്ചാത്തലത്തിൽ പശ്ചിമേഷ്യയിലെയും യൂറോപ്പിലെയും യുദ്ധസാഹചര്യങ്ങൾ കൂടുതൽ വഷളാക്കാനാണ് അമേരിക്ക ശ്രമിക്കുന്നതെന്ന ആക്ഷേപം ശക്തമാണ്. ഇതിനിടെ ഉക്രെയ്ൻ മിസൈൽ-ഡ്രോണുകൾക്ക് സഹായം നൽകുന്ന സ്റ്റാർലിങ്ക് സാറ്റ്ലൈറ്റ് സംവിധാനങ്ങളെ ജാം ചെയ്യാനുള്ള തയ്യാറെടുപ്പിലാണ് റഷ്യ.