ഹോർമൂസ് സാധാരണ നിലയിലേക്ക്; ആദ്യ കപ്പൽ ഇന്ന് ഗുജറാത്തിൽ: ഊർജ പ്രതിസന്ധിക്ക് അയവുവരും

ന്യൂഡൽഹി: യുഎസ് സൈനിക ഉപരോധം നീക്കിയതിനെ തുടർന്ന് പശ്ചിമേഷ്യയിലെ തന്ത്രപ്രധാന കപ്പൽപ്പാതയായ ഹോർമൂസ് സാധാരണ നിലയിലേക്ക് തിരിച്ചെത്തുന്നു. ഉപരോധം പിൻവലിച്ചതിനു ശേഷം ഇന്ത്യ ലക്ഷ്യമാക്കി പുറപ്പെട്ട ആദ്യ എൽഎൻജി കപ്പൽ ഇന്ന് ഗുജറാത്തിലെ ദഹേജ് തുറമുഖത്ത് എത്തിച്ചേരും. പശ്ചിമേഷ്യൻ മേഖലയിലെ യുദ്ധാന്തരീക്ഷം കാരണം കഴിഞ്ഞ മൂന്ന് മാസത്തിലേറെയായി ഈ കപ്പൽ അവിടെ കുടുങ്ങിക്കിടക്കുകയായിരുന്നു.

രാജ്യത്തിന് ഏറെ നിർണായകമായ 62,370 മെട്രിക് ടൺ ദ്രവീകൃത പ്രകൃതി വാതകമാണ് (എൽഎൻജി) ഈ കപ്പലിലുള്ളത്. ആദ്യ കപ്പൽ വിജയകരമായി ഈ പാത പിന്നിട്ടതോടെ, ഇതേ മേഖലയിൽ കുടുങ്ങിക്കിടക്കുന്ന ഇന്ധനവും രാസവളവും അടങ്ങിയ മറ്റ് 34 ഇന്ത്യൻ കപ്പലുകൾ കൂടി എത്രയും വേഗം രാജ്യത്തേക്ക് പുറപ്പെടാൻ ഒരുങ്ങുകയാണ്.

അതേസമയം, ഒമാൻ തീരത്തുണ്ടായ യുഎസ് ആക്രമണത്തിൽ മൂന്ന് ഇന്ത്യൻ നാവികർ കൊല്ലപ്പെട്ട പശ്ചാത്തലത്തിൽ, മടങ്ങിവരുന്ന കപ്പലുകളുടെ സുരക്ഷ കേന്ദ്രസർക്കാർ അതീവ ജാഗ്രതയോടെയാണ് നിരീക്ഷിക്കുന്നത്. ഈ കപ്പലുകൾ കൂടി സുരക്ഷിതമായി ഇന്ത്യൻ തീരത്ത് എത്തുന്നതോടെ, കഴിഞ്ഞ കുറച്ചുനാളുകളായി രാജ്യം നേരിട്ടുകൊണ്ടിരിക്കുന്ന കടുത്ത ഊർജ പ്രതിസന്ധിക്ക് വലിയ തോതിൽ അയവുവരുമെന്നാണ് വിലയിരുത്തപ്പെടുന്നത്.