ഫ്രാൻസിന്റെ വൈനിനും ഷാംപെയിനുകൾക്കും 200 ശതമാനം നികുതി ചുമത്തുമെന്ന് ട്രംപ്

ഗാസ പുനരധിവാസ പദ്ധതിക്കായി ആരംഭിച്ച "ബോര്‍ഡ് ഓഫ് പീസ്"നെ ഐക്യരാഷ്ട്രസഭയ്ക്ക് ബദലായി ഉയര്‍ത്തിക്കൊണ്ടുവരാനുള്ള ശ്രമത്തിൽ പങ്കാളിയാവാൻ വിസമ്മതിച്ചതിന് ഫ്രാൻസിനെതിരെ പ്രതികാര നികുതി ഭീഷണിയുമായി ഡൊണൾഡ് ട്രംപ്.ഫ്രഞ്ച് വൈനുകൾക്കും ഷാംപെയ്‌നുകൾക്കും 200%തീരുവ ചുമത്തുമെന്നാണ് ഭീഷണി.ഫ്രഞ്ച് പ്രസിഡന്റ് ഇമ്മാനുവൽ മാക്രോണിനെ ഇതുവഴി തന്റെ ലക്ഷ്യത്തിലേക്ക് വരുത്താൻ പ്രേരിപ്പിക്കുമെന്ന് അദ്ദേഹം അവകാശപ്പെട്ടു.

ബോർഡിൽ ചേരില്ലെന്ന് മാക്രോൺ പറഞ്ഞതിനെക്കുറിച്ച് ഒരു റിപ്പോർട്ടർ ചോദിച്ചപ്പോൾ, "അദ്ദേഹം അങ്ങനെ പറഞ്ഞോ?ശരി,ആരും അദ്ദേഹത്തെ ആഗ്രഹിക്കുന്നില്ല,കാരണം അദ്ദേഹം ഉടൻ തന്നെ സ്ഥാനമൊഴിയും"എന്നായിരുന്നു മറുപടി.

"അദ്ദേഹത്തിന്റെ വൈനുകൾക്കും ഷാംപെയ്‌നുകൾക്കും ഞാൻ 200%തീരുവ ചുമത്തും,ഇതോടെ അദ്ദേഹം ചേരും,അല്ലെങ്കിൽ അദ്ദേഹം ചേരേണ്ടതില്ല,"ട്രംപ് പറഞ്ഞു.

കഴിഞ്ഞ സെപ്റ്റംബറിൽ ഗാസയിലെ യുദ്ധം അവസാനിപ്പിക്കാനുള്ള തന്റെ പദ്ധതി പ്രഖ്യാപിച്ചപ്പോഴാണ് ട്രംപ് ബോർഡ് ഓഫ് പീസ് സ്ഥാപിക്കാൻ നീക്കമാരംഭിച്ചത്.കഴിഞ്ഞ ആഴ്ച ലോക നേതാക്കൾക്ക് അയച്ച ക്ഷണക്കത്തിൽ ഇതിനെ ആഗോളതലത്തിൽ സംഘർഷങ്ങൾ അവസാനിപ്പിക്കുന്നതിനുള്ള വിശാലമായ വേദിയായി വിശേഷിപ്പിച്ച് വിപുലപ്പെടുത്തി.യുഎൻ നിബന്ധന പ്രകാരം 2027ൽ പിരിച്ചു വിടേണ്ട ബോര്‍ഡാണ്.

ഐക്യരാഷ്ട്രസഭയുടെ പ്രവർത്തനങ്ങളെ ദോഷകരമായി ബാധിക്കുമെന്ന് നയതന്ത്രജ്ഞർ മുന്നറിയിപ്പ് നൽകിയ ബോര്‍ഡിലേക്കുള്ള ക്ഷണത്തോട് വിവിധ രാജ്യങ്ങൾ ജാഗ്രതയോടെയാണ് പ്രതികരിച്ചത്.

ജനുവരി 22 ന് സ്വിറ്റ്സർലൻഡിലെ ദാവോസിൽ വെച്ച് ബോര്‍ഡ് ഓഫ് പീസിന്റെ പൂർണ്ണമായ ഭരണഘടനയും പരിധിയും സംബന്ധിച്ച കരാര്‍ പ്രാവര്‍ത്തികമാക്കാനായിരുന്നു ട്രംപ് ആഗ്രഹിച്ചതെന്ന് യു എസ് മാധ്യമങ്ങൾ റിപ്പോര്‍ട്ട് ചെയ്യുന്നു.