രസതന്ത്ര നൊബേൽ മൂന്ന്‌ പേർക്ക്‌; മെറ്റൽ-ഓർ​ഗാനിക് ഫ്രെയിംവർക്കുകൾ വികസിപ്പിച്ചതിന്

സ്റ്റോക്ഹോം: 2025ലെ രസതന്ത്ര നൊബേൽ പ്രഖ്യാപിച്ചു. സുസുമു കിറ്റഗാവ, റിച്ചാർഡ് റോബ്സൺ, ഒമർ എം യാഗി എന്നിരാണ് പുരസ്കാരത്തിന് അർഹരായത്. മെറ്റൽ- ഓർ​ഗാനിക് ഫ്രെയിംവർക്കുകൾ വികസിപ്പിച്ചതിനാണ് പുരസ്കാരം.

മരുഭൂമിയിലെ വായുവിൽ നിന്ന് പോലും വെള്ളം ശേഖരിക്കുന്നതിനും, കാർബൺ ഡൈ ഓക്സൈഡ് പിടിച്ചെടുക്കുന്നതിനും, വിഷവാതകങ്ങൾ സംഭരിക്കുന്നതിനും അല്ലെങ്കിൽ രാസ പ്രവർത്തനങ്ങളെ ഉത്തേജിപ്പിക്കുകയും ചെയ്യുന്നതിന് മെറ്റൽ - ഓർ​ഗാനിക് ഫ്രെയിം വർക്കുകൾ പ്രയോജനപ്പെടും. 11 ദശലക്ഷം സ്വീഡിഷ് ക്രോണർ (ഏകദേശം1.03 കോടി) ക്യാഷ് അവാർഡ് അടങ്ങുന്നതാണ് പുരസ്കാരം. ഡിസംബർ 10 ന് പുരസ്കാരം സമ്മാനിക്കും.

റോയല്‍ സ്വീഡിഷ് അക്കാദമി ഓഫ് സയന്‍സസിന്റെ സെക്രട്ടറി ജനറല്‍ ഹാന്‍സ് എല്ലെഗ്രെന്‍ ആണ് രസതന്ത്ര നൊബേല്‍ പ്രഖ്യാപിച്ചത്. 2025ലെ വൈദ്യശാസ്ത്ര, ഭൗതികശാസ്ത്ര നൊബേലുകൾ കഴിഞ്ഞ ദിവസം പ്രഖ്യാപിച്ചിരുന്നു. സാഹിത്യ, സമാധാന, സാമ്പത്തിക ശാസ്ത്ര പുരസ്‌കാര ജേതാക്കളെ യഥാക്രമം 9, 10, 13 തീയതികളിൽ പ്രഖ്യാപിക്കും.