മാലിന്യക്കൂമ്പാരമായി എവറസ്റ്റ് കൊടുമുടി; ഉപേക്ഷിക്കപ്പെട്ട ടെന്റുകളും ഓക്സിജൻ സിലിണ്ടറുകളും, വീഡിയോ

കാഠ്മണ്ഡു: ലോകത്തിലെ ഏറ്റവും ഉയർന്ന കൊടുമുടിയായ മൗണ്ട് എവറസ്റ്റ് മനുഷ്യനിർമ്മിത മാലിന്യങ്ങളാൽ വീർപ്പുമുട്ടുന്നതായി റിപ്പോർട്ട്. എവറസ്റ്റിന്റെ ഏറ്റവും ഉയർന്ന താവളങ്ങളിലൊന്നായ ക്യാമ്പ് 4 (Camp 4)-ൽ പ്ലാസ്റ്റിക് അവശിഷ്ടങ്ങളും ഉപേക്ഷിക്കപ്പെട്ട ടെന്റുകളും ഓക്സിജൻ സിലിണ്ടറുകളും കുന്നുകൂടിക്കിടക്കുന്ന ദൃശ്യങ്ങളാണ് ഇപ്പോൾ പുറത്തുവന്നിരിക്കുന്നത്.

പർവ്വതാരോഹകരിൽ ഒരാൾ പകർത്തിയ ദൃശ്യങ്ങൾ സമൂഹമാധ്യമങ്ങളിൽ വ്യാപകമായ ചർച്ചകൾക്കും പരിസ്ഥിതി ആശങ്കകൾക്കും വഴിതുറന്നിരിക്കുകയാണ്. റെക്കോർഡ് പർവ്വതാരോഹണം നടന്ന പുതിയ സീസണിന് പിന്നാലെയാണ് കൊടുമുടിയിലെ ഈ പരിതാപകരമായ അവസ്ഥ വെളിപ്പെട്ടിരിക്കുന്നത്.

ക്യാമ്പ് ചെയ്ത സ്ഥലങ്ങളിൽ പർവ്വതാരോഹകർ ഉപയോഗിച്ച ശേഷം ഉപേക്ഷിച്ചുപോയ തകർന്ന ടെന്റുകൾ, ശൂന്യമായ ഓക്സിജൻ കുപ്പികൾ, പ്ലാസ്റ്റിക് കവറുകൾ, മറ്റ് ഗൃഹോപകരണങ്ങൾ എന്നിവ മഞ്ഞിനിടയിൽ ചിതറിക്കിടക്കുന്നത് വീഡിയോയിൽ വ്യക്തമായി കാണാം.

സമുദ്രനിരപ്പിൽ നിന്ന് വളരെ ഉയർന്ന പ്രദേശമായതിനാൽ ഇവിടുത്തെ കടുത്ത കാലാവസ്ഥയും ഓക്സിജന്റെ കുറവും കാരണം മാലിന്യങ്ങൾ നീക്കം ചെയ്യുന്നത് അതീവ ദുഷ്കരമാണ്. പല അവശിഷ്ടങ്ങളും മഞ്ഞുകട്ടകൾക്കുള്ളിൽ ഉറച്ചുപോയ അവസ്ഥയിലാണ്. ഇവ വലിയ പ്രയത്നത്തിലൂടെ മാത്രമേ കുഴിച്ചെടുക്കാൻ സാധിക്കൂ.

നേപ്പാൾ സർക്കാരിന്റെയും വിവിധ സന്നദ്ധ സംഘടനകളുടെയും നേതൃത്വത്തിൽ എവറസ്റ്റ് ശുചീകരണ യത്നങ്ങൾ നടക്കാറുണ്ടെങ്കിലും, ഓരോ വർഷവും എത്തുന്ന പർവ്വതാരോഹകരുടെ എണ്ണത്തിലുണ്ടാകുന്ന വർദ്ധനവ് മാലിന്യ പ്രതിസന്ധി ഇരട്ടിയാക്കുകയാണ്.

പരിസ്ഥിതിക്ക് കടുത്ത ഭീഷണിയുയർത്തുന്ന ഈ പ്രവണതയ്ക്കെതിരെ അന്താരാഷ്ട്ര തലത്തിൽ വലിയ വിമർശനങ്ങളാണ് ഉയരുന്നത്. പർവ്വതാരോഹകർ തങ്ങൾ കൊണ്ടുവരുന്ന സാധനങ്ങളും അവശിഷ്ടങ്ങളും തിരികെ കൊണ്ടുവരണമെന്ന കർശന നിയമമുണ്ടെങ്കിലും ഇത് പലപ്പോഴും ലംഘിക്കപ്പെടുകയാണെന്ന് പരിസ്ഥിതി പ്രവർത്തകർ ചൂണ്ടിക്കാണിക്കുന്നു.

എവറസ്റ്റിന്റെ ആവാസവ്യവസ്ഥ സംരക്ഷിക്കുന്നതിനായി വരും ദിവസങ്ങളിൽ നേപ്പാൾ സർക്കാർ കൂടുതൽ കർശനമായ നിയന്ത്രണങ്ങൾ ഏർപ്പെടുത്തിയേക്കുമെന്നാണ് സൂചന