ഇന്ധനം കിട്ടാനില്ല, ഗതാഗതം സ്തംഭിച്ചു; മാലിയിൽ സ്കൂളുകളും സർവ്വകലാശാലകളും അടച്ചു

ബമാകോ: തീവ്രവാദികൾ ഏർപ്പെടുത്തിയ ഇന്ധന ഇറക്കുമതി ഉപരോധത്തിന് തുടർച്ചയായി മാലിയിൽ രാജ്യവ്യാപകമായി സ്കൂളുകളും സർവകലാശാലകളും അടച്ചു. സ്കൂൾ,സർവ്വകലാശാല ജീവനക്കാരുടെയും വിദ്യാർഥികളുടെയും യാത്ര തടസ്സപ്പെട്ടതോടെയാണ് അടച്ചു പൂട്ടൽ വേണ്ടി വന്നതെന്ന് സർക്കാർ.

 ഇന്ധന വിതരണത്തിലെ തടസ്സങ്ങൾ കാരണം  രണ്ടാഴ്ചത്തേക്ക് ക്ലാസുകൾ നിർത്തിവയ്ക്കുകയാണെന്ന് വിദ്യാഭ്യാസ മന്ത്രി അമാദൗ സി സവാനെ സംസ്ഥാന ടെലിവിഷനിൽ പ്രഖ്യാപിച്ചു.

മാലിയുടെ തലസ്ഥാനമായ ബമാകോയിൽ, ഗ്യാസ് സ്റ്റേഷനുകൾക്ക് മുന്നിൽ അനന്തമായ ക്യൂകൾ തുടരുന്നു. ഇന്ധനക്ഷാമം സാധനങ്ങളുടെയും ഗതാഗതത്തിന്റെയും ചെലവ് കുത്തനെ ഉയർത്തിയിരിക്കുന്നു. 25 ദശലക്ഷം ജനസംഖ്യയുള്ള രാജ്യത്ത് എല്ലാ ഗതാഗത മാർഗ്ഗങ്ങളും പ്രതിസന്ധിയിലാണ്.

ബമാകോയിലെ വൈദ്യുതി തടസ്സവും സ്ഥിതി കൂടുതൽ വഷളാക്കുന്നതായാണ് റിപ്പോർട്ട്. ചില പ്രദേശങ്ങളിൽ വൈദ്യുതി വിതരണം വെറും ആറ് മണിക്കൂറായി കുറച്ചതായി സർക്കാർ ഉടമസ്ഥതയിലുള്ള വൈദ്യുതി സ്ഥാപനത്തിലെ ഒരു ഉദ്യോഗസ്ഥനെ ഉദ്ധരിച്ച് എഎഫ്‌പി റിപ്പോർട്ട് ചെയ്തു.

അതിർത്തി പ്രദേശങ്ങളിൽ നിന്ന് ഇന്ധന ട്രക്കുകൾ തലസ്ഥാനമായ ബമാകോയിലേക്ക് കൊണ്ടുപോകാൻ സൈന്യം ശ്രമിച്ചു. ചില ട്രക്കുകൾ എത്തിയെങ്കിലും മറ്റുള്ളവ തീവ്രവാദികൾ ആക്രമിച്ചു.

അൽ-ഖ്വയ്ദ പിന്തുണയുള്ള ജമാഅത്ത് നുസ്രത്ത് അൽ-ഇസ്ലാം വൽ മുസ്ലിമിൻ ഗ്രൂപ്പിലെ തീവ്രവാദികളാണ് ഉപരോധത്തിന് പിന്നിൽ. സെപ്റ്റംബർ ആദ്യം അയൽ രാജ്യങ്ങളിൽ നിന്ന് മാലിയിലേക്കുള്ള ഇന്ധന ഇറക്കുമതി നിരോധിക്കുമെന്ന് പ്രഖ്യാപിച്ചിരുന്നു.  കരയാൽ ചുറ്റപ്പെട്ട രാജ്യത്തിന് മറ്റ് വഴികളില്ല. ദുർബലമായ സമ്പദ്‌വ്യവസ്ഥയെ ഞെരുക്കുകയാണ്.

നൂറുകണക്കിന് ഇന്ധന ട്രക്കുകൾ അതിർത്തിയിൽ കുടുങ്ങിക്കിടക്കുകയും ചെയ്യുന്നു. അയൽരാജ്യമായ ബുർക്കിന ഫാസോ, നൈജർ എന്നിവയ്‌ക്കൊപ്പം മാലിയും അൽ-ഖ്വയ്ദയുമായും ഇസ്ലാമിക് സ്റ്റേറ്റ് ഗ്രൂപ്പുമായും പ്രാദേശിക വിമതരുമായും ചെറുത്തു നിൽപ്പിലാണ്.

പശ്ചിമാഫ്രിക്കൻ രാജ്യമായ മാലിയുടെ ഗ്രാമപ്രദേശങ്ങളിൽ ആയുധങ്ങളും സ്വാധീനവും ശേഖരിച്ച് വളർന്ന ഗ്രൂപ്പുകൾ ഇപ്പോൾ തലസ്ഥാനത്തെയും ഞെരുക്കുകയാണ്.

2021 ലാണ് അട്ടിമറിയിലൂടെ മാലിയിൽ ഇപ്പോഴത്തെ സൈനിക നേതൃത്വം അധികാരമേറ്റത്. റഷ്യൻ കൂലിപ്പടയാളികളുമായി സഹകരിച്ചും വാഗ്നർ ഗ്രൂപ്പുമായും ആഫ്രിക്ക കോർപ്സുമായും സഹകരിച്ചും മാലിയൻ സൈനികർ തീവ്രവാദികളെ നേരിടാൻ ശ്രമിച്ചിരുന്നു.

2017-ൽ ആണ് മാലിയിൽ നാല് ഇസ്ലാമിക തീവ്രവാദ ഗ്രൂപ്പുകളെ സംയോജിപ്പിക്കുന്ന ഒരു സംഘടനയായി ജമാഅത്ത് നുസ്രത്ത് അൽ-ഇസ്ലാം വൽ മുസ്ലിമിൻ (JNIM) സ്ഥാപിതമാവുന്നത്. അതിന്റെ നേതാക്കൾ അൽ-ഖ്വയ്ദയോട് കൂറ് പുലർത്താൻ പ്രതിജ്ഞയെടുത്തു. വടക്കൻ പ്രദേശങ്ങളിൽ നിന്നുള്ള ഇയാദ് അഗ് ഘാലിയുടെയും മധ്യ മാലിയിൽ നിന്നുള്ള പ്രസംഗകനായ അമദൗ കൂഫയുടെയും നേതൃത്വത്തിൽ പ്രവർത്തിച്ചു. സിവിലിയൻമാരെ സംരക്ഷിച്ചു കൊണ്ട് സർക്കാർ സംവിധാനങ്ങളെ ലക്ഷ്യമാക്കിയാണ് ഇവർ പ്രധാനമായും അക്രമം കേന്ദ്രീകരിച്ചിരുന്നത്. ഇത് ഭരണകൂടം അവഗണിക്കുന്ന വിദൂര സമൂഹങ്ങളിൽ അടിസ്ഥാന പിന്തുണ വളർത്താൻ സഹായിച്ചതായി വിലയിരുത്തപ്പെടുന്നു.

JNIM നിയന്ത്രിക്കുന്ന പ്രദേശങ്ങളിൽ, ഇപ്പോൾ അവർ വർദ്ധിച്ചുവരുന്ന ആത്മവിശ്വാസത്തോടെയും ദൃശ്യപരതയോടെയും പ്രവർത്തിക്കുന്നുവെന്ന് സഹേൽ സ്പെഷ്യലിസ്റ്റും സൗഫാൻ സെന്ററിലെ മുതിർന്ന ഗവേഷണ സഹപ്രവർത്തകനുമായ വാസിം നാസർ അഭിപ്രയാപ്പെടുന്നു.