യുഎസ് നിയന്ത്രണം മറികടന്ന് ഇറാനിയൻ എണ്ണക്കപ്പലുകൾ; ഒമാൻ ഉൾക്കടലിലെ ഉപരോധ രേഖ മറികടന്നു

ഗൾഫ് : യുഎസ് ഉപരോധം നിലനിൽക്കെ, വൻതോതിൽ ക്രൂഡ് ഓയിലുമായി മൂന്ന് ഇറാനിയൻ കപ്പലുകൾ ഒമാൻ ഉൾക്കടലിലെ ഉപരോധ രേഖ മറികടന്നു. 'ദിയോണ', 'ഹീറോ 2', 'സോണിയ 1' എന്നീ കപ്പലുകളാണ് യുഎസ് നിയന്ത്രണങ്ങളെ മറികടന്നത്. മാർച്ചിന് ശേഷം ആദ്യമായാണ് ഈ കപ്പലുകൾ ലൊക്കേഷൻ പുറത്തുവിട്ട് യാത്ര ചെയ്യുന്നത്. രണ്ട് മാസത്തെ ഇടവേളയ്ക്ക് ശേഷമുള്ള ഇറാനിയൻ എണ്ണയുടെ ആദ്യ കയറ്റുമതിയാണിത്. ഏകദേശം 3.8 ദശലക്ഷം ബാരൽ ക്രൂഡ് ഓയിലാണ് ഈ മൂന്ന് കപ്പലുകളിലായി ഉള്ളത്.

ഇറാനിലെ ചാബഹാർ തുറമുഖത്തുനിന്ന് ചൊവ്വാഴ്ചയാണ് 'ഹീറോ 2'-ഉം 'സോണിയ 1'-ഉം പുറപ്പെട്ടത്. ഉപരോധ രേഖ കടന്നതിന് തൊട്ടുപിന്നാലെയാണ് 'ദിയോണ' തന്റെ ലൊക്കേഷൻ വ്യക്തമാക്കാൻ തുടങ്ങിയത്. യുഎസ് ട്രഷറിയുടെ ഉപരോധ പട്ടികയിലുള്ള നാഷണൽ ഇറാനിയൻ ടാങ്കർ കമ്പനിയുടേതാണ് ഈ കപ്പലുകൾ. ഇറാനിയൻ തുറമുഖങ്ങൾക്കുള്ള ഉപരോധം ഉടനടി നീക്കം ചെയ്യുമെന്ന് ഞായറാഴ്ച യുഎസ് പ്രസിഡന്റ് ഡോണാൾഡ്‌ ട്രംപ് പ്രഖ്യാപിച്ചിരുന്നുവെങ്കിലും, വെള്ളിയാഴ്ച സ്വിറ്റ്‌സർലൻഡിൽ കരാർ ഒപ്പിടും വരെ ഉപരോധം തുടരുമെന്ന് യുഎസ് നാവികസേന വ്യക്തമാക്കിയിരുന്നു. ഈ മുന്നറിയിപ്പ് അവഗണിച്ചുകൊണ്ടാണ് ഇറാൻ കപ്പലുകൾ സമുദ്രപാതയിൽ സജീവമായത്.

ഇറാനുമായുള്ള കരാറിന്റെ പ്രഖ്യാപനത്തിന് ശേഷം ഇറാനിയൻ കപ്പലുകൾ ലോകമെമ്പാടും കൂടുതൽ സജീവമായതായി 'യുണൈറ്റഡ് എഗെയ്ൻസ്റ്റ് ന്യൂക്ലിയർ ഇറാൻ' എന്ന നിരീക്ഷണ സംഘം ചൂണ്ടിക്കാട്ടുന്നു. ഇതിന്റെ ഭാഗമായി മലേഷ്യയ്ക്കും ഇന്തോനേഷ്യയ്ക്കും ഇടയിലുള്ള മലാക്ക കടലിടുക്കിൽ 'ഡാൻ', 'സിനോപ്പ' എന്നീ രണ്ട് കപ്പലുകളും ചൊവ്വാഴ്ച മുതൽ സ്ഥാനം വെളിപ്പെടുത്തി രംഗത്തെത്തിയിട്ടുണ്ട്. മെയ് മാസത്തിൽ ഇറാനിയൻ ക്രൂഡ് ഓയിൽ കയറ്റുമതി പ്രതിദിനം 260,000 ബാരലായി കുറഞ്ഞിരുന്നു. കഴിഞ്ഞ ആറ് വർഷത്തിനിടയിലെ ഏറ്റവും കുറഞ്ഞ നിരക്കായിരുന്നു ഇത്. കപ്പലുകൾ നിലവിൽ തങ്ങളുടെ ലക്ഷ്യസ്ഥാനം വെളിപ്പെടുത്തിയിട്ടില്ല. നിരീക്ഷണത്തിലായിരുന്ന മറ്റൊരു കപ്പലായ 'സ്ട്രീം', ഉപരോധ രേഖയ്ക്ക് തൊട്ടുമുമ്പ് ലൊക്കേഷൻ ട്രാക്കർ ഓഫ് ചെയ്യുകയും ഇറാനിലേക്ക് തിരിച്ചുപോവുകയും ചെയ്തതായും വിവരങ്ങളുണ്ട്.