ഇന്തോനേഷ്യയിൽ ബസ്സും ഓയിൽ ടാങ്കറും കൂട്ടിയിടിച്ച് തീപിടുത്തം; 16 മരണം, നിരവധി പേർക്ക് പരിക്ക്

ജക്കാർത്ത: ഇന്തോനേഷ്യയിലെ സുമാത്ര ദ്വീപിലുണ്ടായ വാഹനാപകടത്തിൽ 16 പേർ കൊല്ലപ്പെട്ടു. യാത്രക്കാരുമായി പോയ ദീർഘദൂര ബസ്സും ഇന്ധന ടാങ്കറും തമ്മിൽ കൂട്ടിയിടിച്ചാണ് അപകടമുണ്ടായത്. കൂട്ടിയിടിക്ക് പിന്നാലെ ഇരു വാഹനങ്ങൾക്കും തീപിടിച്ചത് മരണസംഖ്യ ഉയരാൻ കാരണമായി.

ബുധനാഴ്ച ഉച്ചയോടെ ദക്ഷിണ സുമാത്രയിലെ നോർത്ത് മുസി റവാസ് പ്രവിശ്യയിലാണ് അപകടം നടന്നത്. ലുബുക്ലിംഗാവുവിൽ നിന്ന് മേദനിലേക്ക് വരികയായിരുന്ന എഎൽഎസ് കമ്പനിയുടെ ബസ്സാണ് അപകടത്തിൽപ്പെട്ടത്. ബസ്സിലെ 14 യാത്രക്കാരും ടാങ്കർ ലോറിയിലുണ്ടായിരുന്ന രണ്ട് പേരുമാണ് കൊല്ലപ്പെട്ടത്.

ടയർ പൊട്ടിത്തെറിച്ചതിനെത്തുടർന്ന് നിയന്ത്രണം വിട്ട ബസ് ടാങ്കറിലേക്ക് ഇടിച്ചുകയറുകയായിരുന്നുവെന്നാണ് പ്രാഥമിക നിഗമനം. കൂട്ടിയിടിയുണ്ടായ ഉടൻ തന്നെ ടാങ്കറിലുണ്ടായിരുന്ന ഡീസലിന് തീപിടിക്കുകയും നിമിഷങ്ങൾക്കകം രണ്ട് വാഹനങ്ങളും പൂർണ്ണമായും കത്തിയമരുകയും ചെയ്തു.

അപകടത്തിൽ നിന്ന് രക്ഷപ്പെട്ട നാല് പേരെ ആശുപത്രിയിൽ പ്രവേശിപ്പിച്ചു. ഇതിൽ മൂന്ന് പേരുടെ നില അതീവ ഗുരുതരമാണ്. ഇവരുടെ ശരീരത്തിൽ സാരമായ പൊള്ളലേറ്റിട്ടുണ്ട്. വാഹനങ്ങൾക്കുള്ളിൽ കുടുങ്ങിക്കിടന്ന മൃതദേഹങ്ങൾ ഏറെ പ്രയത്നിച്ചാണ് പുറത്തെടുത്തത്.

പല മൃതദേഹങ്ങളും തിരിച്ചറിയാൻ കഴിയാത്ത വിധം കത്തിക്കരിഞ്ഞ നിലയിലായിരുന്നു. ഇന്തോനേഷ്യയിലെ റോഡുകളുടെ മോശം അവസ്ഥയും വാഹനങ്ങളുടെ കാലപ്പഴക്കവുമാണ് പലപ്പോഴും ഇത്തരം വലിയ അപകടങ്ങൾക്ക് കാരണമാകുന്നത്.

കഴിഞ്ഞ മാസവും സമാനമായ രീതിയിൽ ട്രെയിൻ അപകടത്തിൽ 16 പേർ കൊല്ലപ്പെട്ടിരുന്നു. പ്രാദേശിക ഭരണകൂടവും ദുരന്തനിവാരണ സേനയും സ്ഥലത്തെത്തി രക്ഷാപ്രവർത്തനങ്ങൾ ഏകോപിപ്പിച്ചു.