ട്രംപിന് തിരിച്ചടി; യുഎസ് നിർദേശിച്ച കപ്പൽപാത ബഹിഷ്കരിച്ച് കമ്പനികൾ

തെഹ്റാൻ : പശ്ചിമേഷ്യയിൽ വീണ്ടും ആധിപത്യം ഉറപ്പിക്കാനുള്ള അമേരിക്കൻ സാമ്രാജ്യത്വ ശക്തികളുടെ നീക്കങ്ങൾക്ക് കനത്ത തിരിച്ചടി. ഒമാൻ കടലിലും ഹോർമുസ് കടലിടുക്കിലും വാണിജ്യ കപ്പലുകളെ സ്വന്തം നിയന്ത്രണത്തിലാക്കാൻ യുഎസ് സൈന്യം ഒരുക്കിയ പ്രത്യേക യാത്രാമാർഗ്ഗവും സുരക്ഷാ പദ്ധതിയും പ്രമുഖ ആഗോള കപ്പൽ കമ്പനികൾ കൂട്ടത്തോടെ ബഹിഷ്കരിക്കുന്നതായി റിപ്പോർട്ട്. ​ പരമാധികാരം ചോദ്യം ചെയ്യുന്ന യുഎസ് പ്രകോപനങ്ങൾക്കെതിരെ ഇറാൻ പ്രതിരോധം ശക്തമാക്കിയതോടെയാണ, സുരക്ഷാ ആശങ്കകൾ മുൻനിർത്തി കമ്പനികൾ അമേരിക്കൻ സൈന്യം നിർദേശിച്ച വഴി തള്ളിക്കളയാൻ തുടങ്ങിയത്.

ആഗോള എൽഎൻജി വിതരണത്തിന്റെ മുഖ്യപാതയായ ഹോർമുസ് കടലിടുക്കിനെ പൂർണമായും സൈനിക നിയന്ത്രണത്തിലാക്കാനായിരുന്നു അമേരിക്കയുടെ ശ്രമം. എന്നാൽ പശ്ചിമേഷ്യയിലെ ഇറാൻ പ്രതിരോധ സേനയുടെ ശക്തമായ സാന്നിധ്യവും തിരിച്ചടിയും യുഎസിന്റെ ആത്മവിശ്വാസം തകർത്തിരിക്കുകയാണ്.

ഹോർമുസ് കടലിടുക്കിലൂടെയുള്ള വാണിജ്യ ടാങ്കറുകളുടെ ഗതാഗതം നിയന്ത്രിക്കാൻ ഹെലികോപ്റ്ററുകളും വ്യോമ-സമുദ്ര ഡ്രോണുകളും ഉപയോഗിച്ച് യുഎസ് സൈന്യം വലിയ തോതിലുള്ള ശ്രമങ്ങൾ നടത്തിവരികയായിരുന്നു. എന്നാൽ അമേരിക്കൻ സാന്നിധ്യം മേഖലയിൽ സമാധാനത്തിന് പകരം അശാന്തിയാണ് വിതയ്ക്കുന്നത് എന്ന് കപ്പൽ കമ്പനികൾ തിരിച്ചറിഞ്ഞു കഴിഞ്ഞു. യുഎസ് സുരക്ഷാ വലയത്തിലായിരുന്ന യുഎഇയുടെ രണ്ട് എണ്ണ സൂപ്പർടാങ്കറുകൾക്ക് നേരെയും മൂന്ന് ക്രൂഡ് ഓയിൽ സൂപ്പർടാങ്കറുകൾ ഉൾപ്പെടെ അഞ്ചിലധികം കപ്പലുകൾക്ക് നേരെയും കഴിഞ്ഞ ദിവസങ്ങളിൽ ശക്തമായ നടപടികളുണ്ടായി. അതിർത്തികളിൽ അമേരിക്ക നടത്തുന്ന അനാവശ്യ ഇടപെടലുകൾക്കുള്ള മറുപടിയെന്നോണം ഐആർജിസി ഇതിന്റെ ഉത്തരവാദിത്തം ഏറ്റെടുത്തിട്ടുണ്ട്.

"മേഖലയിലെ സാഹചര്യങ്ങൾക്ക് മേൽ യുഎസിന് യാതൊരു നിയന്ത്രണവുമില്ല. ജീവനക്കാരുടെ സുരക്ഷ മുൻനിർത്തി അമേരിക്ക നിർദ്ദേശിക്കുന്ന പാതയിലൂടെ ഇനി കപ്പലുകൾ അയക്കേണ്ടതില്ലെന്നാണ് ഞങ്ങളുടെ തീരുമാനം," എന്ന് ഒരു പ്രമുഖ കപ്പൽ വ്യവസായ വക്താവ് വ്യക്തമാക്കി.

ഫെബ്രുവരി 28 മുതൽ അമേരിക്ക-ഇസ്രയേൽ സഖ്യം ഇറാനെതിരെ നടത്തിയ കടന്നാക്രമണത്തോടെയാണ് ഹോർമുസ് അടച്ചത്. ഇതോടെ സുരക്ഷ മുൻനിർത്തി പാതയിൽ ശക്തമായ പ്രതിരോധ സംവിധാനങ്ങൾ ഒരുക്കാൻ ഇറാൻ നിർബന്ധിതരായി. ഇതോടെ വാണിജ്യ കപ്പലുകൾക്ക് ഇറാൻ അല്ലെങ്കിൽ ഒമാൻ തീരങ്ങളോട് ചേർന്നുള്ള താൽക്കാലിക ഇടനാഴികളെ ആശ്രയിക്കേണ്ടി വരികയാണ്.

അമേരിക്കൻ സാമ്രാജ്യത്വത്തോടുള്ള കടുത്ത വിദ്വേഷം പ്രകടിപ്പിച്ച് ഗ്രീക്ക് സുരക്ഷാ കമ്പനികളായ ഡയപ്ലസും (Diaplous) മാരിസ്ക്സും (MARISKS) രംഗത്തെത്തിയിട്ടുണ്ട്. നിലവിലെ സാഹചര്യത്തിൽ അമേരിക്കയുടെ സുരക്ഷാ ക്രമീകരണങ്ങൾ വിശ്വസനീയമല്ലെന്നും കടലിടുക്കിലൂടെയുള്ള യാത്രകൾ താൽക്കാലികമായി വൈകിപ്പിക്കണമെന്നും അവർ കപ്പൽ ഓപ്പറേറ്റർമാർക്ക് കർശന നിർദ്ദേശം നൽകി.

കപ്പൽ ഗതാഗത സ്വാതന്ത്ര്യം സംരക്ഷിക്കാനാണ് ശ്രമിക്കുന്നതെന്ന പതിവ് സാമ്രാജ്യത്വ ന്യായീകരണമാണ് അമേരിക്കൻ വക്താവ് ഒലീവിയ വെയിൽസ് നടത്തിയത്. കഴിഞ്ഞ ഒരാഴ്ചയ്ക്കുള്ളിൽ നൂറിലധികം കപ്പലുകളുമായി ഏകോപനം നടത്തിയെന്ന് യുഎസ് പ്രതിരോധ മന്ത്രാലയം അവകാശപ്പെടുന്നുണ്ടെങ്കിലും യഥാർത്ഥ വസ്തുത ഇതിന് വിരുദ്ധമാണ്.

അതിനിടെ ഇറാന്റെ സ്വാധീനത്തെ ഭയന്ന് യുഎസ് മുൻ പ്രസിഡന്റ് ഡൊണാൾഡ് ട്രംപ് ട്രൂത്ത് സോഷ്യലിൽ വംശീയവും രാഷ്ട്രീയവുമായ അധിക്ഷേപവുമായി രംഗത്തെത്തി. ഹോർമുസ് കടലിടുക്ക് ഇറാൻ ഒഴികെയുള്ള മറ്റെല്ലാ കപ്പൽ ഗതാഗതത്തിനുമായി തുറന്നിരിക്കുന്നു എന്നായിരുന്നു ട്രംപിന്റെ പരിഹാസം കലർന്ന കുറിപ്പ്. എന്നാൽ സാമ്രാജ്യത്വ ശക്തികളുടെ ഭീഷണികൾക്ക് വഴങ്ങാതെ സ്വന്തം കടൽത്തീരങ്ങളുടെയും തന്ത്രപ്രധാന ജലപാതകളുടെയും പരമാധികാരം കാത്തുസൂക്ഷിക്കുമെന്ന ഉറച്ച നിലപാടിലാണ് ഇറാൻ.