കലിഫോർണിയയിലും ഫ്ലോറിഡയിലും 32 ദശലക്ഷം കൊതുകുകളെ തുറന്നുവിടാൻ അനുമതി തേടി ​ഗൂ​ഗിൾ

കലിഫോർണിയ: പ്രത്യേക ചികിത്സ നൽകിയ 32 ദശലക്ഷം കൊതുകുകളെ കലിഫോർണിയയിലും ഫ്ലോറിഡയിലുമായി തുറന്നുവിടാൻ ഗൂഗിളിന്റെ മാതൃകമ്പനിയായ ആൽഫബെറ്റ് ഫെഡറൽ അനുമതി തേടുന്നു. വെസ്റ്റ് നൈൽ വൈറസ്, സെന്റ് ലൂയിസ് എൻസെഫലൈറ്റിസ് തുടങ്ങിയ കൊതുകുജന്യ രോഗങ്ങളുടെ വ്യാപനം കുറയ്ക്കുന്നതിനായാണ് നീക്കം.

ആൽഫബെറ്റിന്റെ ലൈഫ് സയൻസസ് സബ്‌സിഡിയറിയായ 'വെരിലി' 2016ൽ ആരംഭിച്ച 'ഡീബഗ്' സംരംഭത്തിന്റെ ഭാഗമായാണ് അമേരിക്കൻ പരിസ്ഥിതി സംരക്ഷണ ഏജൻസിയിൽ (ഇപിഎ) ഈ നിർദ്ദേശം സമർപ്പിച്ചിട്ടുള്ളത്. നിലവിൽ പരീക്ഷണാത്മക ഉപയോഗ അനുമതിക്കായി ഇപിഎ ഇത് അവലോകനം ചെയ്തുവരികയാണ്.

'വോൾബാച്ചിയ' എന്ന സ്വാഭാവിക ബാക്ടീരിയ അടങ്ങിയ ആൺ കൊതുകുകളെയാണ് ഇതിനായി വളർത്തിയെടുക്കുന്നത്. ഈ ആൺ കൊതുകുകൾ ബാക്ടീരിയ ഇല്ലാത്ത കാട്ടു പെൺ കൊതുകുകളുമായി ഇണചേരുമ്പോൾ ഉണ്ടാകുന്ന മുട്ടകൾ വിരിയാതാവും. ഇതുവഴി ക്രമേണ കൊതുകുകളുടെ എണ്ണം കുറയ്ക്കാൻ സഹായിക്കുകയും ചെയ്യും.

പെൺകൊതുകുകൾ മാത്രമാണ് മനുഷ്യരെ കടിക്കുന്നത്. അതിനാൽ, ലക്ഷക്കണക്കിന് ആൺകൊതുകുകളെ പുറത്തുവിടുന്നത് വഴി ജനങ്ങൾക്ക് കൊതുക് കടി ഏൽക്കാനുള്ള സാധ്യത കൂടുന്നില്ല. വെസ്റ്റ് നൈൽ വൈറസ്, സെന്റ് ലൂയിസ് എൻസെഫലൈറ്റിസ് എന്നിവയുടെ പ്രാഥമിക വാഹകരായ 'ക്യൂലക്സ്' (Culex) ഇനം കൊതുകുകളെയാണ് ഈ പദ്ധതിയിലൂടെ ലക്ഷ്യമിടുന്നത്. സിഡിസി പ്രകാരം യുഎസിൽ ഏറ്റവും സാധാരണമായ കൊതുക് പരത്തുന്ന രോഗമാണ് വെസ്റ്റ് നൈൽ.

ദശലക്ഷക്കണക്കിന് കൊതുകുകളെ ഇത്തരത്തിൽ വേർതിരിച്ച് വളർത്തുന്നതിനായി ആൽഫബെറ്റിന്റെ എഐ അധിഷ്ഠിത സെക്സ്-സോർട്ടിംഗ് സിസ്റ്റങ്ങൾ, ഓട്ടോമേറ്റഡ് റെയറിംഗ് റോബോട്ടുകൾ, വാഹന അധിഷ്ഠിത റിലീസ് പ്ലാറ്റ്‌ഫോമുകൾ എന്നിവയാണ് ഉപയോഗിക്കുന്നത്. അനുമതി ലഭിക്കുകയാണെങ്കിൽ രണ്ട് വർഷത്തെ ഈ പരീക്ഷണം ഘട്ടങ്ങളായിട്ടായിരിക്കും നടപ്പിലാക്കുക (ആദ്യ വർഷം ഒരു സംസ്ഥാനത്തിന് 16 ദശലക്ഷം വരെയും, രണ്ടാം വർഷത്തിൽ ബാക്കി 16 ദശലക്ഷവും). എന്നാൽ കൃത്യമായ വിക്ഷേപണ സ്ഥലങ്ങൾ ഇതുവരെ പ്രഖ്യാപിച്ചിട്ടില്ല.