സിങ്കപ്പൂർ കോടതിയിൽ ബൈജു രവീന്ദ്രന് തിരിച്ചടി; ആറ് മാസത്തെ തടവ് ശിക്ഷ റദ്ദാക്കണമെന്ന ഹർജി തള്ളി

സിങ്കപ്പൂർ: കോടതി അലക്ഷ്യക്കേസിൽ ആറ് മാസത്തെ തടവ് ശിക്ഷ റദ്ദാക്കണമെന്ന ബൈജൂസ് സ്ഥാപകൻ ബൈജു രവീന്ദ്രന്റെ ഹർജി സിങ്കപ്പൂർ ഹൈക്കോടതി തള്ളി. ജൂലൈ 9-നാണ് കോടതി ഈ നിർണായക ഉത്തരവ് പുറപ്പെടുവിച്ചത്. ഇതോടെ, ശിക്ഷ അനുഭവിക്കാൻ തയ്യാറാകാതെ അദ്ദേഹത്തിന് ഇനി സിങ്കപ്പൂരിലേക്ക് മടങ്ങാൻ സാധിക്കാത്ത അവസ്ഥയായി.

കോടതി ഉത്തരവുകൾ തുടർച്ചയായി ലംഘിച്ചതിനെത്തുടർന്ന് കഴിഞ്ഞ മേയ് മാസത്തിലാണ് സിങ്കപ്പൂർ ഹൈക്കോടതി ബൈജു രവീന്ദ്രനെ ആറ് മാസത്തെ തടവ് ശിക്ഷയ്ക്ക് വിധിച്ചത്. കഴിഞ്ഞ മാസം ഈ ശിക്ഷയ്ക്ക് താൽക്കാലിക സ്റ്റേ അനുവദിച്ചിരുന്നെങ്കിലും പുതിയ ഉത്തരവിലൂടെ കോടതി അത് പൂർണ്ണമായും നീക്കം ചെയ്യുകയായിരുന്നു.

2024 ഏപ്രിൽ മുതലുള്ള സ്വത്തുവിവരങ്ങൾ വെളിപ്പെടുത്തുന്നതുമായി ബന്ധപ്പെട്ട നിരവധി കോടതി ഉത്തരവുകളാണ് ബൈജു രവീന്ദ്രൻ ലംഘിച്ചതെന്ന് കണ്ടെത്തിയിട്ടുണ്ട്. പ്രമുഖ വിദേശ നിക്ഷേപകരായ ഖത്തർ ഇൻവെസ്റ്റ്മെന്റ് അതോറിറ്റിയുടെ ഒരു ഉപവിഭാഗം നൽകിയ പരാതിയുടെ അടിസ്ഥാനത്തിലാണ് സിങ്കപ്പൂർ കോടതിയിൽ ഈ നിയമനടപടികൾ നടക്കുന്നത്.

കോടതിയുടെ പുതിയ വിധിയെ സ്വാഗതം ചെയ്യുന്നതായും ബൈജു രവീന്ദ്രനെതിരായ നിയമപോരാട്ടം ശക്തമായി തുടരുമെന്നും ഖത്തർ ഇൻവെസ്റ്റ്മെന്റ് അതോറിറ്റി വ്യക്തമാക്കി. എന്നാൽ താൻ മനഃപൂർവമോ അല്ലാതെയോ കോടതി ഉത്തരവുകൾ ലംഘിച്ചിട്ടില്ലെന്നാണ് ബൈജു രവീന്ദ്രന്റെ നിലപാട്. വിധിക്കെതിരെ നിയമപരമായ എല്ലാ പോംവഴികളും തുടർന്നും തേടുമെന്ന് അദ്ദേഹത്തിന്റെ അഭിഭാഷകർ പ്രസ്താവനയിൽ അറിയിച്ചു.