കളിക്കുന്നതിനിടെ റോക്കറ്റ് പ്രൊപ്പല്ലൻ്റ് പൊട്ടിത്തെറിച്ചു; പാകിസ്താനിൽ മൂന്ന് കുട്ടികൾക്ക് ദാരുണാന്ത്യം

കറാച്ചി: പാകിസ്താനിലെ സിന്ധ് പ്രവിശ്യയിൽ കശ്മോറിൽ കളിക്കുന്നതിനിടെ റോക്കറ്റ് പ്രൊപ്പല്ലൻ്റ് പൊട്ടിത്തെറിച്ച് എട്ടിനും പന്ത്രണ്ടിനും ഇടയിൽ പ്രായമുള്ള മൂന്ന് കുട്ടികൾ കൊല്ലപ്പെട്ടു. കാണ്ഡ്‌കോട്ട് പട്ടണത്തിന് സമീപമാണ് സംഭവം. ഗ്രാമത്തിന് സമീപത്തെ വയലിൽ നിന്ന് കണ്ടെത്തിയ പ്രൊപ്പല്ലൻ്റുമായാണ് കുട്ടികൾ കളിച്ചിരുന്നത്.

കുട്ടികൾ കളിക്കുന്നതിനിടെയാണ് നിറമുള്ള പ്രൊപ്പല്ലൻ്റ് പൊട്ടിത്തെറിച്ചതെന്ന് ഡെപ്യൂട്ടി സൂപ്രണ്ട് ഓഫ് പൊലീസ് (ഡിഎസ്പി) സയ്യിദ് അസ്ഗർ അലി ഷാ പറഞ്ഞു. ഇവർ വയലിൽ കളിക്കാൻ പോയതായിരുന്നുവെന്നും പ്രദേശവാസികൾ പൊലീസിനെ അറിയിച്ചു.

ഏറെക്കാലം ഇന്ധനമോ മറ്റ് സ്ഫോടകവസ്തുക്കളോ സംഭരിക്കാൻ കഴിയുന്ന സോളിഡ് പ്രൊപ്പല്ലൻ്റ് ആണ് പൊട്ടിത്തെറിച്ചതെന്നാണ് പ്രാഥമിക നിഗമനം. റോക്കറ്റ് പ്രൊപ്പല്ലൻ്റിൻ്റെ അവശിഷ്ടങ്ങൾ ബോംബ് നിർവീര്യമാക്കൽ സ്ക്വാഡ് വിശദമായ പരിശോധനയ്ക്കായി എടുത്തിട്ടുണ്ട്. കശ്മോർ ജില്ലയിലെ നദീതീരങ്ങളിൽ സജീവമായ കൊള്ളക്കാർ ഉപേക്ഷിച്ചുപോയതാകാം ഈ പ്രൊപ്പല്ലൻ്റ് എന്നും ഡിഎസ്പി കൂട്ടിച്ചേർത്തു.