പോസ്റ്റ് വിവാദം, പാലക്കാട് തെരഞ്ഞെടുപ്പ് എതിർപ്പ്, ഒടുവിൽ മീഡിയ സെല്ലിൽനിന്ന് വി ടി ബൽറാം പുറത്ത്

തിരുവനന്തപുരം: നിരവധിയായ വിവാദങ്ങൾക്കൊടുവിൽ കെപിസിസി ഡിജിറ്റൽ മീഡിയ ചെയർമാൻ സ്ഥാനം ഒഴിഞ്ഞ് വി ടി ബൽറാം. ഹൈബി ഈഡനാണ് പകരം ചുമതല. പ്രൊഫഷണൽ സംഘത്തെ നിയോഗിച്ച് സോഷ്യൽ മീഡിയ സംഘത്തെ ശക്തമാക്കാനാണ് നീക്കം.

'ബീഡിയും ബിഹാറും ബി യിലാണ് തുടങ്ങുന്നത്'- കോൺഗ്രസ് കേരളഘടകത്തിന്റെ എക്സ് പോസ്റ്റ് മുൻപ് വിവാദമായിരുന്നു. അതിന്റെ ഭാഗമായി ഡിജിറ്റൽ മീഡിയ സെൽ ചെയർമാൻ സ്ഥാനത്ത് നിന്നും വി ടി ബൽറാമിനെ നീക്കാൻ ശ്രമമുണ്ടായിരുന്നു. 'ബിഹാറും ബീഡിയും തുടങ്ങുന്നത് ബി യിൽ ആണെന്നും ഒരു പാപമായി ഇനി കണക്കാക്കാൻ കഴിയില്ല'- എന്ന എക്സ് പോസ്റ്റിനെതിരെ ദേശീയതലത്തിൽ വലിയ വിമർശനം ഉയർന്നതാണ്. പോസ്റ്റിനെതിരെ വൻ വിമർശനം കോൺ​ഗ്രസിനുള്ളിൽ നിന്നും ഇന്ത്യാസഖ്യത്തിലും പ്രകടമായിരുന്നു.

പോസ്റ്റിനെതിരെ രൂക്ഷ വിമർശനവുമായി ആർജെഡി നേതാവ് തേജസ്വി യാദവും രം​ഗത്തെത്തി. പ്രാദേശിക വികാരം വ്രണപ്പെടുത്തിയെന്ന് കുറ്റപ്പെടുത്തിയ അദ്ദേഹം കോൺ​ഗ്രസ് നടപടി തെറ്റാണെന്നും യോജിക്കുന്നില്ലെന്നും പറഞ്ഞു. ബിഹാർ തെരഞ്ഞെടുപ്പിൽ ആർജെഡിയുമായി ചേർന്ന് കോൺഗ്രസ് മുന്നേറ്റത്തിന് ശ്രമിക്കുന്നതിനിടയിലെ പോസ്റ്റ് ബിജെപി വലിയ ആയുധമാക്കുകയും ചെയ്തു. ബിഹാറിനെ കോൺഗ്രസ് അവഹേളിച്ചെന്നാണ് ഉപമുഖ്യമന്ത്രി സാമ്രാട്ട് ചൗധരി പറഞ്ഞത്.

ജിഎസ്ടി കൗൺസിൽ പുതിയ നിരക്കുകൾ തീരുമാനിച്ചപ്പോൾ ബിഡിയുടെ നികുതി 28 ശതമാനത്തിൽ നിന്ന് 18 ശതമാനമായി കുറച്ചിരുന്നു. ബീഡി പൊതിയുന്ന ഇലകളുടെ നികുതി നിരക്ക് 18 ശതമാനത്തിൽനിന്ന് അഞ്ച് ശതമാനമായും കുറച്ചു. ഇതിന് പിന്നാലെയായിരുന്നു കോൺഗ്രസ് കേരളയുടെ എക്‌സ് ഹാൻഡിലിൽ പോസ്റ്റ് പ്രത്യക്ഷപ്പെട്ടത്.

തദ്ദേശ തെരഞ്ഞെടുപ്പിലെ പാലക്കാട് സ്ഥാനാർഥി പ്രഖ്യാപനത്തിൽ വി ടി ബൽറാം അനാവശ്യ ഇടപെടൽ നടത്തിയെന്നാരോപിച്ച് വി ടി ബൽറാമിനെതിരെ യൂത്ത് കോൺഗ്രസ് രംഗത്തെത്തിയിരുന്നു. യൂത്ത് കോൺഗ്രസ് സംസ്ഥാന സെക്രട്ടറിയായ ഒ കെ ഫാറൂഖിന് ജില്ലാ പഞ്ചായത്ത് ഡിവിഷനിൽ സീറ്റ് നൽകാഞ്ഞതിനെ തുടർന്നാണ് പൊട്ടിത്തെറി.

ഇഷ്ടക്കാർക്കും വിദൂഷകന്മാർക്കും വാഴ്ത്തുപാട്ടുകാർക്കും സീറ്റ് കൊടുത്ത് കഴിഞ്ഞോ എന്ന തരത്തിലാണ് പോസ്റ്റുകൾ ബൽറാമിനെതിരെ പ്രചരിച്ചത്.

ഈ സംഭവങ്ങളും മാങ്കൂട്ടത്തിൽ വിഷയത്തിൽ ചുരുക്കമെങ്കിലും നിലപാട് സ്വീകരിച്ച് കോൺഗ്രസ് നേതാക്കൾക്ക് നേരെ നടക്കുന്ന പ്രവർത്തകരുടെ സൈബർ ആക്രമണത്തെ ചെറുക്കാനാകാത്തതും രാജിക്ക് വഴി തുറന്നെന്നാണ് സൂചന.