ദിത്വാ: തമിഴ്നാട്ടിൽ വീട് ഇടിഞ്ഞുവീണ് യുവതി മരിച്ചു

ചെന്നൈ: ദിത്വാ ചുഴലിക്കാറ്റിനെ തുടർന്ന് തമിഴ്നാട്ടിൽ ശക്തമായ കാറ്റിലും മഴയിലും വീട് തകർന്ന് യുവതി മരിച്ചു. തഞ്ചാവൂർ ആലമൻകുറിച്ചി സ്വദേശി രേണുക (20) ആണ് മരിച്ചത്. ഇന്ന് പുലർച്ചെയാണ് അപകടമുണ്ടായത്. രേണുക, അച്ഛൻ, അമ്മ, സഹോദരി എന്നിവരാണ് അപകട സമയത്ത് വീട്ടിലുണ്ടായിരുന്നത്. വിശദവിവരങ്ങൾ ലഭ്യമായിട്ടില്ല. കഴിഞ്ഞ ദിവസങ്ങളിലായി തഞ്ചാവൂരിൽ കനത്ത മഴ തുടരുകയാണ്.

തമിഴ് നാട്ടിൽ പലയിടങ്ങളിലും ശക്തമായ മഴയുണ്ട്. നാഗപട്ടണത്ത് 30 സെന്റിമീറ്റര്‍ മഴ രേഖപ്പെടുത്തിയിട്ടുണ്ട്. ഉച്ചവരെ മഴ തുടരുമെന്ന് കാലാവസ്ഥ നിരീക്ഷണ കേന്ദ്രം അറിയിച്ചു. പുതുച്ചേരിയിലും കനത്തമഴയുള്ളതായാണ് റിപ്പോർട്ട്. 10 എന്‍ഡിആര്‍എഫ് യൂണിറ്റുകൾ കൂടി തമിഴ്നാട്ടിൽ വിന്യസിച്ചു. തെക്കൻ തീരദേശ ആന്ധ്രാപ്രദേശിലും, റായലസീമ ജില്ലയിലെ ഒറ്റപ്പെട്ട സ്ഥലങ്ങളിലും കനത്തതോ വളരെ ശക്തമായതോ ആയ മഴ പ്രതീക്ഷിക്കാം. തമിഴ്‌നാട്, പുതുച്ചേരി, ആന്ധ്രാപ്രദേശ് എന്നിവിടങ്ങളിൽ ഇപ്പോൾ റെഡ് അലേർട്ട് ആണ്.

ചെന്നൈ, പുതുക്കോട്ട, അരിയല്ലൂർ, തഞ്ചാവൂർ, തിരുവാരൂർ, പെരമ്പല്ലൂർ, തിരുച്ചിറപ്പള്ളി, സേലം, കള്ളക്കുറിച്ചി, തിരുവണ്ണാമലൈ, കാഞ്ചീപുരം, തിരുവള്ളൂർ, റാണിപ്പേട്ട് ജില്ലകളിലും കനത്ത മഴയ്ക്ക് സാധ്യതയുണ്ട്. ചുഴലിക്കാറ്റ് മൂലം പുല്ല് മേഞ്ഞ വീടുകൾക്കും വൈദ്യുതി, ആശയവിനിമയ ലൈനുകൾക്കും നാശനഷ്ടങ്ങൾ സംഭവിക്കുമെന്നും, മരങ്ങൾ കടപുഴകി വീഴുമെന്നും അധികൃതർ മുന്നറിയിപ്പ് നൽകി. കൃഷിയിടങ്ങളിലും താഴ്ന്ന പ്രദേശങ്ങളിലും വെള്ളപ്പൊക്കമുണ്ടാകാനും സാധ്യതയുണ്ട്. ചെന്നൈയില്‍ നിന്നുള്ള 47 വിമാനങ്ങള്‍ റദ്ദാക്കി.