സൗണ്ട് സിസ്റ്റം ഓഫ് ചെയ്തു; ബംഗാളിൽ ഒരാൾ കുത്തേറ്റ് മരിച്ചു

കൊൽക്കത്ത: പശ്ചിമ ബംഗാളിൽ സൗണ്ട് സിസ്റ്റം ഓഫ് ചെയ്തതിനെ തുടർന്നുണ്ടായ തർക്കത്തിൽ ഒരാൾ കുത്തേറ്റ് മരിച്ചു. കാളീ പൂജ ആഘോഷങ്ങൾക്കിടെ സംഗീതം കേൾപ്പിക്കുന്നതിനെച്ചൊല്ലിയുണ്ടായ സന്തൻ നസ്‌കർ (30) കൊലചെയ്യപ്പെട്ടത്.

ബുധനാഴ്ച രാത്രിയാണ് സംഭവം. കാളീ പൂജ പന്തലിൽ മൂന്ന് രാത്രിയായി ഉച്ചത്തിൽ പാട്ട് വെച്ചിരുന്നത് സമീപവാസികളിൽ ചിലർക്ക് ബുദ്ധിമുട്ടുണ്ടാക്കി. ഹൃദയസംബന്ധമായ അസുഖമുള്ള ഒരു അയൽക്കാരിയുടെ അഭ്യർത്ഥനയെ തുടർന്ന്, സൗണ്ട് സിസ്റ്റം പ്രവർത്തിപ്പിച്ചിരുന്ന സന്തൻ അത് ഓഫ് ചെയ്ത് വീട്ടിലേക്ക് മടങ്ങി.

ഇതിൽ ക്ഷുഭിതരായ അയൽവാസിയും സംഘവും സന്തന്റെ വീട്ടിലേക്ക് അതിക്രമിച്ച് കയറി. സംഘം തന്റെ അമ്മയെ ആക്രമിക്കാൻ തുനിഞ്ഞപ്പോൾ തടയാൻ നിന്ന അദ്ദേഹത്തെ സംഘത്തിലൊരാൾ കത്തി ഉപയോഗിച്ച് പലതവണ കുത്തുകയായിരുന്നു.

ഗുരുതരമായി പരിക്കേറ്റ സന്തനെ ഉടൻ ആശുപത്രിയിൽ എത്തിച്ചെങ്കിലും മരിച്ചു. കൊലപാതകവുമായി ബന്ധപ്പെട്ട് അയൽവാസിയായ പിന്റു സാഹയെയും ഭാര്യയെയും പോലീസ് അറസ്റ്റ് ചെയ്തു. മറ്റ് രണ്ട് പേർക്കായി തിരച്ചിൽ തുടരുകയാണ്.