എംബിബിഎസ്‌ വിദ്യാർഥിയുടെ കൂട്ടബലാത്സംഗം; രാത്രി സ്ത്രീകൾ പുറത്തിറങ്ങരുതെന്ന് തൃണമൂൽ എംപിയും

കൊൽക്കത്ത: പശ്ചിമബംഗാളിൽ എംബിബിഎസ്‌ വിദ്യാർത്ഥിയെ കൂട്ടബലാത്സംഗം ചെയ്ത സംഭവത്തിൽ വിവാദപരാമർശവുമായി തൃണമൂല്‍ കോണ്‍ഗ്രസ് എംപി സൗഗത റോയും. പൊലീസിന് എപ്പോഴും സുരക്ഷയൊരുക്കാൻ സാധിക്കില്ലെന്നും അതുകൊണ്ട് സ്ത്രീകൾ രാത്രികാലങ്ങളിൽ പുറത്തിറങ്ങരുതെന്ന് സൗഗത റോയ് പറഞ്ഞു.

ബംഗാളിൽ ഇത്തരം കേസുകൾ അപൂർവമാണ്. മറ്റു സംസ്ഥാനങ്ങളെക്കാളും സ്ത്രീസുരക്ഷയുള്ള സംസ്ഥാനമാണ് ബംഗാൾ. എന്നാലും സ്ത്രീകൾ രാത്രികാലങ്ങളിൽ പുറത്തിറങ്ങരുതെന്നും അദ്ദേഹം പറഞ്ഞു. സംഭവത്തിൽ സമാനമായ പരാമർശവുമായി മുഖ്യമന്ത്രി മമത ബാനർജിയും രംഗത്ത് വന്നിരുന്നു.

വിദ്യാർഥിനി ഒരു സ്വകാര്യ മെഡിക്കൽ കോളേജിൽ പഠിക്കുകയാണെന്നും എന്തിനാണ് അവൾ രാത്രി 12.30 ന് പുറത്തിറങ്ങിയതെന്നും മമത ചോദിച്ചു. സ്വകാര്യ മെഡിക്കൽ കോളജുകൾ അവരുടെ വിദ്യാർഥികളെ ശ്രദ്ധിക്കണമെന്നും മമത പറഞ്ഞു. രാത്രി സംസ്കാരവും ശ്രദ്ധിക്കണം.

വിദ്യാർഥികളെ പുറത്തിറങ്ങാൻ അനുവദിക്കരുത്, അതൊരു വനമേഖലയാണ്. ഒഡീഷയിൽ, കടൽത്തീരങ്ങളിൽ പെൺകുട്ടികളെ ബലാത്സംഗം ചെയ്തു. ഒഡീഷ സർക്കാർ എന്ത് നടപടിയാണ് സ്വീകരിച്ചത് എന്നൊക്കെയായിരുന്നു മമതയുടെ വാദം. ഇതിനെത്തുടർന്ന് വലിയ ചർച്ചകളും വിമർശനങ്ങളുമുണ്ടായി. ഈ അവസരത്തിലാണ് സൗഗത റോയിയുടെയും പരാമർശം.

23 കാരിയായ എംബിബിഎസ്‌ വിദ്യാർഥിനി ഭക്ഷണം കഴിക്കാനായി സുഹൃത്തുമായി പുറത്ത് പോയ സാഹചര്യത്തിലാണ് കൂട്ടബലാത്സംഗത്തിനിരയായത്. പ്രതികൾ വിദ്യാർഥിനിയെ പിന്തുടർന്ന് സമീപത്തുള്ള വനപ്രദേശത്തേക്ക് കൊണ്ടുപോയാണ് ആക്രമിച്ചത്. സംഭവത്തിൽ ഇതുവരെ അഞ്ച് പേർ അറസ്റ്റിലായിട്ടുണ്ട്.