വിഷാംശമുള്ള ചുമ മരുന്ന് കഴിച്ച കുട്ടി 115 ദിവസത്തിനുശേഷം ആശുപത്രി വിട്ടു; കാഴ്ചശക്തി നഷ്ടമായി

ചിന്ദ്വാര: മധ്യപ്രദേശിൽ വിഷാംശമടങ്ങിയ ചുമ മരുന്ന് കഴിച്ച് 24 കുട്ടികൾ മരിക്കാനിടയായ സംഭവത്തിൽ, ചികിത്സയിലായിരുന്ന അഞ്ചു വയസുകാരൻ 115 ദിവസങ്ങൾക്ക് ശേഷം ആശുപത്രി വിട്ടു. ചിന്ദ്വാര ജില്ലയിലെ ജാതച്ചാപ്പർ സ്വദേശിയായ കുനാൽ യദുവംശിയാണ് നീണ്ട ചികിത്സയ്ക്ക് ശേഷം വീട്ടിൽ തിരിച്ചെത്തിയത്. 'കോൾഡ്രിഫ്' (Coldrif) എന്ന ചുമ മരുന്നിന്റെ പാർശ്വഫലം മൂലം കുട്ടിയുടെ കാഴ്ചശക്തി നഷ്ടപ്പെടുകയും ചലനശേഷിക്ക് തകരാർ സംഭവിക്കുകയും ചെയ്തു.

ഓഗസ്റ്റ് 24-ന് പനിയെത്തുടർന്നാണ് കുനാലിന് പ്രാദേശിക ഡോക്ടർ ഈ മരുന്ന് നിർദ്ദേശിച്ചത്. മരുന്ന് കഴിച്ചതിന് പിന്നാലെ കുട്ടിയുടെ ആരോഗ്യനില വഷളാവുകയും തുടർന്ന് നടത്തിയ പരിശോധനയിൽ രണ്ട് വൃക്കകളുടെയും പ്രവർത്തനം തകരാറിലായതായി കണ്ടെത്തുകയും ചെയ്തു. തുടർന്ന് നാഗ്പൂർ എയിംസ് ഉൾപ്പെടെയുള്ള വിവിധ ആശുപത്രികളിൽ പ്രവേശിപ്പിക്കപ്പെട്ട കുനാൽ മാസങ്ങളോളം തീവ്രപരിചരണ വിഭാഗത്തിലും ഡയാലിസിസിലും ആയിരുന്നു.

മരുന്നിലെ വിഷാംശം കുട്ടിയുടെ കണ്ണുകളിലെ ദ്രാവകം വറ്റുന്നതിനും നാഡീവ്യവസ്ഥയെ ബാധിക്കുന്നതിനും കാരണമായതായി ഡോക്ടർമാർ അറിയിച്ചു. നിലവിൽ കുട്ടിക്ക് കാഴ്ചശക്തിയില്ല. കൂടാതെ പരസഹായമില്ലാതെ നടക്കാനും ബുദ്ധിമുട്ടുണ്ട്. കുനാലിന്റെ ജീവൻ രക്ഷിക്കാനായെങ്കിലും പൂർണ്ണ ആരോഗ്യത്തിലേക്ക് തിരിച്ചുവരാൻ ദീർഘകാലത്തെ ചികിത്സയും പുനരധിവാസവും ആവശ്യമാണെന്ന് ആരോ​ഗ്യ സംഘം വ്യക്തമാക്കി. 24 കുട്ടികളുടെ മരണത്തിന് ഇടയാക്കിയ ഈ ദുരന്തത്തിൽ നിന്നും രക്ഷപ്പെട്ട ചുരുക്കം കുട്ടികളിലൊരാളാണ് കുനാൽ.