അമിതവേഗതയിലെത്തിയ കാര്‍ ഡിവൈഡറിലിടിച്ച് മറിഞ്ഞു; യുവാക്കള്‍ക്ക് ദാരുണാന്ത്യം

മുംബൈ : മുംബൈ - വഡോദര ഹൈവേയിൽ ബിഎംഡബ്ല്യു കാർ ഡിവൈഡറിലിടിച്ച് മറിഞ്ഞ് രണ്ട് പേർ മരിച്ചു. ഒരാൾക്ക് ​ഗുരുതരമായി പരിക്കേറ്റതായി എൻഡിടിവി റിപ്പോർട്ട് ചെയ്തു.

അപകടത്തിൽ ബിഎംഡബ്ല്യു Z4 കാർ പൂർണമായും തകർത്തു. അമിത വേഗതിയിലെത്തിയ വാഹനത്തിന്റെ ഭാ​ഗങ്ങൾ അപകടത്തിന്റെ ആഘാതത്തിൽ റോഡുമുഴുവൻ ചിന്നിചിതറുകയായിരുന്നു. അപകടസമയത്ത് കാർ 250 km/hr വേ​ഗതയിലായിരുന്നുവെന്നാണ് റിപ്പോർട്ടുകൾ. ജന്മദിനാഘോഷ പരിപാടിയില്‍ പങ്കെടുത്ത് മടങ്ങവെയാണ് അപകടമുണ്ടായത്.

ഞായറാഴ്ച പുലർച്ചെ 3 മണിയോടെയാണ് സംഭവം. ടിത്ത്വാലയിൽ നിന്ന് ബദ്ലാപൂരിലേക്ക് പോവുകയായിരുന്ന കാർ നിയന്ത്രണം വിട്ട് ഡിവൈഡറിലിടിച്ച് മറിയുകയായിരുന്നു. ബദ്ലാപൂർ നിവാസികളായ യോകേഷ് ദി​ഗെ, റികേബ ജകബ് എന്നിവർ സംഭവസ്ഥലത്ത് വെച്ച് തന്നെ കൊല്ലപ്പെട്ടു. കൂടെയുണ്ടായിരുന്ന മറ്റൊരു അടുത്തുള്ള സ്വകാര്യ ആശുപത്രിയിൽ ചികിത്സയിലാണ്. കൊല്ലപ്പെട്ടവരുടെ മൃതദേഹം പോസ്റ്റ്മോർട്ടത്തിനയച്ചിട്ടുണ്ട്. ഫൊറൻസിക് സംഘം സംഭവസ്ഥലത്തെത്തി തെളിവുകൾ ശേഖരിച്ചു.