വാട്ട്‌സാപ്പ്, ടെലിഗ്രാം എന്നിവ ഉൾപ്പെടെ ഉപയോ​ഗിക്കാൻ ആക്ടീവ് സിം കാർഡുമായി ബന്ധിപ്പിക്കണം

ന്യൂഡൽഹി: വാട്ട്‌സാപ്പ്, ടെലിഗ്രാം, സിഗ്നൽ, സ്‌നാപ്ചാറ്റ്, ഷെയർചാറ്റ്, ജിയോചാറ്റ്, അരട്ടായി, ജോഷ് തുടങ്ങിയ ജനപ്രിയ മെസേജിംഗ് ആപ്പുകൾ ഉപയോ​ഗിക്കുന്നതിന് സുപ്രധാന നിർദേശവുമായി ടെലികമ്മ്യൂണിക്കേഷൻ വകുപ്പ് (ഡിഒടി). ആക്ടീവ് സിം കാർഡ് ഇല്ലാതെ ഉപയോക്താക്കൾക്ക് ഇത്തരം പ്ലാറ്റ്ഫോമുകളുടെ സേവനം അസാധ്യമാക്കാനാണ് നീക്കം. ഇന്ത്യയുടെ പുതിയ ടെലികമ്മ്യൂണിക്കേഷൻ സൈബർ സുരക്ഷാ ഭേദഗതി നിയമങ്ങ(20225)ളുടെ ഭാ​ഗമായാണ് ഈ ഉത്തരവ്.

പുതിയ മാർഗനിർദേശപ്രകാരം ആപ്ലിക്കേഷനുമായി ബന്ധിപ്പിച്ചിരിക്കുന്ന മൊബൈൽ നമ്പറുള്ള സിംകാർഡ് ഫോണിൽ ആക്ടീവല്ലെങ്കിൽ ആപ്പുകൾ പ്രവർത്തിപ്പിക്കാനാകില്ല. ഇത്തരം പ്ലാറ്റ്ഫോമുകൾ ഈ നിർദേശം 90 ദിവസത്തിനുള്ളിൽ നടപ്പിലാക്കണം. വെബ് ബ്രൗസർ വഴി ലോഗിൻ ചെയ്യുന്ന ഉപയോക്താക്കളെ ഓരോ ആറ് മണിക്കൂറിലും പ്ലാറ്റ്‌ഫോമുകളിൽ നിന്ന് ലോഗ് ഔട്ട് ചെയ്യേണ്ടതുണ്ടെന്നും ഡിഒടി നിർദേശിക്കുന്നു. കൂടാതെ ഒരു QR കോഡ് വഴി വീണ്ടും ഓതന്റിക്കേഷൻ നടത്തേണ്ടതുണ്ട്.

വിവിധ ആപ്ലിക്കേഷനുകൾ ഉപയോ​ഗിക്കുമ്പോൾ സജീവവും പരിശോധിച്ചുറപ്പിച്ചതുമായ ഒരു സിമ്മുമായി ബന്ധിപ്പിക്കേണ്ടതുണ്ട്. അതിനാൽ വിദൂരത്തിലിരുന്ന് കുറ്റവാളികൾ ആപ്പുകൾ ചൂഷണം ചെയ്യുന്നത് തടയുമെന്ന് ടെലികമ്യൂണിക്കേഷൻ വകുപ്പ് പറയുന്നു. നിലവിൽ മിക്ക ആപ്ലിക്കേഷൻ സേവനങ്ങളും ഒരു ഉപയോക്താവിന്റെ മൊബൈൽ നമ്പർ ഇൻസ്റ്റാളേഷൻ സമയത്ത് മാത്രമാണ് പരിശോധിച്ച് ഉറപ്പ് വരുത്തുന്നത്. അതുവഴി ഇവ ദുരുപയോ​ഗം ചെയ്യാനുള്ള സാധ്യത വർധിപ്പിക്കും. അതിനുശേഷം സിം നീക്കം ചെയ്യുകയോ നിർജ്ജീവമാക്കുകയോ ചെയ്താലും ആപ്പ് പ്രവർത്തിക്കും. ഈ പഴുതടയ്ക്കുകയാണ് ലക്ഷ്യമെന്ന് ഡിഒടി പറഞ്ഞു.